¹ Ry rahalahy, ty paie ty arofoko vaho ty angataheko amin'Agnahare hoahy iereo, le ty famonjea iereo. ² Fa mitsanga vaolombelo miomba iereo raho fa mafana-arofo ho an'Agnahare iereo, nefa tsy arake ty fahaia. ³ Fa tsy mahay ty hamarean'Agnahare rey, naho mipay hametrake ty hamarea iereo arere. Tsy magnenke ty hamarean'Agnahare rey. ⁴ Fa Kirisity ro fanoa ty lily ho hamarea ho iaby ze mino. ⁵ Fa Mosesy manoratre miomba ty hamarea te bakamity lily ty hoe:" Ty ndaty ze manao ty hamarea ty lily le ho velo amize hamarea zay." ⁶ Fa ty hamarea ze bakamity finoa le manao ty hoe:" Ko manao hoe zao ampo ty hoe:'Ia ro hiakatre agne andagnitse?' )zay le, mandrotso Kirisity); ⁷ naho ko manao ty hoe:' Ia ro hizotro agne amity laleke?"' (zay le, mampiakatre Kirisity amity mate). ⁸ Fa ino ro ambara zay?"Eo agnilanao ty rehake, ao ambavanao naho ao amponao." Zay ro tsara ty finoa, zay ambaranay. ⁹ Fa laha amity vavanao ro agnenkeanao Jesosy ho Tompo, naho mino amity arofonao fa natsangan'Agnahare tamity mate Re, le ho vonje riha. ¹⁰ Fa amity arofo ro inoa ty ndaty ty hamarea, naho amity vava ro agnenkeane ty famonjea. ¹¹ Fa hoe ty Soratre Masy ty hoe:"Tsy ho megnatre iaby ze mino Aze." ¹² Fa tsy misy maha-hafa eo amity Jiosy vaho Grika. Fa Tompo raike avao ro Tompo ty iaby, naho haream-pahasoava ho ahy iaby ze mikaike Aze Re. ¹³ Fa iaby ze mikaike ty agnara Tompo ro ho vonje. ¹⁴ Akore are ro hahafaha iereo mikaike Aze ze tsy ninoane? Akore ro hahafaha iereo mino Aze ze tsy rey iereo? Akore ro hahafaha iereo maharey laha tsy misy mpitalily? ¹⁵ Naho akore ro hahafaha iereo mitalily, laha tsy nisy nagnirake?_Arake ty voasoratre ty hoe:"Hehe ty hasoa ty tombo reo magnambara reo zaka-soa ty talily-soa!" ¹⁶ Kanefa tsy ie iaby ro nidranjy ty zaka-soa. Fa hoe Isaia ty hoe:"Tompo, ia ro nino ty talilinay?" ¹⁷ Laha zao ty finoa le bakamity fidranjigna, naho ty fidranjigna bakamity tsara Kirisity. ¹⁸ Fa hoe raho ty hoe:"Feie vao tsy nisy naharey iereo?"Eka, vatane mare." Ty feo iereo le fa niakatre magneran-tane, naho ty reha iereo zisikagne amity fara zao iaby zao." ¹⁹ Hafa zay, hoe raho ty hoe:"Feie vao tsy nahay ty Israely?" Tamity voalohane Mosesy nanao ty hoe:"Hataoko sarotene amize tsy firene kea nareo. Amity firene ze tsy misy fahaia, hataoko avy amity heloke nareo." ²⁰ Naho eo vatane nahasaky kea Isaia laha fa nirehake re ty hoe:"Hita reo ze tsy nipay ahy raho. Niseho tamireo ze tsy nagnotane ahy raho." ²¹ Fa hoe Re tamy Israely ty hoe:"Ire ro nahatiarovako ty tagnako tamity ndaty tsy magnenke vaho marehareha."