¹ Vaho roe andro miaolo ty Paske naho ty fankalaza ty fihinana ty Mofo tsy misy masirasisa tamy zay. Nipay fomba hisambora ahy ndre Jesosy arere reo loha ty mpisoro naho ty mpanorandalàgna vaho hamono Aze bak'eo. e nanao tihoe iareo: "Aleo tsy amy ² ty andro fete, soa tsy hikorakorake ty ndaty." ³ Laha tagne Betania tao an-tragno ndre Simona angamay Jesosy, laha nitoboke teo an-databatse reke, le nisy ampisafe raeke namonje Aze nanday tavoange alabastara misy menake lafo vile, ze narda tsy fangarone. Nivakine iaze tavoange le nailine teo amy ty agnambone zay. ⁴ Nampasiake ty ndaty sasane anefa zay. Nifampiresake iareo le nanao tihoe: "Ino ro antone zao fandaniandania fahatane zao? ⁵ Io menake magnitse io le afake navile mihoatse ty denaria telonjato, vaho nomea ty mijale. le nasike iaze ampisafe iareo bak'eo. ⁶ Feie nanao tihoe Jesosy: "Apoho re. Nanao akore nareo ro manao ze mampalahelo aze? Zaka soa ro nanoene tamiko. ⁷ Ty mijale le eo aminareo ziskam-parane, vaho afake hanao asa soa ho aiereo avao nareo na amy ty andro ino na andro ino, te raho kea tsy hitoboke eo amianareo ziskamparane. ⁸ Nanaoze azone atao reke, nagnosotse ty vatako hoa amy ty fandevagna reke. ⁹ Ataliliko aminareo ty to, na ia na ia hitoria ty Filazantsara manera zao tontolo zao, le ho taliliene ty nanoe toy ampisafe toy, soa ho fahatiarova aze." ¹⁰ Bak'eo Jodasy Iskariota, raeke tamy iareo roambinifolo lahy, lasa nandeha agne amy reo loha ty mpisoro hazahoane magnone Aze eo amy iareo. ¹¹ Laga nahajane zane reo loha ty mpisoro, le fale iareo le nampagnantegna hagnomey ndrala aze. Le nanomboke nipay hirike hagnomeza Aze iareo reke. ¹² Tamy ty andro voalohane ty fihinana ty mofo tsy misy masirasira, lafa nanao soro ty aondre ty Paska iareo, le nanao tihoe reo mpianane tyamine: "Aia ro teanao alehanay hikarakara mahatanjake, soa hitavanao ty mahatanjake ty Paske?" ¹³ Le nagnirake roe tamy reo mpianane Reke le nitsara tamy iareo mpianane Reke le nitsara tamy iareo tihoe: "Mandena agne an-tanà, vaho hisy lehilahy manday vatavo feno rano nifanonjo aminareo. Magnaraha Aze. ¹⁴ ze tragno izilihane, magnaraha aze le talilio ty tompo zay tragno zay tihoe: 'Nanao tihoe ty mpampianatse: "Aia ty efitragno fandrambesam-bahine ahazahoako miara-mitava ty Paske amy reo mpianatsiko?"' ¹⁵ Hampitoro anareo efitragno bey ambone etaze misy fanake ze favonogneso reke. Ao ro ataovo ty fanomagna iaby ho antika." ¹⁶ Le lasa ty mpianatse vaho nitanjake ty tanà. Hisa iareo arake fa nitaliliene tamy iareo ty zaka-iabyle nagnoma ty mahatanjake ty Paska iareo. ¹⁷ Lafa hariva ty andro, le avy niarake tamy reo roambinifolo lahy Reke. ¹⁸ Lafa nitoboke teo an-databatse naho nitava iareo, le nanao tihoe Jesosy: "Atliliko aminareo ty to. te ty rake aminareo ze miara-mitava amiko etoa le hamadike Ahike." ¹⁹ Nalahelo mafe iareo iaby, le nitsara tamine ty kiraikiraike tihoe: "Tsy raho zay?" ²⁰ Jesosy namale le nitsara aiereo tihoe: Ty raeke aminareo roambinifolo zay, iaze miara-mampijomboke mofo amiko ampo finga zao." ²¹ Te ty Anagn'Ondaty le handeha amy ty lala ze fa voatalily ty Soratse Masy mikasike Aze. Te loza kea ho ahy zay lehilahy ze mamalike ty Anagn'Ondaty zay. Soa ho aze vatane laha tsy terake reke." ²² Laha mboe teo