¹ Nihira ho an'i Yaveh reo tegny amity hira tihoky tamigny andro ze nagnavotan'i Yaveh anazy teo atagnan'ireo fahavalony aby, vo teo atagnan'i Saoly i Davida. ² Nivavaky izy ho: "Yaveh gny vatolapiko, ferova mafy honahy, gny raiky ze mamozy anahy. ³ Zagnahary gny vatolapiko. Mialoky eo aminazy zaho. Iza gny ferovako, gny tandroky gny famozena anahy, ferova mafy honahy, vo felofako, gny raiky ze mamokasy anahy amigny herisetra. ⁴ Hitoka an'i Yaveh, ze mendriky gny ho dera zaho, dra ho avosy amireo fahavaloko zaho. ⁵ Fa nagnodidin'anahy reo aloky gny fahafatesa, nanafosy anahy reo rano mikorianigny fahapoteha. ⁶ Nagnodidin'anahy reo talinigny fiegna sy hita; namandriky anahy reo fandriky gny fahafatesa. ⁷ Tamigny fahoriako gny nisoahako an'i Yaveh; nitoka an'Agnahary zaho; nahare gny feoko boak'ao atepoliny Izy, dra avy teo asofony gny aso voziko. ⁸ DRa nihozo vo nihovosy gny tany. Nihovisovisy vo voahozongozo gny fioregnanigny lagnisy, akory ory zagnahary. ⁹ Niakasy boak'amigny vavorony gny hota, dra afo mirehisy gny niboaky boak'amigny vavany. Voarehis'izay gny bak'afo. ¹⁰ Nanokaky gny lagnisy Izy dra niboaky. dra gny ezi-pito tao ambany faladiany. ¹¹ Nitikisy Kerobima Izy dra nitily. Hita tegny agnelasy gny rivosy Izy. ¹² Nataony ho lay nagnodidin'anazy gny ezi-pito, namory rahon'ora selasela tegny amireo habakabaky izy. ¹³ Boak'amigny helasy teo agnatrehany gny nilasahanigny bak'afo. ¹⁴ Yaveh napangotroky boak'andagnis'agny. Nikioky fatrasy gny Avo indridra. ¹⁵ Nandefa zana-sipiky Izy dra napiely reo fahavalony__nandefa helasy mazava dra naparitany. ¹⁶ Boak'eo dra niseho gny faso-drano; niharihary tamigny hiakan'alin'i Yaveh gny fanambanin'izao totolo izao, tamigny fipoahanigny fofon'ainy vavorony. ¹⁷ Nizoso boak'agny ambiny Izy; nihazo fatrasy anahy izy! Nisiton'anahy tamigny fahavaloko matazaky Izy, tamireo ze nalaiky anahy, akory natazaky izy reo taminahy. ¹⁹ Avy nanohisy anahy ereo tamigny andro-pahoriako, kanefa Yaveh gny panohan'anahy. ²⁰ Namoaky anahy ho agny amigny toera midadasiky avo koa izy. Namozy anahy Izy akory faly taminahy. ²¹ Fa namaly soa anahy tamigny refinigny fahamarignako Yaveh; fa nagnerin'anahy tamigny loniny tamigny refinigny fahadiovanigny tagnako Izy. ²² Fa nitandry reo lalan'i Yaveh zaho dra sy ba nanao ze rasy tamigny fela tamigny Zagnahariko. ²³ Akory reo didiny marin'aby dra fa teo anoloako; raha gny amireo lalany ndraiky dra sy nivily tamireo zaho. ²⁴ Fa sy nana-signy teo agnatrehany avo koa zaho, dra nitandry gny vatako sy hanota zaho. ²⁵ Noho zay dra naherin'i Yaveh tamigny loniny tamigny refinigny fahamarignako zaho, tamigny refinigny fahadiovako teo amasony. ²⁶ Ho anigny raiky ze matoky, mapiseho gny vatanao ho matoky hanao; ho anigny olo ze sy