¹ Raeso ndra zay iaby maleme amity finoa, ko mitsara miomba ty tohan-kevetre. ² Ty ndaty raike mana finoa hihina ndra ino ino, fa ty raike hafa ze amleme letsy hihina laha-tsy voa-kentae. ³ Ao ze mihina ty zaka-raty tsy hagnaraty ze tsy mihina iaby iaby; naho ze tsy mihina ty zaka-iaby kea tsy hitsara ze hafa mihina iaby iaby. Fa Zagnahare le nagnenke aze. ⁴ Ia moa riha, riha ze mitsara ty mpanompo ty ndaty hafa? Eo agnoloa ty tompone re ro mitsanga ndra mitonta. Fa hatsanga re, satria ty Tompo le afake mananga aze. ⁵ Ty ndaty raike le midineke fa misy ty andro soa naho ty iaby. Ty hafa kea le midineke fa mitovy ty andro iaby. Engao ty kirai-kiraike ho rese lahatre arake ty saine iaby. ⁶ Ze mandineke ty andro, le mandineke zay hoahy tompo; naho ze mihina, le mihina hoahy tompo, fa misaotre an'Agnahare re. Ze tsy mihina, le mifaly-hane hoahy tompo, ie avao kea le misaotre an'Agnahare. ⁷ Fa tsy misy miay hoahy ty vatane tika, naho tsy misy mate hoahy ty vatane. Fa laha mivelo tika, le velo hoahy tompo, naho laha mate, le mate hoahy tompo. Arake zay ndra belo tika ndra mate, le ahy tompo. ⁹ Fa hoamize antone zay ro nahafate Kirisity naho nivelognane ndraike, mba hahavy Aze ho vaho tompo ty mate ro tompo ty velo. ¹⁰ Fa riha, nagnino riha ro mitsara ty rahalahinao?Naho riha, nagnino riha ro malay ty rahalahinao? Fa tika iaby le mboe hitsanga ho tsarae eo agnoloa ty seza fitsaran'Agnahare. ¹¹ Te le fa voasoratre ty hoe:"Laha mboe velo kea raho."hoe ty Tompo,"le hiforetre agnoloako eo ty ongotse iaby, naho ty lela iaby le hiantsa an'Agnahare." ¹² Laha zao are, tika kirai-kiraike iaby le hanao talily ty vatane eo amin'Agnahare. ¹³ Ka, ao tika tsy hifampitsara sase, fa kea handily zao, mba tsy hisy hametrake vato manafintohy ndra fandrike hoahy ty rahalahine. ¹⁴ Mahay raho naho rese lahatre ao amy Tompo Jesosy, fa tsy misy tsy malio amity vatane. Fa hoahy ze mandrae ndra ino ino ho tsy malio zay, le tsy malio zay ho aze. ¹⁵ Satria laha malahelo naho ty amity sakafo ty rahalahinao, le tsy mandeha amikan-tea sase riha. Ko simbae naho ty amity sakafonareo reo ze namoeza kirisity ty arofone. ¹⁶ Ka ko mamototre ze dinehenareo ho soa ho haratie. ¹⁷ Fa ty fanjakan'Agnahare le tsy mboe ty sakafo vaho rano finome, fa miomba ty hamarea, fiadagna, naho hafalea ao amity Fagnahy Masy. ¹⁸ Fa ze manompo Kirisity arake zay le tean'Agnahare vaho enkene ty ndaty. ¹⁹ Laha zao, ao tika hanohy reo zaka ty fiadagna vaho reo zaka ze manefe ty kirai-kiraike iaby. ²⁰ Ko simbaeo naho ty amity sakafo ty asan'Agnahare. Malio vatane ty zaka iaby, fa raty hoahy ty ndaty ze mihina aze naho mahavy aze ho tafintohy. ²¹ Soa ty tsy mihinan-kena, ndra mino divay, ndra ty zaka iaby ze mete hanafintohy ty rahalahinao. ²² Ty finoa anagnanao, tano ao aminao vaho Zagnahare. Sambatre ze tsy meloke ty vatane amize enkene. ²³ Ze misalasala le meloke laha mihina, satria tsy tamity finoa zay. Naho ndra ino ino tsy bakamity finoa le hadisoa.