¹ Vaho reo taranagne ndre Robena naho Gada le nana biby fihare lahiahy. Lafa hisa iareo ty tane ndre Jazera naho Gileada le toera mahafinaritse ho ahy reo biby fihare iaze tane. ² Le avy niresake tamy ndre Mosesy, tamy ndre Eleazara mpisoro, vaho tamy reo mpitarike ty fikambana reo taranagne ndre Gada naho Robena. Nanao tihoe reke: ³ "Toy ty lisitsy reo toera ze fa nagnontanintanianay: Atarota, Dibona, Jazera, Nimra, Hesbona, Elale, Sebama, Nebo, vaho Beona. ⁴ Reo iaby reo tane ze nitafihy Yaveh teo agnoloa ty fikambana Israely, vaho toera soa ho ahyreo biby fihare reo. Zahay, mpiasanao, le mana biby fihare lahiale." ⁵ Nanao tihoe iareo: "Laha mahisake eo amasonao zahay, le lonike mba homeine anay, mpiasanao, mba ho fanagna toy tane toy. Ka atao mitsake amy ndre Jordane zahay." ⁶ Namaly an'reo taranagne ndre Gada naho Robena re Mosesy tihoe: " Tokone Handeha hialy va reo rahalhinareo laha nareo kea magnorim-tanà etoa? ⁷ Nanao akore ro hakivia tsy handeha agne amy ty tane ze nomey Yaveh aiereo ty arofo reo vahoagn'Israely? ⁸ Reo razambeinareo le nanao manahake zane zaka zane lafa nampandehaniko bak'agne Kadesi-barnea mba hitilike ty tane iareo. ⁹ Niakatse tagne amy ty vavabaibo ndre Eskola iareo. Nahisake ty tane iareo vaho bak'eo nagnakivy ty arofo iareo vahoagn'Israely soa tsy hagnina iareo tsy hilitse ao amy ty tane ze nomey Yaveh aiereo ¹⁰ Nirehitse ty helo Yaveh tamy io andro io. Nisareke Reke vaho nanao tihoe: ¹¹ 'Azo antoke te tsy hisy amy reo ndaty ze niakatse bak'agne Egypta, manomboke amy ty roapolo tao no miakatse, hahisake ty tane ze nifantako tamy ndre Abrahama, tamy Isaka, vaho tamy ndre Jakoba, Satria tsy nagnarake Ahike vatane iareo,ankoa-tsy ¹² Kaleba anandahy ndre Jefone Kenizita, vaho Josoa anandahy ndre Nona. Kaleba naho Josoa avao ro vatane nagnarake Ahike vatane ¹³ Le nirehitse tamy Ysraely ty helo Yaveh. Nataone nirere nagnodidy ty tane tsy misy na ino na ino tagnate ty efapolo tao le hatramy ty naha-rava reo taranake iaby ze nanao rate teo am-panjone iareo. ¹⁴ Ingo, nisondrotse teo amy ty toera ty razambeinareo nareo, manahake ty ndaty mpanao rate maro, soa hagnampe ty fireheta ty helo Yaveh amy ndr'Israely. ¹⁵ Laha mivio amy ty fagnaraha Aze nareo, le hamela andr'Israely agne amy ty tane tsy misy na ino na ino ndraike Reke vaho handrava ty vahoakine iaby nareo." ¹⁶ Koa namonjy teo agnila ndre Mosesy iareo vaho nitsara tihoe: "Apoho zahay hagnore vala ho ahy reo biby fiharenay naho tanà ho ahy reo haseveregnanay etoa. ¹⁷ Na zane ka, zahay le ho vonone vaho hitanjake fialia soa handeha miarake amy ty maramila Israely zisike ampitoboanay aiereo amy ty toera iereo. Te reo aseveregnanay kea le hitoboke agne amy reo tanà voaara mafe noho reo vahoake hafa ze mbo mitoboke amy toy tane toy. ¹⁸ Tsy himpoly agne amy ty fitobohanay zahay zisike hazoa ty kiraikiraike amy ty vahoagn'Israely ty lovane iaby. ¹⁹ Tsy handova ty tane miarake amy iareo agne an-dafe ndre Jordana zahay, satria ty lovanay le etoa amy ty ilane atsignana." ²⁰ Le namale aiereo re Mosesy tihoe: " Laha manao ze talilinareo nareo, laha manoma ty vatanareo handeha eo agnatreha Yaveh