¹ Lafa heno iaze Kananita mpanjaka ndre Arada, ze nitoboke tao Negneva, te nandeha tagne amy ty lala mandreha agne Atarima ty Israely, le nialy tamy Israely revaho nangalake ty sasane tamy iareo ho odevo. ² Nisareky tamy Yaveh ty Israely vaho nanao tihoe: "Laha omeinao fandresea amy reo vahoake reo zahay, le ho potehinay vatagne ty tanà iareo." ³ Nitsano ty feo Israely Yaveh vaho nagnomey aiereo fandresea ahy reo kanannita. Nopotehy iareo iaby iareonaho ty tanàne. Nikinaike tihoe Horma zane toera zane. ⁴ Niala bak'ao am-bohitse Hora nandalo ty lala mandeha agne amy ty Riake Mena iareo soa handeha hagnodidy ty Tane ndre Edoma. Niha-kamo iaby ty vahoake tegne an-dala. ⁵ Nirehake nanohitse ahy ty Andragnahare naho Mosesy ty vahoake tihoe: "Nanao akore zahay ro nandesinao niakatse hiboake ahy Egypta soa ho maty atoy amy ty tane tsy misy rahaha? Tsy misy mofo, tsy misy rano, vaho hejenay toy mahatanjake rate toy." ⁶ Bak'eo Yaveh nandefa bibilava misy poizy teo amy ty vahhoake. Nitifitsy ty ndaty reo bibilava; maro ty ndaty maty. ⁷ Namonje ahy ndre Mosesy ty vahoake vaho nanao tihoe: "Nanao rate zahay satria niresake nanohitse anao naho Yaveh. Mivavaha amy Yaveh soa hangalane reo bibilava aminay," Kea le nivavake ho ahy ty vahoake re Mosesy. ⁸ Nanao tihoe Yaveh tamy ndre Mosesy: "Magnamboara bibilava vaho afehezo amy ty hetae lava zane. Ze iaby voatifatse le ho velo, laha mivamba zane re." ⁹ Kea namboatse bibilava saba Mosesy vaho nandrohy zane tamy ty hetae lava. Laha mitifatse ndaty ty bibilava, laha nivamba iaze bibilava saba re, le velo. ¹⁰ Bak'eo nandeha ty vahoagn'Israely vaho nagnianja tao Obota. ¹¹ Nandeha bak'ao vaho nagnianja tagne Leabarima tagne amy ty tane tsy misy raraha ze magnatrike ahy re Moaba tandrify ty atignana iareo. ¹² Niala bak'ao iareo vaho nagnianja tagne amy ty vavabaibon-driake Zareda. ¹³ Niala tao iareo vaho nagnianja tagne an-dafe ty Vavarano ndre Arnona, ze agne amy ty tane tsy misy raraha ze mihitatse bak'agne amy ty fari-tane reo Amorita. Ty Vavarano ndre Arnona ro fari-tane ndre Moaba, Ampagnivoa ty Moabita naho re Amorita. ¹⁴ Zane ro antone hiotalily ao amy ty horo taratasy ty Aly Yaveh tihoe: "Vaheba agne Sofa, vaho reo vavabaibon-driake ndre Arnona, ¹⁵ ty hantsa reo vavabaibon-driake ze mitarike mandeha agne amy ty tanà ndre Ara vaho mizotso mandeha agne amy ty fari-tane ndre Moaba." ¹⁶ Niala tao iareo vaho nandeha agne Bera, ze misy iaze fantsaka ze nitsara ndre Yaveh tamy ndre Mosesy tihoe: "Avorio miarake ty vahoake soa hagnomezako rano aireo." ¹⁷ Bak'eo niantsa toy antsa toy ty Israely: "Mitereha, ty fantsaka. Ataovo agn'antsa zane. ¹⁸ Iaze fantsaka ze nihaly reo mpitaritika, iaze fantsaka ze nihaly reo manan-kaja ty vahoake tamy ty fitognom-panjakana naho fitogno iareo." Bak'eo