¹ Nivavaky i Hana dra nanao anizahoky ho: "Gny foko mifaly ao amin'i Yaveh. Gny tandroko misandrasy amin'i Yaveh. Gny moloso mirehareha manoloa reo fahavaloko, akory mifaly aminigny famozenao zaho. ² Sy misy masy manahaky an'i Yaveh, fa sy misy hafa akoas'anao; sy misy vatolapy manahaky gny Zagnaharisika. ³ Ka mirehareha loasy sasy; aoky sy haloakigny vavanao gny fiavognavogna. Fa Yaveh gny Zagnahariny gny Fahalala; aminigny alalany gny handaza gny asa. ⁴ Gny sipikan'ireo lelahy mahery dra tapaky, fa reo tafitohy koa dra misiky hery manahaky gny fehitroky. ⁵ Reo ze visy dra nikarama mofo; reo ze resy dra nisahasy taminigny haresia. Na gny momba aza miteraky fito, fa gny apela managnanaky maro koa dra mivalaketraky. ⁶ Yaveh gny mahafaty vo minday ho aminigny fiegna. Izy gny mapizoso agny aminigny fiegna sihita vo mapisanga. ⁷ Yaveh gny mapahatra gny olo ilany vo mapanandraha gny ilany. Mapietry Izy, nefamapisondrosy avo koa. ⁸ Mapitraka gny mahatra hiala aminigny voviky Izy. Mapisandrasy gny ory hiala aminigny lavenoky ba hanoby anereo miaraky aminigny andriandahy dra handova gny sezam-boninahisy. Gny andrinigny tany aby dra an'i Yaveh vo teo anireo gny nametrahany an'izao totolo zao. ⁹ Hambenany gny tomboky gny olony matoky, fa gny rasy fagnahy dra hapanginy agny aminigny aizipito, akory sy misy handresy aminigny hery. ¹⁰ Reo ze mznohisy an'i Yaveh dra ho potipotiky; hapangotroky ora boak'agny andagnisy hanohisy anereo Izy. Yaveh gny hisara gny faranigny tany aby; hagnome hery gny pazakany Izy dra hanandrasy gny tandrok'igny voahosony." ¹¹ Boak'eo i Elkana dra nagnagny Rama, tagny atragnony. Nanopo an'Anagnahary teo aminigny fagnatrehan'i Ely pisoro gny zaza. ¹² Dra lelahy rasy fagnahy reo zanadahin'i Ely. Sy nahay an'i Yaveh ereo. ¹³ Gny fanaonigny pisoro mindray amireo vahoaky gny fa nisy lelahy nanolosy soro, dra magnato gny panoponigny pisoro dra minday fizaisy telo rasa egny atagnany, raha bo mandevy gny hena. ¹⁴ Hasindrony ao agnatiny gny lasisy zay, na fahandroa hena, na vilagny, na vilagnibe. Reo aby azonigny fizaisy ao dra alanigny pisoro honazy. Nataon'ereo tao Silo nindray tamireo Israelita aby ze avy tao zay. ¹⁵ Rasy lavisy aza, melohanigny nagnoroan'ereo gny zabora, dra tamy gny panoponigny pisoro, dra nizaka taminigny lelahy ze nanao gny soro ho: "Omeo hena ho asasiky gny pisoro, fa sy hagneky hena nahandro boak'aminao izy, fa gny mata avo." ¹⁶ Raha mizaka aminazy gny lelahy ho, "sy maisy oroan'ereo aloha gny zabora, dra aveo draafaky mangalajy maro araky ze tianao hanao." Dra valiany ho: "Aha, fa omenao zao amizao avo zay; fa raha sy zay, dra halako akeriny zay." ¹⁷ Lahibe dra lahibe vatany gny siakireo tovolahy manoloa an'i Yaveh, akory nataon'ereo sinosino gny fagnatisy an'i Yaveh. ¹⁸ Fa i Samoela dra nanopo an'i Yaveh raha bo zaza nekazo efoda zamala fosy. ¹⁹ Namboaran-dreniny akazo lava masaiky izy dra nandesiny honazy isatao isatao zay, gny fa niakasy nindray taminigny valiny ba hanolosy gny fagnatisy fanao isatao izy. ²⁰ Dra Ely nisondrano an'i Elkana vo gny valiny dra nizaka nanao anizahoky ho: "Hagnome anao zaza maro amity apela ty