¹ Le avy tamy ndre Mosesy ty anak'ampela ndre Zelofada anandahy ndre Hefera anandahy ndre Gileada anandahy ndre Makira anandahy ndre Manase anandahy ndre josefa. Reto iaby ty agnara reo anak'ampelane: Mahala, Noa, Hogla, Milka, naho Tirza. ² Nitsanga teo agnatreha ndre Mosesy, Eleazara mpisoro, ty mpitarike, vaho teo agnoloa ty fiaraha- monie iaby teo amy ty filira ao amy ty tragno-lay fihaogna iareo. Nanano tihoe iareo: ³ " Maty tagne amy ty tane tsy misy ino na ino ty babanay. Tsy agn'isa reo ze niray dinike tao amy ty antoko ndre Kora hanohitse ahy Yaveh reke Maty ty hadisoane avao reke, vaho tsy nanagn'anandahy. ⁴ Nanao akore ty agnara ty babanay ro nafaha tamy ty fikambana ty fianakaviambeine satria tsy nanagn'anandahy reke? Omeo tane eo amy ty longo ty babanay zahay." ⁵ Le nandesy ndre Mosesy teo agnoloa ndre Yaveh ty raraha iareo. ⁶ Nitsara tamy ndre Mosesy Yaveh le nanao tihoe: ⁷ " To ty tsara ty anak'ampela ndre Zelofada. Lonike hagnomey tane ho aiereo vatane riha bak'amy ty lova reo longo ty babane, vaho lonike ho azonao antoke te ty lova ty baba iareo le tafita amy iareo vatane. ⁸ Lonike hitsara amy ty vahoagn'Israely riha le talilio tihoe; 'Laha misy ndaty mate le tsy managn'anandahy, le lonike hafalonao amy ty anak'ampelane ty lovane. ⁹ Laha tsy managn'anak'ampela reke, le homeanao reo rahalahine ty lovane. ¹⁰ Laha tsy mana rahalahe reke, le homeanao reo rahalahe ty babane ty lovane. ¹¹ Laha tsy mana rahalahy ty babane, le homeanao ty longone marine eo amy ty fianakavianbey ty lovane, vaho hangalake zane ho aze reke. Ho lalàgna mafe haore amy ty lily ho ahy ty vahoagn'Israely zane, arake ze fa nandilia Yaveh ahike."' ¹² Nanao tihoe Yaveh tamy ndre Mosesy: " Miakara egne am-bohitse Abarima vaho henteo ty tane ze nomeiko ty vahoake ty Israely. ¹³ Afara ty fahisahanao zane, riha, avao kea, le hotaone agne amy ty vahoakanao, manahake andre Arona rahalahinao. ¹⁴ Hiseho zane satria nareo roe le nilietse hanohitse ty liliko tane amy ty tane tsy misy na ino na ino ndre Sina. Agne, lafa mirotsake amy ty vatobey ty rano, amy ty helonao ro tsy nahavitanao nagnomey hase Ahike ho mase teo amaso ty fikambana iaby." Reo ro rano ndre Meriba ndre Kadesy agne amy ty tane tsy misy na ino na ino ndre Sina. ¹⁵ Le nirehake tamy Yaveh re Mosesy vaho nitsara tihoe: ¹⁶ " Lonike riha, ry Yaveh, Andragnahare ty fagnahy ty Ondaty iaby, hanendre ndaty eo amy ty fikambana, ¹⁷ ndaty ze hiboake naho hilitse eo amy iareo vaho hitarike aiereo naho handay aiereo, mba tsy hanahake ty aondre tsy misy mpiabe ty fikambananao." ¹⁸ Yaveh nitsara tamy ndre Mosesy tihoe: "Alao Josoa ana ndre Nona, lehilahy ze hitoera ty fagnahiko,apoho eo amine ty tagnanao. ¹⁹ Apoho eo agnoloa ndre Eleazara mpisoro naho eo agnoloa ty maso iareo mba hitariha aiereo. ²⁰ Lonike riha hametrake ty fahefanao ilane amine, mba heke ty fiarahamone ty Israely iaby aze. ²¹ Handehaa eo aloha ndre Eleazara mpisoro mba hipay ty lahatso ho aze amy ty fanapahan-keve ndre Orima reke. Ho amy ty liline ro handehana ty ndaty miboake naho militse, le reke naho ty vahoake ty Israely iaby miarake amine, ty fikambana iaby." ²² Le natao ndre Mosesy ze nandilia Yaveh hanoene. Nalaene re Josoa vaho natobone eo agnoloa ndre Eleazara mpisoro naho ty fiaraha-monigne iaby reke. ²³ Nametrake ty tagnane tamine reke vaho nandily aze mba hitarike, arake ze fa nandilia Yaveh ho ataone.