¹ Mitalily ty mare ao amy Kirisity raho. Tsy mavande raho, naho ty eretrereko ro vavolombelo miarake amiko ao amity Fagnahy Masy, ² fa ahy le misy alahelo bey naho fijalea tsy mitofa ampoko ato. ³ Fa afake nagniry raho fa zaho vatako le ho voa ozo ka hihatake amy Kirisity naho ty amireo rahalahiko, reo ze raike raza amiko arake ty nofo. ⁴ Iereo le Israelita. Iereo le mana fanangana, ty hasy, reo fagnenkea, ty fagnomeane ty lily, ty fiantsa an'Agnahare, naho reo fampagnategna. ⁵ Ty ahy iereo le reo raza ze nahavy Kirisity ho lasa nofo, Re ty Zagnahare ambone iaby iaby. Ho antsae zisikagne anie Re. Amena. ⁶ Fa tsy foa reo ze nampagnategnan'Agnahare. Fa tsy iaby ze bakagne Israely ro vatane ahy Israely. ⁷ Ndra reo foko Abrahama iaby ro vatane anane. Fa:" Amity alala Isaka ro hikaiha reo fokonao." ⁸ Zane hoe, reo ana ty nofo le tsy anan'Agnahare ro raese ho foko. ⁹ Fa hoe zao ro rehake ty fampagnategna:" Amize andro zay le hoavy Raho, naho hagnomea ajalahy Saraha." ¹⁰ Tsy zay avao, fa bakeo kea Rebeka hanagnanake amity lahilahy raike, Isaka raentika_ ¹¹ fa mboe tsy terake kea reo kolo naho mboe tsy nanao zaka soa ndra raty, mba ho hoe ty dinen'Agnahare arake ty fifilia, tsy naho reo asa, fa naho Re te mikaike_ ¹² natalily tamin-drampela ty hoe:"Ty raokene le hanompo ty zaine." ¹³ Zay le manahake ze voasoratre ty hoe:"Jakoba teako, fa Esao hejeko." ¹⁴ Ino are ro ho rehafeko? Misy tsy hamareane vao miarake amin'Agnahare? ¹⁵ Tsy hisy vatane anie zay. Fa hoe Re tamy Mosesy ty hoe:"Handefetre amize teako handefera raho, naho hiferegnay reo ze teako hiferenaigna Raho." ¹⁶ Laha zao are, le tsy naho re mikasa zay, ndra naho re milailay, fa naho Zagnahare, te nanoro ty fandefera. ¹⁷ Fa ty Soratre Masy nagnambara tamy Farao ty hoe:" Fa naho ze antone zay ro nagnakarako anao, mba hanoroako aminao ty hereko, naho mba hagnambara ty agnarako eran-tane." ¹⁸ Laha zao, Zagnahare le mandefetre amize teane, naho ze teane, ro ho hamafese ty arofo. ¹⁹ Bakeo hitalily amiko nareo ty hoe:"Nagnino ro mboe mahita tsiny avao Re?" Fa ia ro mahalietre ty sitrampone?" ²⁰ Mifanohetre amizay, ralahilahy, ia vao riha ro mamale mandietre an'Agnahare? Feie ze le fa nidinehe hitalily amity mpandineke zay ty hoe:" Nagnino ro nataonao hoe izao raho?" ²¹ Feie ty mpanefe valagne tsy mana zo amity tanemnaga ka ty vongane raike avao ro hagnamboara fitoera amity andro voatoka, naho fitoera raike hafa amity andavan'andro? ²² Akore laha Zagnahare, te tehanoro ty helone vaho hampahay ty fahefane, ro niaretre tamim-pahareta reo fitoera ty heloke vinogno ho amity fahasimba? ²³ Akore laha nataone zay mba hampahaiane ty harea ty hasine eo amireo fitoera ty fandefera, te le fa vinogno aloha ho amity hasy? ²⁴ Akore laha nataone ho antika kea zay, te kinaine avao kea, tsy ho eo amity sambe Jiosy avao, fa ho eo amity Jentilisa avao kea? ²⁵ Arake ze nirehafene tao amy Hosea avao kea ty hoe:"Hataoko ty hoe ndatiko ze tsy ndatiko, naho ty hoe malala ty tsy malala. ²⁶ Bakeo le agne amize nirehake tamiereo ty hoe:' Tsy ndatiko nareo,' agne ro hikaiha iereo ty hoe:' anan'Agnahare velo."' ²⁷ Isaia nikaike mafe ty amy Israely ty hoe:"Laha manahake ty faseke egne amity riake ty isa ty ana Israely, le ho voa vonje ze sisa tavela, ²⁸ fa ty handay ty safane eto antane, feno naho tsy ho ela." ²⁹ Arake ty nirehafe Isaia aloha ty hoe:"Laha ty Tompo tompo ty maro ro tsy nagnenga foko hoantika, le hanahake Sodoma tika, naho ho hanahake i Gomora." ³⁰ Ino are ro horehafentika? Fa reo Jentilisa, ze tsy nipay ty hamarea, ro nahazo ty hamarea, te hamarea bakamity finoa. ³¹ Fa Israely, te nipay ty lily ty hamarea, le tsy niavy tamizay. ³² Nagnino vao? Satria iereo tsy nipay zay tamity finoa, fa tamity asa. Tafintohy ty vato ty fagnafintohina iereo, ³³ arake ze le fa voasoratre ty hoe:"Henteo, ao Ziona ro ametrahako ty vato ty fagnafintohina vaho vato ty fandikan-dily. Ze mino zay le tsy ho megnatre."