am-pitava iareo, le nandrambe ty mofo re Jesosy, nisaotse, vaho nizarazara zay. Natolone aiereo zay nsho nsnso tihoe: "Rambeso, toy ro vatako." ²³ Le nandrambe ty kapoake Re, nisaotse, vaho nagnomey zay aiereo, le nino tamy zay iareo iaby. ²⁴ Le nanao tihoe Reke tamy iareo: "Toy ty lio ty fagnekem-pilongoa, lio ze apoko ho ahy ty maro. ²⁵ Ataliliko aminareo ty to, tsy hino toy vokatse ty voaloboke toy sase Raho zisike iavia ty andro ze hinomako zay ndraeke agne amy ty fanjaka ty Andragnahare." ²⁶ Lafa avy fiantsa iareo, le nandeha tegne ambone vohitse Oliva. nao tihoe Jesosy tamy iareo: ²⁷ "Hagnenga Ahike iaby nareo iaby, te voasoratse tihoe: 'Hamofokew ty mpiandre aodre Raho vaho himbognake ty aondre.' ²⁸ Te lafa avy hitsanga amy ty mate Raho, le hiaolo lala anareo ao Galilia." ²⁹ Le nanao tihoe Petera tamimne: "Na le hagnenga iaby ty iaby, raho tsy hagnenga." ³⁰ Nanao tihoe Jesosy tamine: "Talilieko aminao ty to, te androane hale, laha mboe tsy magneno in-droe ty akoho, le fa nandà Ahike in-telo riha." ³¹ Te nanao tihoe Petera: "Na tsy maintse hiarake mate aminao raho, tsy handà Anao." Le sambe nampagnantegna manahake zay iaby iareo iaby ³² Vaho avy tagne toera atao tihoe Getsemane iareo, le nanao tihoe mpianane tihoe: "Mitoboha eto laha mboe mivavake Raho." ³³ Le nanday ahy ndre Petera, naho Jakoba, vaho Jaona niarake tamine Reke vaho nanomboke nalahelo sade nijale. ³⁴ Le nanao tihoe iareo: "Mijale loatse ty Fagnahiko, manahake ty fa ho mate. Mitoboha eto le miambena." ³⁵ Nagnalavitse kelekele Jesosy, nihohoke tamy ty tane, le nivavake Reke laha ohatse azo atao, le hiala Amine zay lera zay. ³⁶ Nanao tihoe Reke: "Baba, ty raraha iaby hainao atao. Afaho amiko toy kapoake toy. Feie lonike tsy ty teako ro hatao, te ty Anao. ³⁷ Nimpole Reke le nahisake aiereo natore, le nanao tihoe Reke tamy ndre Petera: 'Simona, matore vao riha? Tsy nahavita niambe lera raeke vao riha? ³⁸ Miambena le mivavaha soa tsy hizilihanareo amy tyy fakam-pagnahy. Ty fagnahy mete mazoto vatane, te ty nofotse ro malemy." ³⁹ Le lasa ndraeke Reke nisintake kele vaho nivavake, vaho le nampimpole ty tsara nataone teo aloha avao. ⁴⁰ NImpole ndraeke Reke le nahisake aiereo natore, te navesatse ty torimaso ty maso iareo vaho tsy hisa iareo ze nitaliliene tamine. ⁴¹ Namonje fagnintelone Reke le nitsara aiereo tihoe: "Mboe matore naho mitofa avao vao nareo? Ampe zay! Fa ave ty fotoa. Vambao! Ty Anagn'Ondaty nivaliha hagnomey eo an-tagna ty haratea. ⁴² Mitsangàna ndao andeha tika. Vambao, Fa marinike iaze hamalike Ahike." ⁴³ Vaho laha mboe teo am-pitenena Reke le avy Jodasy, Raeke amy reo roambinifolo lahy, niarake tamina vahoake maro ze nilanja votontse naho langilangy, bak'amy reo loha ty mpisoro, ty mpanoradalàgna, vaho ty ndaty. ⁴⁴ Vaho iaze mpamadike Aze nagnome famantara aiereo, nitsara tihoe: "Ze horofako, zay ty ie. Samboro Reke le ambeno." ⁴⁵ Lafa avy Jodasy, le namonje ahy ndre Jesosy ave hatragne reke naho nitsara tihoe: "Mpampianatse," vaho nagnoroke Aze re. ⁴⁶ Bakeo le nisambore iareo Jesosy. ⁴⁷ Te nisy raeke tamy reo nitsanga teo nampiboake ty mesone vaho namofoke iaze mpiasa ty mpisorobey le nanapake ty sofine. ⁴⁸ Nanao tihoe Jesosy tamy iareo: "Avy hanambotse Ahike, manahake ty hanambotse