¹ Nitsara tamy reo mpitarike ty foko ty vahoagn'Israely re Mosesy. Nanao tihoe reke: "Zao ro nandilia Yaveh. ² Laha misy misareke amy Yaveh, na manao fanta hamehy ty vatane amy ty fampagnantena, lo lonike reke tsy hivalike amy ty resane. Lonike reke hitanjake ty fampagnantenane hanao ze iaby naboaky ty vavane. ³ laha misy ampelatovo mitoboke ao agn'anjomba ty babane le manao sareke amy Yaveh vaho mandrohy ty vatane amy ty fampagnantena, ⁴ Laha maharey ty sareke ty babane le mifanta amy ze nandrohizane ty vatane, vaho tsy mitsara na ino na ino reke mba hampivalike aze, le hanan-kere avao ty sarekene. Ty fampagnantena iaby ze nandrohizane ty vatane le hanan-kere . ⁵ Te laha mahanjanje mikasike ty sarekine naho ty fampagnantenane ty babane, vaho laha tsy mitsara na ino na ino amine, le ty sareke iaby ze nataone tamy ty vatane le hanan-kere. ⁶ Nefa, laha mahanjanje ty voadine iaby ze nataone naho ty fampagnantena mangetriketrike nataone ze nandrohizane ty vatane ty babane, vaho laha manapake aze reke amy io andro io avao, le tsy hijano hanan-kere reo. Hamela aze Yaveh satria nanapake aze ty babane. ⁷ Laha manambale lehilahy raike reke le mboe voafehy reo sareke, na manao fampagnatena malisalisa ze hanerene ty vatane, le hanan-kere reo fanerea reo. ⁸ Te laha manaka aze amy ty andro ahenoane mikasike zane ty babane, le handrava ty sareke ze nataone reke, le iaze tsara malisalisa natao ty sognine ze namehezane ty vatane. Hanafake aze Yaveh. ⁹ Te ty amy ty vantotse na ty ampela nisaram-bale, ze rehetra namehezane ty vatane le hana-kere amine manombok'eo. ¹⁰ Laha misy ampela nanao sareke tao an-tragno ty valinena na nanere ty vatane tamy ty fanaova fifanta, ¹¹ vaho heno ty valine zane, feie tsy miresake na ino na ino amine reke vaho tsy manohitse aze, le lonike hijano hanan-kere ty firenerea nataone. ¹² Te kaha arava ty vline reo amy ty andro ze naharezane mikasike zane, ze iaby naboaky ty sognine mikasike reo sareke na fampagnantena le tsy hanan-kere. Fa narava ty valine zane. Hanafake aze Yaveh. ¹³ Ty sareke iaby ze atao ty ampela raike le mamehy aze handà ty vatane le mete hamafisy na ho arava ty valine. ¹⁴ Te laha tsy mitsara na ino na ino amine saky san'andro reke, le magnamafe ty sarekine iaby reke vaho mamehy ty fampagnantena ze nataone. Nihamafisine reo satria tsy nitalily na ino na ino tamine reke tamy ty fotoa ninjanjignane mikasike reo. ¹⁵ Laha mipay ty haharava ty sareky ty valine fotoa ela tafara ty nahenoane mikasike zane ty lehilahy, le reke ro ho tompon'antoke amy ty fahadisoane." ¹⁶ Reo ro lalàna nandilia Yaveh mba hatalily ndre Mosesy_lalàna hoahy ze eo amy ty lehilahy naho ty valine vaho eo amy ty babane ty anak'ampelane lafa ao agnaty ty fahatanorane ao an-tragno longon-draene reke.