mana-signy, dra mapiseho gny vatanao ho sy mana-signy hanao. ²⁷ Amigny malio dra mapiseho gny vatanao ho malio hanao, fa mivaliky amireo piolakolaky hanao. ²⁸ Magnavosy reo olon'Ory hanao, nefa reo masonao dra manohisy gny pirehareha, dra ahetrinao izy raiky. ²⁹ Fa hanao gny faniloko, ry Yaveh. Magnazava gny aiziko Yaveh. ³⁰ Fa noho hanao dra afaky mihazakazaky mihoasy gny saka zaho; noho gny zagnahariko dra afaky mandinga rindry zaho. ³¹ Raha gny amin'Agnahary, tateraky gny lalany. Malio gny zakan'i Yaveh. Izy dra ferova ho anireo ze mialoky eo aminazy. ³² Fa iza gny zagnahary afa-sy Yaveh, dra iza gny vatolapy afa-sy gny Zagnaharisika? ³³ Zagnahary gny felofako, dra mitariky gny olo sy mana-signy amigny lalany Izy. ³⁴ Mapalaky gny tombony manahaky gny diera Izy dra mametraky anahy rgny amigny havoa abo. ³⁵ Magnazasy gny tagnako amigny aly Izy, vo gny sandriko hamorisy sipiky varahy. ³⁶ Fa nagnome anahy gny felofanigny famozenao hanao, dra gny sitrakao gny nanao anahy ho lahibe. ³⁷ Fa nanao toera midadasiky ho anigny tomboko teo ambaniko hanao, dra sy nobolisasy gny tomboko. ³⁸ Nagnitriky reo fahavaloko zaho dra namotiky anereo. Sy nihery zaho mandra-pahapotik'ereo. ³⁹ Nandevon' anereo vo namotipotiky anereo zaho; dra sy afaky nisangan'anereo. Lavo tao ambany faladiako ereo. ⁴⁰ Nametraky hery tao aminahy manahaky gny fehitroky ho amigny aly hanao; nametraky reo ze nisanga hanohisy anahy teo ambaniko hanao. ⁴¹ Nagnome anahy gny hatok'ireo fahavaloko hanao; nandringa reo ze nalaiky anahy zaho. ⁴² Nitoka vozy ereo, saiky sy nisy nagnavosy anereo, nitoka an'i Yaveh ereo, saiky sy namaly anereo Izy. ⁴³ Namaly anereo ho singa madiniky manahaky gny botany amigny tany zaho, nitorotoroko manahaky gny fotaky egny amigny lalan'ereo. ⁴⁴ Fa namozy anahy tamigny fifandiran'ireo vahoakoavo koa hanao. Fa nitananao ho lohan'ireo firenena zaho. Gny vahoaky ze sy fataso dra manopo anahy. ⁴⁵ Nitere hekohoky taminahy reo vahiny. Vatany vo nahare gny momba anay ereo, dra nakato anahy. ⁴⁶ Reo vahiny dra noboaky apatahora tao amigny ferova mafin'ereo. ⁴⁷ Velo i Yaveh! ho deraina anie gny vatolapiko. Asandratra anie Zagnahary, ilay vatolapin'ny famozena anahy. ⁴⁸ Izay gny Zagnahary izay magnatateraky famaliana hon'ahy,ilay raiky izay mapihetry vahoaky maro eo ambaniko. ⁴⁹ Magnafaky anahy amin'ireo fahavaloko izy. Nanandrasy anahy ho agnabon'ireo izay nisanga hanohisy anahy tokoa izy. Mamozy anahy amin'ireo lelahy mahery setra hanao. ⁵⁰ Noho izay dra hanolosy fisora ho anao, eo amin'ireo firenena zaho, ry Yaveh; hihira fiderana ho an'ny agnaranao zaho. ⁵¹ Zagnahary nagnome fandresena lahibe ho an'ny pazakany, dra mampiseho gny sy fivaliha-pagnekeny amin'ilay voahosony, izy ho an'i Davida vo ho an'ny taranany mandrakizay.''