¹ Laha zao le tsy mana fialan-tsiny riha, ry ndaty, riha ty mitsara, fa ze itsaranao ty hafa ro imelofanao ty rehanao. Fa riha ze mitsara le manao reo avao kea. ² Nefa haintika fa ty fitsaran'Agnahare le arake ty made laha fa mitonta amireo ze manao zaka manahake reo zay. ³ Fa dineho zao, ry ndaty, riha ty mitsara reo ze manao zaka manahake reo le manao hoe rey kea aza riha. Hilay ty fitsaran'Agnahare vao riha? ⁴ Sa maivagnenao ty harea ty hasoam-pagnahine, ty fandeferane, naho ty faharetane? Tsy hainao vao fa ty hasoam-pahine le natao hitarike anao amity fibebaha? ⁵ Fa zay le ho amity habey ty hamafe vaho tsy fibebaha ty arofonareo ro amorianareo heloke hoahy ty vatanareo amity andro ty heloke, zay le, ty andro ty fanoroa ty fitsara maren'Agnahare. ⁶ Hamale ty ndaty iaby amity fatra mitovy amireo nataone Re: ⁷ hagnomea arake ty fahareta, ty asa soa mipay laza, hasy, ty tsy fifateza, havelo zisikagne Re. ⁸ Fa hoahy reo ze mipay hoahy ty vatane, ze tsy magnenke ty mare fa magnenke ty tsy hamarea, le ho avy ty heloke vaho ty falakia. ⁹ Zagnahare le handay fijalea vaho fahantra amity fagnahy ty ndaty iaby ze nanao raty, amity Jiosy aloha, naho amity Grika avao kea. ¹⁰ Fa ansta, laza, naho fiadagna ro hoavy amiereo ze manao ty soa, amity Jiosy aloha, naho amity Grika avao kea. ¹¹ Fa tsy misy vande miarake amin'Agnahare. ¹² Fa iaby ze nanonta tsy nana ty lily lo ho robake tsy mana lily avao kea, naho iaby ze nanonta niarake tamity fagnaja ty lily le ho tsarae arake ty lily. ¹³ Fa tsy reo mpaharey ty lily ro mare eo agnoloan'Agnahare, fa reo ze manao ty liline ro nihamaregne. ¹⁴ Fa reo Jentilisa, ze tsy mana ty lily, laha fa manao ty zaka miomba ty lily arake ty voanjagnahare, le iereo ro lily hoahy ty vatane, ndra le tsy mana ty lily aza iereo. ¹⁵ Amizay ro nanoroa iereo fa ty asa angatahe ty lily le voasoratre ao agnarofo iereo. Ty dine iereo avao kea le vavolombelo hoahy iereo, naho ty say iereo avao le ndra magnameloke ndra miaro iereo amity vata iereo ¹⁶ naho kea amin'Agnahare. Zay le hiseho amity andro ze hitsaran'Agnahare reo tsiambaratelo ty ndaty iaby, arake ty zaka-soako, amity alala Jesosy Kirisity. ¹⁷ Fa laha ohatre ka Jiosy ro hikaihanao ty vatanao naho mianky amity lily vaho mirehareha ao amin'Agnahare, ¹⁸ naho mahay ty sitrampone vaho mamantatre ze zaka soa vatane satria nampianare tamity lily riha; ¹⁹ naho laha ohatre ke rese lahatre riha fa ty vatanao le mpitarike ty goa, hazava hoahy reo ze ao amity ieke, ²⁰ mpagnity ty gege, mampianatre ty kolo, naho anagnanao ao amity lily ty toera ty fahaia vaho ty mare, le akore zay ro hatao zay amity fomba hivelognanao ty fiaignako? ²¹ Naho riha ze mampianatre reo ilane, tsy mampianatre ty vatanao vao riha? Riha ty mitory mandietre ty halatre, mangalatre vao riha? ²² Riha ty mirehake fa tsy tokone hitsangatsanga, mitsangatsanga vao riha? Riha ze malay ty sampe, manimba ty tempoly vao riha? ²³ Riha ze fale mirehareha ao amity lily, magnafa-baraka an'Agnahare vao riha amio fandikanao ty lily io? ²⁴ Fa" ty agnaran'Agnahare le fa afa-baraka teo amireo Jentilisa naho nareo avao," arake ze le fa voasoratre. ²⁵ Fa mahazo tombone amity savatre vatane nareo laha ohatre ka magnenke ty lily, fa laha mandika ty lily nareo, le lasa tsy voa-savatre aza nareo. ²⁶ Arake zay, laha ndaty tsy voa-savatre ro miambe ze paie ty lily, tsy hatao ho agnate ty voa-savatre vao re ndra le tsy voa-savatre aza? ²⁷ Naho tsy ho bey ty raike ze tsy misavatre ara-boanjagnahare vao nareo laha ohatre ka miambe ty lily voasoratre vaho ty savatre nareo, nefa mboe mandika ty lily! ²⁸ Fa re le tsy Jiosy amity toerane ambalike; ndra amity savatre ze miseho amity toerane ambaly ty nofo avao. ²⁹ Fa re le Jiosy ty agnatene ao, naho ty savatre te ahy ty arofo, ao amity Fagnahy, fa tsy ao amity soratre. Ty fiantsa ty ndaty manahake zay le tsy bakamity ndaty fa bakamin'Agnahare.