anie Zagnahary nohonigny fangataha ze nataony tamin'i Yaveh." Boak'eo dra nihery tagny atragnony ereo. ²¹ Nagnapy an'i Hana ndraiky i Yaveh, dra nitoe-zaza ndraiky izy. Niteraky telo lahy vo apela ro izy. Nandrisy zay fotoa zay, dra nitombo teo agnatrehan'i Yaveh i Samoela zaza. ²² Dra fa atisy i Ely; reny avokoa ze nataon'ireo zanadahiny aby taminigny Israely aby, vo gny nandrian'ereo nindray taminigny apela ze nanopo eo aminigny fidira ao aminigny fihigna. ²³ Hoy izy tamin'ereo: "Fa magnino handrareo gny manao raha manahaky anizao?Fa reko taminigny olon'aby avokoa gny raha rasy nataondrareo. ²⁴ "Aha, ry zanako; sy tatisy soa gny reko. Mahavy gny vahoak'i Yaveh sy hakato andrareo. ²⁵ "Raha misy olo raiky manota aminigny raiky hafa, dra hosaran'Agnahary izy; fa raha misy lelahy raiky monota amin'i Yaveh, iza gny hisolo vava anazy ?" fa sy hiteno gny feonigny rany ereo, akory Yaveh fa nikasa gny hahafaty anereo. ²⁶ Nihalahibe i Samoela zaza, dra nitombo fitia tamin'i Yaveh vo taminigny olon'avokoa. ²⁷ Dra nisy lelahinagnahary raiky nagnaton'an'i Ely dra nanao taminazy ho: "Zao gny nizakan'i Yaveh, 'Sy fa napiseho gny vatako taminao taminigny havan'ireo gny razambenao ra zaho, raha bo tagny Egypta taminigny fanandevozanigny havan'i Farao ereo? ²⁸ Nifiliko tagnatin'ireo fokon'Israely aby izy ba ho pisoroko, ba hagnoro gny litikazo magnisy, ba hekazo efoda manoloa anahy. Nameko ho anigny taranaky gny razambenao reo fagnatisy aby nataonigny vahoaky Israely taminigny afo. ²⁹ Nagnino moa, hanao gny manirasira reo soro vo fagnatiso ze nitakiko ho eo aminigny toera fonegnako? Nagnino gny amenao voninahisy mihoasy anahy aminigny soa faratapony boak'aminigny fagnatisy vahoakin'i Israely aby gny zanako?' ³⁰ Fa Yaveh, Zagnaharin'Israely, mizaka ho: 'Napanatena zaho fa gny taranako, vo gny havanigny razam-benao, drahandeha eo agnatrehako mandrakizay.' Nefa amizao koa dra hoy Yaveh: 'Sagnatria aminahy gny hanao anizay, ze magnome voninahisy anahy gny homeko voninahisy, fa ze manao sinosino anahy koa gny ho sinosiniaviko. ³¹ Ingo, ho avy gny andro ze hanapahako gny herinao vo gny herinigny havanigny razambenao, dra sy hisy lelahy ho trasy atisy sasy aminigny taranakao. ³² Hahita fahoria egny amize toera honenako hanao. Na dra ome soa aza gny Israely, dra sy hisy lelahy ho trasy atisy sasy aminigny taranakao. ³³ Gny ilany amireo ze sy halako aminigny alitarako, dra hataoko pahina gny masondrareo, dra haavy alahelo gny aminigny fiegnandrareo zaho. Reo lelahy aby ze teraky ao aminigny havandrareo dra ho maty. ³⁴ Zao gny famatara ho anao ze hazzo gny zanako ro lahy, amin'i Hofinia vo Finehasa: Samby ho maty aminigny andro raiky izy mirahalahy reo. ³⁵ Hananga pisoro matoky ho anigny vatako ze hagnatateraky gny ao apoko vo gny ao aminigny fagnahiko zaho. Hagnory tragno azo atoky honazy zaho; dra handeha eo anoloanigny pazaka ze voahososy mandrakizay izy. ³⁶ Ze sisa tavela aminigny taranakao aby dra ho avy dra hekohoky eo aminazy, hangataky somby volafosyvo mofo, dra hizaka ho: "Ba tendreo re zaho isanigny raiky amireo pisoronao re zaho ba hahafahako mihina tapa-mofo raiky.""'