malaso, miarake amy ty meso bey langilangy vao nareo? ⁴⁹ Tamy Raho teo aminareo san'andro naho nampianatse teo amy ty tempoly, tsy nisamborinareo. Te natao zao soa hahatanterake ty Soratse Mase." ⁵⁰ Le nagnenga Aze iaby reo niarakr tamy ndre Jesosy vaho nietake. ⁵¹ Vaho nisy mpamarake raeke, tsy nisike ankoatsy lamba harire avao nagngarake ahy ndre Jesosy. Lafa nisambory ty ndaty reke ⁵² le napone teo ty lamabane le lasa nilay tsy nisike reke. ⁵³ Nandesy iareo tagne amy ty mpisorobey Jesosy. NIara-nivore tamine teo iaby ty mpisoro iaby, naho ty ndaty bey, vaho reo mpanora-dalàgna. ⁵⁴ Vaho Petera nagnarake Aze bak'egne Lavidavitse egne, hatragne amy ty tokontane ty mpisorobey. Nitoboke teo amy reo mpiambe re, ze namindro teo agnila ty afo. ⁵⁵ Vaho reo loha ty mpisoro naho ty Synedrione Jiosy le nipay vavolombelo manohitse ahy ndre Jesosy soa hahafaha iareo mamono Aze ho mate. Feie tsy nahisake iareo. ⁵⁶ Te maro ro nitanjake vande Aze, feie na ty fitana iareo tsy nilame zao. ⁵⁷ Vaho nisy ndaty ilane nitsanga le nitanjake vande Aze; nanao tihoe iareo: ⁵⁸ "Janjinay Reke nitsara tihoe: 'Ho ravako toy tempole natao tana toy, vaho ao ampo ty telo andro Raho le hananga raeke hafa tsy nataon-tagna."' ⁵⁹ Te mboe tsy nifagnarake avao ty fitana iareo. ⁶⁰ Vaho ty mpisorobey nitsanga teo amy iareo le nagnontane ahy ndre Jesosy tihoe: Tsy misy havale vao Riha? Ino zay hitana reto ndaty reto Anao zay?" ⁶¹ Te nitsy Reke naho tsy namale na ino na ino. Le mboe nagnontane Aze ndraekety mpisorobey le nanao tihoe: "Riha vao ro Kristy, Anagn'Iaze voatahy?" ⁶² Le nanao tihoe Jesosy: "Raho ro Reke; vaho ho hisanareo ty Angn'Ondaty lafa mitoboke eo an-tagna ankavana ty here ty Andragnahare naho bak'egne amy ty hiboke ty lagnitse." ⁶³ Vaho ty mpisorobey nanatake ty fitafiane naho nanao tihoe: "Mboe vavolombelo avao tika? ⁶⁴ Te henonareo ty fitsaran-drate. Ino ro fanapahan-kevitsinareo?" Reke iaby le sambe nagnameloke Aze manahake ty ndaty maeva ty ho mate. ⁶⁵ Ty ilane nanomboke nandora Aze vaho nanaro ty vatane le namofoke Aze vaho nanao tamine tihoe: "Mitokia! Vaho reo manan-kase Aze le namofoke Aze. ⁶⁶ Vaho laha teo ambane teo an-tokontane Petera, le namonje aze ty raeke tamy reo mpiasa ampela ty mpisorobey. ⁶⁷ Nahaisake ahy ndre Petera nitsanga namindro teo amy ty afo reke tamine tihoe: "Riha kea niarake tamy iaze Nazarena, Jesosy." ⁶⁸ Te reke nandà zay, nanao tihoe: "Tsy haiko naho tsy azoko ze tsaranao." Bak'eo lasa niala ty tokontane reke. [Fagnamariha: Reo fandika ialane magnampe tihoe: "Le nagneno ty akoho," te reo fandika taolo soa loatse le tsy misy io tsara io.] ⁶⁹ Te iaze aja ampela nahisake aze le nanomboke nitsara tamy reo ndaty nitsanga magnodidy ndraeke tihoe: "Io lehilahy io le raeke amy iareo!" ⁷⁰ Te mboe nandà zay ndraeke reke. Kelekele bak'eo le nanao tihoe nitsanga teo tamy ndre Petera tihoe: "Raike amy iareo sase riha, satria riha kea le Galiliana." ⁷¹ Te nanomboke nagnozo vata naho nifanta reke tihoe: "Tsy haiko zay lehilahy talilinareo zay." ⁷² Vaho niarake tamy zay le nagneno fagnindroane ty akoho. Bak'eo le nahatiaro ty tsara ndre Jesosy tamine Petera tihoe: "Laha tsy mboe magneno fagnindroane ty akoho, le handà Ahike intelo riha,' Le nalahelo mafe reke naho nitomagne.