¹ Vaho reo mpitarike ty finakaviandrazabey ty longom-bey ndre Gileada ana ndre Makira ( ze ana ndre Manase), ze bak'amy reo foko ty tarana ndre Josefa, le avy le nitsara teo agnoloa ndre Mosesy naho teo agnoloa reo mpitarike ze loha ty longon-drazambey ty vahoagn'Israely. ² Nanao tihoe iareo: "Yaveh ro nandily anao, Ry tomponay, soa hagnomea anjara tane ho ahy ty vahoake ty Israely amy ty filoka. Nililia Yaveh riha soa hagnomea ty anjara ndre Zelofada rahalahinay ho ahy reo anak'ampelane. ³ feie laha manambaly lehilahy bak'amy ty foko ty vahoagn'Israely hafa reo anak'ampelane, le hala tsy ho anjara ty razambeintika ty anjara iareo. hagnampe ty anjara reo foko ze andehana iareo zane. Amy zane, le hala tsy ho anjara voatendre ho lovantika zane. ⁴ Amy zane, lafa avy ty tao ty jobile ty vahoake ty Israely, le hikamba amy ty anjara ty foko ze nandehana iareo ty anjarane. Le zane, ro hangala ty anjara iareo amy ty anjara ty fokon-drazambeintika. ⁵ Le nagnomey baiko ty vahoke ty Israely, tamy ty tsara Yaveh re Mosesy. Nanao tihoe: " To ty voatalily ty foko ty tarana ndre Josefa. ⁶ Zane ro andilia Yaveh mikasike reo anak'ampela ndre Zelofada. Nanao tihoe Reke: 'Ampoho iareo hanambaly ze safirine te soa, feie hanambaly ze ao amy ty fokon-draene avao iareo.' ⁷ Tsy misy ty anjara ty vahoake ty Israely hiova foko ho amy ty foko hafa. ty kiraikiraike amy ty vahoake ty Israely le hitajake ty anjara ty fokon-drazambeine. ⁸ Ty ampela ty vahoake ty Israely kiraikiraike ze managnan-jara ao amy ty fokone le tsy maintse manambaly ndaty bak'amy reo longombey ty foko ty babane. Zanele soa hanagna ty kiraikiraike amy ty vahoake ty Israely lova bak'amy reo razambeine. ⁹ tsy tokone hisy anjara hifindra tana ho ahy ty foko hafa. Ty ndaty iaby amy reo foko ty vahoake ty Israely le hitajake ty lovane avao." ¹⁰ Le nanao arake ze nandilia Yaveh andre Mosesy reo anak'ampela ndre Zelofada. ¹¹ Mahala, Tirza, Hogla, Milka, vaho Noa, reo anak'ampela ndre Zelofada, le nanambale ty tarana ndre Manase. ¹² Nanambaly tao amy reo lonombey reo tarana ndre Manase ana ndre Josefa iareo. Le zane, ro nitoera ty lova iareo tao amy ty foko ze ahy reo longombey ty baba iareo. ¹³ Reo ro lily naho lalàgna ze nomey Yaveh tamy ty alala ndre Mosesy ho ahy ty vahoake ty Israely teo amy reo lemake ndre Moaba amy sisy ndre Jordana tao Jeriko.