² Lelahy pivavaky izy, gny raiky ze midera an'Agnahary miaraky amigny akohonany aby; nagnome vola besaky anireo ze tao agnatinigny sy fahapia izy, dra nivavaky mandrakariva tamin'Agnahary. ³ Nagnodidy gny tamigny ora faha sivy mary teo ho eo, nahita mazava tamigny fahita azelin'Agnaha nagnato anazy izy. Gny azely nizaka taminazy ho: "Ry Kornelio!" ⁴ Kornelio nibazy gny azely dra tena raiki-tahosy dra nizaka ho: "Fa ino tihoky topoko?" Gny azely nizaka taminazy ho: "Reo vavakao vo reo fagnomezanao ho anigny mahatra dra tafakasy ho fagnati-pahasiarova eo agnatrehan'Agnahary. ⁵ Dra magniraha lelahy hagnagny amigny tananigny Jopa ba hangalaky gny lelahy raiky atao ho i Somona ze atao ho i Petera. ⁶ Mipetraky miaraky amigny pandoko holisy atao ho Simona izy, ze egny amoron-dranosisy gny tragnony." ⁷ Gny fa lasa gny azely ze nizaka taminazy, dra nitoka gnyk rolahy tamigny ponopony tao atragno i Kornelio, dra maramila pivavaky raiky tamireo ze nanopo anazy. ⁸ Kornelio nizaka tamin'ereo aby nitranga dra nandefa anereo tagny Jopa. ⁹ Dra gny maraindray nagnodidy gny ora fahaenia teo, raha bo tegny andala ereo dra nagnotany gny tana, dra niakasy tegny agnabo tafo-tragno i Petrera ba hivavaky. ¹⁰ Nanomboky nihi-hare izy boaky eo nitalia raha ho hany, kanefa raha bo teo apahandroa hany gny olo, dra nahita fahita izy, ¹¹ dra nahita gny lagnisy nisokasy izy vo fitehiriza raiky nizoso, manahaky gny lamba be mizoso eto atany, apizosoa amigny zorony efasy. ¹² Tao gny nisy karazam-biby mana-tomboky efasy vo raha ze mandaly aby eto atany, dra gny voronigny lagnisy. ¹³ Dra nisy feo nizaka taminazy ho: "Misangana, ry Petera, mamono dra mihina." ¹⁴ Fa i Petera nizaka ho: "Aha, Topo; fa bo sy nihina raha ze voarara vo sy malio mihisy zaho." ¹⁵ Feseky avy taminazy fagnindro ndraiky gny feo ho: "Ze niliovin'agnahary, dra sy tokavy ho faly." ¹⁶ Niseho itelo zay; dra boak'eo gny fitehiriza dra nihery niaraky teo no ho eo tagny an-dagnisy. ¹⁷ Dra gny fa very hevisy momba gny dikanigny fahita ze hitany i Petera, dra ingo, reo lelahy ze nalefan'i Kornelio nisanga nagnoloa gny vavahady, boak'eo ereo dra nagnotany ze lalan'ereo magnao atragno. ¹⁸ Dra nitoka ereo dra nagnotany an'i Simona, natao avo koa ho Petera, ze nizano teo. ¹⁹ Raha bo nieriserisy bo gny fahita i Petera, dra nizaka taminazy gny Fagnahy ho: "Ingo, lelahy telo gny mitalia anao. (Fagnamariha: Gny amigny dika-zaka taloha dra ho: "Lelahy rolahy gny mitalia anao" na "misy lelahy ilailany mitalia anao.) ²⁰ Misangana dra mizosoa dra miaraha amin'ereo. Ka misasala miaraky amin'ereo, akory zaho gny nandefa anereo. ²¹ Dra Petera nizoso tagny amireo lelahy reo dra nizaka ho: " Izaho gny taliavindrareo. Ino gny atony nahaviandrareo?" ²² Hoy ereo ho: "Gny kapiteny atao i Kornelio, lelahy mary dra olo ze midera an'Agnahary, dra soa laza agny amigny firenenigny Jiosy aby, ze nizakanigny azely masin'Agnahary ba hangalaky anao ho atragnony agny, noho izay dra afaky miteno gny hafasy boaky aminao izy." ²³ Dra nanasa anereo hilisy vo hizano hiaraky aminazy Petera. Gny maraindray marainigny dra nisanga izy dra niaraky tamin'ereo, dra gny ilany tamireo rahalahy boak'agny Joda dra nagnaraky anazy. ²⁴ Gny andro magnaraky dra nagnao Kaisaria ereo. Kornelio dra nandigny anereo; tonoka miaraky gny havany vo gny namany mariny anazy. ²⁵ Dra tamizaygny fa nilisy Petera, nifangahita taminazy i Kornelio dra nekohoky teo atombony ba hidera anazy. ²⁶ Fa Petera nagnapy anazy, nizaka ho: "Misangana! Zaho koa dra olo avo. ²⁷ Raha bo nizaka niaraky taminazy i Petera, dra nilisy izy dra nahita olo maro be niara-niango. ²⁸ Hoy izy tamin'ereo ho: "Gny vatandrareo mahay fa sy ara-dala ho anigny Jiosy gny miara-miasa na mamangy olo boaky amigny firenena hafa. Fa Zagnahary nanehy taminahy fa sy tokony hitoka olo-paly na sy malio zaho. ²⁹ Zay gny atony nahaviako sy nisy fagnakasaha, gny fa nirahy zaho. Dra magnotany andrareo zaho ho nagnino handrareo gny magniraky ho anahy." ³⁰ Kornelio nizaka ho: "Afasy andro melohan'izao ora izao indrindra, dra nivavaky tao atragnoko zaho tamigny ora fahasivy; dra nahita, lelahy raiky nisanga teo anoloako nanao akazo mamira. ³¹ Hoy izy ho: 'Ry Kornelio, fa ren'Zagnahary gny vavakao, dra fagnomezanao ho anireo mahatra dra mapasiahy an'Agnahary gny momba anao. ³² Noho izay dra magniraha olo ho a Jopa agny, dra tokavo magnagny aminao gny lelahy atao i Simona ze atao ho i Petera. Mitoboha ao atragnon'i Simona pando-kolisy atao ho: Simona izy, ze egny amoron-dranomasy.' (Fagnamariha: Gny dika-zaka taloha dra nagnapy ho: "Gny fa avy izy, dra hizaka aminao." ³³ Dra avy hatragny dra nalefako hanao. Soa gny fahavianao. Dra amizao, isika aby avy eto amason'Agnahary, ba hiteno ze nizakanigny Topo andrareo aby gny nizakanao." (Fagnamariha: "Raha tokony ho: "Nizakanigny Topo gny zaka." gny eo, dra gny dika-zaka taloha dra gny ho: "nizakan'Agnahary gny zaka.") ³⁴ Boak'eo nanokaky gny vavany Petera dra nizaka: "Mary vatany, fataso fa Zagnahary dra sy miandany na amin'iza na amin'iza. ³⁵ Fa koa, agny amigny firenena sirairay na iza na iza gny midera vo manao asa mary dra ekeny avokoa. ³⁶ Fatandrareo gny hafasy ze nalefany ho anigny olon'Israely, gny fa nitalily filazasara momba gny fedagna boaky aminigny alalan'i Jesosy Kristy izy, ze Toponigny aby- ³⁷ Handrareo vatandrareo dra mahay reo raha niseho, ze tena nitranga tao amigny toeran'aby tao Jodia, nanomboky tagny Galilia, tafaranigny batisa ze zinakan'i Jaona; ³⁸ reo raha-nitranga mikasiky an'i Jesosinigny Nazareta anazy tamigny Fagnahy Masy vo tamigny hery. Nandeha nanao sao izy sady nagnasitragny reo ze voafehinigny devoly aby, akory Zagnahary dra niaraky taminazy. ³⁹ Isika dra vavolombelon'ireo raha-bitan'i Jesosy aby, tagny amigny taninigny Jiosy vo tany Jerosalema. Nivonon'ereo izy tamigny haza, ⁴⁰ fa Zagnahary nananga anazy tamigny andro fahatelo dra nanao ze hahita anazy, ⁴¹ sy reo olo aby, fa reo vavolombelo ze voafilin'Agnahary meloha- tamisik ze nihina vo nino niaraky taminazy tafaranigny nisanganany tamigny maty. ⁴² Nandidy anay izy ba hitalily amigny olo vo hizoro vavolombelo fa izy raiky gny nifilin'Agnahary ho pisaranigny velo vo gny maty. ⁴³ Ho anazy gny hizoroany paminany aby vavolombelo, dra ho reo ze mino anazy gny hitakasy famela-keloky amigny alalanigny agnarany. ⁴⁴ Raha bo nizaka anizay raha zay i Petera, dra nilasaky tamireo ze niteno gny hafany gny Fagnahy Masy. ⁴⁵ Reo olo tao agnatinigny vondronigny pino voatapak'ireo ze niaraky tamin'i Petera aby-dra gaga, akory gny fagnomezanigny Fagnahy Masy dra narosaky ho anigny Jentilisa avo koa. ⁴⁶ Fa ren'ereo reo Jentilisa ze mizaka amireo fizaka hafa makalaza an'Agnahary. Dra namaly Petera ho: ⁴⁷ Moa ra misy olo afaky mita rano ba sy hanova batisa anereo, reo olo ze nitakasy gny Fagnahy Masy manahaky asika ? ⁴⁸ Dra nandidy anereo ba hatao batisa amigny agnaran'i Jesosy Kristy izy. Dra nangataky anazy ereo ba hitoby hiaraky amin'ereo mandrisy gny andro siapy.