mba hialy nareo, ²¹ vaho ty kiraikiraike amy reo lehilahinareo mitanjake fialia le tsy maintse mitsake andre Jordane eo agnatreha Yaveh, zisike androahane reo fahavalone tsy ho eo agnatrehane ²² vaho ty tane le rese eo agnatrehane. Lafa afake zane le afake mimpoly nareo. Ho tsy manan-tsikone magnoloa andr'Israely nareo. Toy tane toy le ho fanagnanareo eo agnatreha Yaveh. ²³ Te laha tsy manao zane nareo, ingo, hanao rate amy Yaveh nareo. Haizo soa te hahisake anareo ty helognareo. ²⁴ Magnoregna tanà ho ahy reo ondrinareo; bak'eo le ataovo ze nitalilienareo." ²⁵ Niresake tamy ndre Mosesy reo taranagne ndre Gada naho robena vaho nitsara tihoe:" hanao arake ze nandilianao ty mpiasanao, ry tomponay. ²⁶ Reo anake malinikay, reo valinay, reo ondry amy ty osinay, vaho reo biby fiharenay iaby le hitoetse ao amy reo tanà ndre Gileada. ²⁷ Na zane ka, zahay mpiasanao, le hitsake eo agnatreha ndre Yaveh soa hiale, ty lehilahy iaby ze mitanjake fialia ho amy ty aly, arake ze nitalilienao, ry tomponay." ²⁸ Kea nagnomea torohevitse mikasike aiereo tamy ndre Eleazara mpisoro, tamy ndre Josoa anandahy ndre Nona, vaho tamy reo mpitarike reo foko ty razambey tao amy reo foko ty ndaty Israely re Mosesy. ²⁹ Nanao tihoe re Mosesy tamy iareo: "Laha mitsake andre Jordana miarake aminareo reo taranagne ndre Gada naho Robena, ty lehilahy iaby ze mitanjake ty fialia soa hialy eo agnatreha Yaveh, vaho laha rese eo agnatrehanareo ty tane, le homeanareo aiereo ho fanagna ty tane ndre Gileada. ³⁰ Te laha tsy mitsake eo aminareo mitanjake ty fialia iareo, le agne amy ty tane ndre Kanana iareo ro hahazo ty fanagna iareo eo aminareo." ³¹ Kea namale reo taranagne ndre Gada naho Robena tihoe: "Arake ze nitalily Yaveh taminay, mpiasanao, le zao ro ataonay. ³² Hitsake mitanjake ty fialia eo agnatreha Yaveh agne amy ty tane re Kanana zahay, te ty lova anjaranay le hijano aminay amy toy lafy Jordana toy." ³³ Kea nomea ndre Mosesy an'reo taranagne ndre Gada naho Robena, vaho kea ahy ty antsasake ty foko ndre Manase ana ndre Josefa ty fanjaka ndre Sihona, mpanjaka reo Amorita, naho Oga, mpanjaka ndre Basana. Nomeane aiereo ty tane, vaho nizaraine tamy iareo ty tanà zane iaby miarake amy reo faritanine, le reo tanà ty tane magnodidy reo ³⁴ Reo taranagne ndre Gada le nampimpole nagnore andre Dibona, Atarota, aroera, ³⁵ Atrota-sofana, Jazera, Jogbeha, ³⁶ Beti-nimra, vaho Beti-harana mba ho tanà voaaro mafe miarake amy reo vala ho ahy ty ondry. ³⁷ Reo taranagne ndre robena le nampimpole nagnore andre Hesbona, Elale, Kiriataima, ³⁸ Nebo, Bala-meona, Sibma- niova ty agnara reo tatoy afara. Nomea iareo agnara hafa reo tanà ze nampoly iareo naore. ³⁹ reo taranagne ndre Makira anandahy ndre Manase le nagnagny Gileada vaho nagnafake zane tamy reo Amorita ze tao amy zane. ⁴⁰ Bak'eo le nomea ndre Mosesy andre Makira anandahy ndre Manase re Gileada, vaho nagnoren-tragno teo ty vahoakine. ⁴¹ Nandeha re Jaira anandahy ndre Manase vaho nagnandevo reo rova zane le nikaike aiereo tihoe: Havota-jaira. ⁴² Nandeha re Noba le nagnondevo andre Kinata naho reo ana-bohine, vaho nikinaikine tihoe: Noba, arake ty agnarane avao zane.