le niala tao amy ty tane tsy misy raraha iareo vaho nandeha agne Matana. ¹⁹ Niala tao Matana iareo vaho nandeha agne Nahaliela, vaho avy ao Nahaliela nandeha agne Bamota, ²⁰ vaho bak'ao Bamota nandeha agne amy ty vavabaibon-driake ty tane Moaba. Eo ambony ty Vohitse Pisga ro hahisaha ty tane tys misy raraha. ²¹ bak'eo Israely nandefa mpanday hafatse tane amy ndre Sihona mpanjaka ndre Amorita nanao tihoe: ²² "Apoho zahay hamkivake eo amy ty tanenao. tsy hitsily agne amy ty baibo iaby na ty tanem-boaloboke zahay. Tsy hino ty rano bak'eo amy ty fantsakanao zahay. Handeha eo amy ty lala ty mpanjaka zahay zisike iampitanay ty fare-tanenao." ²³ Te tsy napo ndre Sihona mpanjaka handalo ty fare-tane iareo ty Israely. Te kea, namory ty tafine re Sihona mpanjaka vaho nanfike ahy ty Israely tagne amy ty tane tsy misy raraha. Avy tagne Jahaza re, zer nialiane tamy ty Israely. ²⁴ Nanafike ty tafike ndre Sihona tamy ty lela meso ty Israely vaho nangalake ty tane iareo bak'eo Arnona le zisike agne amy ty vavarano Jakoba , zisike agne amy tane ty vahoagne ndre Amona. ²⁵ Nangalake reo tanà ty Amorita iaby ty Israely vaho nitoboke tao amy iareo iaby, agnate zane Hesboba naho ty ana-bohine iaby. ²⁶ Hesbone ro tanà ndre Sihona mpanjaka reo Amorita , ze nialy tamy ty mpanjaka ndre Moaba teo aloha. Nala ndre Sihona iaby ty tanene iaby zisike agne amy ty fare-tanene le zisike agne amy ty Vavarano ndre Arnona. ²⁷ Zane ro antone hitalilia reo ze miresake amy ty ohabola tihoe: "Avia atoy Hesbone. Lonike iaze tanà ndre Sihona ho hatsanga ndraike vaho apoke ndarike. ²⁸ Nisy afo nagnoro bak'ao Hesbona, lelafo bak'ao an-tanà ndre Sihona ze nandrava ahy re Moaba, naho reo tompo reo toera abo ndre Arnona. ²⁹ Loza ho anao, ty Moaba! rava iriha, ty ndaty re Kemosy. nataone ho mpilay reo anandahine vaho gadra ndre Sihona mpanjaka reo Amorita reo anak'ampelane. ³⁰ Te resinay Sihona. Hesbona le rava zisikagne amy ty lala iaby mandeha agne Dibona. Resinay iareo tegne amy ty lala iaby mandeha agne Nofa, ze mahazo ahy ndre Medeba." ³¹ kea nanomboke nitoboke teo amy ty tanene reo Amorita ty Israely. ³² Bak'eo Mosesy nandefa ndaty hivamba ahy ndre Jazera. Nala iareo ty ana-bohine vaho niroahy iareo ze Amorita tao. ³³ Bak'eo nitsily iareo niakatse ho agne amy ty lala mandeha agne Basana. Niboake nanohitse aireo re Oga mpanjaka ndre Basana, reke naho ty tafine, soa hialy amy iareo agne Edrehy. ³⁴ Bak'eo Yaveh nitalily tamy ndre Mosesy tihoe: "Ko matahotse aze, satria nomeiko fandresea eo amine, ty tafine iaby, vaho ty taene iriha, Ataovo amine ze natao tamy ndre Sihona mpanjaka ndre Amorita, ze mitoboke agne Hesbona." ³⁵ Kea nivonono iareo reke, reo anandahine, vaho ty Tafine iaby, zisike hahafaty ty ndatine iaby. Bak'eo le nala iareo ty tanene.