¹ Dra nirehisy tamin'Israely ndraiky gny fahorian'i Yaveh, dra nataony nanohisy anereo i Davida nanao anizahoky ho: "Mandehana, isaho gny Israely vo gny Joda." ² Nizaka tamin'i Joaba pifehy gny tafiky, ze nindray taminazy gny pazaka ho: "Mandehana manera gny fokon'Israely aby, manomboky agny Dana dra hatragny Beri-sheba, dra isaho gny olon'aby, ba hahafatarako gny fitambaranigny isa'ireo lelahy sahaza ho anigny aly." ³ Hoy i Joaba tamigny pazaka ho: "Afaky mapitombo gny isanigny vahoaky izato ra Yaveh zagnaharinao, dra afaky magnety gny fitrangan'izay ra gny masonigny pazaka topoko. Nefa nagnino gny magniry anizay gny pazaka topoko?" ⁴ Na dre izay aza, gny zakanigny pazaka dra nanohisy an'i Joaba vo nanohisy reo pifehy gny tafiky gny farany. Dra niboaky teo amigny fagnatrehanigny pazaka i Joaba vo reo pifehy ba hagnisa gny vahoakin'Israely. ⁵ Nisaky an'i Jordana dra nitoby tao agnilan'i Aroera, asimonigny tana agny an-dohasaka ereo. Dra nandroso hatragny Gada dra hatragny Jazera ereo. ⁶ Avy tagny Gieada vo tagny amigny tanin'i Tatima-hodsy ereo, boak'eo dra tagny Danajana dra nagnodidy hatragny Sidona. ⁷ Avy tagny amigny ferova mafin'i Tyro vo gny tananigny Hivita vo gny Kananita aby ereo. Boak'eo dra niboaky nagnagny Negeva agny Joda ao Beri-sheba ereo ⁸ Dra gny fa avy nizaka gny tany aby ereo, dra nihery tagny Jerosalema ereo tamigny faranigny sivy vola sy ropolo andro. ⁹ Dra nitatisy gny fitambaran'isan'ireo lelahy pialy tagny amigny pazaka i Joaba. Nisy lelahy be heri-po 800.000 ze nagnasoaky sabasy tao amin'Israely, dra reo lelahin'i Joda dra lelahy 500.000. ¹⁰ Dra napahory anazy gny fon'i Davida gny fa boaky nagnisa reo lelahy izy. Dra nizaka tamin'i Yaveh izy ho: "Nagnato tateraky tamigny fanovan'anizay zaho. Aomao, ry Yaveh, alao gny heloky gny panoponao, fa nanao fahadala vatany zaho." ¹¹ Gny fa nifiha i Davida gny maray, dra avy tamin'i Gada paminany, pahitan'i Davida gny zakan'i Yaveh, nanao anizahoky ho: ¹² "Handeha zakao amin'i Davida ho: 'Izao gny zakan'i Yaveh:"Magnome safidy telo anao Zaho. Dra mifilia raiky amireo.""' ¹³ Dra nagnagny amin'i Davida i Gada dra nizaka taminazy ho: "Mosary telo tao ra gny ho avy aminao ao amigny taninao? Sa hienga telo vola reo fahavalonao ra hanao raha magneziky anao ereo? Sa hisy areti-mandringa telo andro ao amigny taninao? Amizao manapaha hevisy gny amizay valiny vatany haviliko Anazy gny nagniraky anahy." ¹⁴ Dra hoy i Davida tamin'i Gada ho: "Ao agnaty fikorotagna tateraky zaho. Aoky isika ho lavo eo agnatrehan'i Yaveh manahaky ze eo atagnanigny olo, akory tena lahibe gny famindra-pony. ¹⁵ Dra nandefa gny areti-mandringa teo amin'Israely nanomboky gny maray dra hatramigny fotoa voatondro i Yaveh, dra olo fito aly gny maty nanomboky tao Dana dra hatragny Beri-sheba. ¹⁶ Gny fa nanizisy gny tagnany nagnagny Jerosalema ba hamotiky anizay gny azely, dra niova hevisy nohonigny rasy ze haterak'izay Yaveh, dra nizaka tamigny azely ze namotiky gny olo Izy ho: "Apy zay! Ahemory gny tagnanao amizao." Tamin'io fotoa io gny azelin'i Yaveh dra nisanga teo apamoloan'i Araona Jebosita. ¹⁷ Dra nizaka tamin'i Yaveh Davida gny fa nahita gny azely namely gny vahoaky, dra nanao anizahoky ho: "Fa nanota zaho, dra rasy fitondra-tegna. Nefa reo agnondry reo, ino gny nataony?" Aoky re ba zaho vo gny akohonan-drako gny ho sazinigny tagnanao!" ¹⁸ Boak'eo dra avy teo amin'i Davida tamin'io andro io i Gada dra nizaka taminazy ho: "Mekara dra mamboara alitara ho an'i Yaveh eo apamoloan'i Araona gny Jebosita." ¹⁹ Dra niakasy araky ze nandidian'i Gada anazy hataony Davida, araky ze nandidian'i Yaveh. ²⁰ Nagnety tagny ivelany Araona dra nahita gny pazaka vo reo ponopony nagnato. Dra niboaky i Araona dra napekohaky gny tavany teo amigny tany teo amigny pazaka. ²¹ Dra hoy i Araona ho: "Nagnino gny avy teo aminahy, panopony, gny pazaka topoko?" Namaly i Davida ho: "Hivily gny famoloanao, ba hahafahako mamboasy alitara ho an'i Yaveh, ba helanigny areti-mandringa eo amigny vahoaky." ²² Hoy i Araona tamin'i davida ho: "Atovy manahaky gny anao zay, ry pazaka topoko. Atovy amizay ze soa eo amasonao. Ingo, tahoky misy agnomby atao fagnatisy oroa vo fivelezam-bary dra ziogan'agnomby atao hita. ²³ Reo aby reo, ry pazakako, zaho, Araona, dra hagnome anao anizay." Dra hoy izy tamigny oazaka ho: "Hagneky anao anie Yaveh Zagnaharinao." ²⁴ Hoy gny pazaka tamin'i Araona ho: "Aha, hoviliko amigny valiny zay. Sy hanolosy fagnatisy oroa ho an'i Yaveh amigny raha ze sy nisasarako zaho." Ko nivilin'i Davida sekely volafosy dimapolo gny famoloa vo reo agnomby. ²⁵ Namboasy alitara ho an'i Yaveh tao i Davida dra nanolosy fagnatisy oroa vo fagnati-pihavana teo amizay. Dra nitalaho tamin'i Yaveh ho anigny tany ereo, dra napisahasy gny areti-mandringa nanera an'Israely izy.