¹ Toy ty fiandoha ty filazantsara ndre Jesosy Kristy, iaze Anagn'Andragnahare. ² Arake ze voasoratse ao amy Isaia mpitoke tihoe: "Ingo, Raho magnirake ty irako hiaolo Anao, iaze rake hagnamboatse ty lalanao. ³ Misy feo re mikaike mafe agne amy tyy tane tsy raraha tihoe: "Amboaro vonogne ty lala ty Tompo; ataovo mahity ty lala handehanane."' ⁴ Avy Jaoana, nanao batisa tagne amy ty tane agn'efetse vaho nitory ty batisa ty fifona ho amy ty famelan-keloke noho ty haratia. ⁵ Ty tane ndre Jodia iaby naho ty vahoake iaby ao Jerosalema le avy namonje aze. Nataone batisa tao amy ty sihana ndre Jordana iareo, lafa nagneke ty hafatiane. ⁶ Jaoana le nisike lamba volon-drameva vaho nanao satira holitse teo am-balahane, vaho valala naho tantele rembe no nihannine ⁷ Nagnambara re tihoe: "MIsy raeke ho avy magnarake ahike ze mahere mihoatse ahike, vaho tsy maeva raho na ty hagnaha ty fehin-kanane. ⁸ Raho nanao Batisa anareo tamy ty rano, te Re kea hanao batisa anareo amy ty Fagnahy Masy." ⁹ Tamy reo andro nahaavy ndre Jesosy bak'agne Nazareta tao Galilia ro nitsanga zay, vaho natao ndre Jaona batisa tao amy ty sihana ndre Jordana Reke. ¹⁰ Laha vao niboake ty rano Jesosy, le hisane nisokatsy ty lagnitse vaho nizotso teo amine manahake ty voromahilala ty Fagnahy. ¹¹ Vaho nisy feo bak'agne an-dagnitse nanao tihoe: "Riha ro Anako malalako. Iriha ro teako." ¹² Bak'eo le nitaomy ty Fagnahy ho agne amy ty tane tsy misy raraha Jesosy. ¹³ Efapolo andro Reke ro tagne amy ty tane tsy misy raraha, nala ty satana fagnahy. Nitoetse nirake tamy ty bibily Reke, vaho nanompo Aze reo anjele. ¹⁴ Vaho lafa voasambotse Jaona le avy tao Galilia Jesosy nitory ty filazantsara ty Andragnahare, ¹⁵ vaho nitalily tihoe: "Fa avy ty fotoa, vaho fa marine ty fanjaka ty Andragnahare. Mifona le matokia ty filazantsara." ¹⁶ Lafa nandeha tegne sisin-dranomasy ndre Galilia Re, le nahisake ahy ndre Simona naho Andrea rahalahy ndre Simona nagnarato, satria mpagnarato iareo. ¹⁷ Nanao tihoe Jesosy tamy iareo: "Avia magnaraha Ahike, te ataoko mpagnarato ndaty nareo." ¹⁸ Teo no eo le nagnenga ty harato iareo le nagnarake Aze ¹⁹ Lafa nandeha lavilavitse Jesosy le nahisake ahy ndre Jokaba ana ndre Zebedio naho Jaona rahalahine; ze tao an-tsambokele namboatse ty harato. ²⁰ Nikaike aiareo Reke le nengane tao an-tsambokele Zebedio babane niarake tamy reo mpikarama, le nagnarake Aze iareo. ²¹ Bak'eo le avy tao Kapernaomy iareo, vaho tamy ty andro Sabata, le nizilike tao amy ty Synagoga Jesosy vaho nampianatse. ²² Vere tamy ty fampianarane iareo, satria nampianatse aiereo manahake ty ndaty mana fahefa Re te tsy manahake reo mpanora-dalàgna. ²³ Bak'eo nisy lehilahy raeke tao amy ty Synagoga iareo ze nana fagnahy maloto nikoike mafe, ²⁴ nanao tihoe: "Ino ro hifandraisanay aminao, ry Jesosy bak'agne Nazareta? Avy hamotike anay vao Riha? Haitso tihoe ia Riha. Riha iaze Masy ty Andragnahare!" ²⁵ Nitsara mafe ty demne Jesosy le nanao tihoe: "Mitsigna vaho miboaha amine!" ²⁶ Vaho iaze fagnahy maloto nanota aze naho niboake tamine le nikaike tamy ty feo mahere. ²⁷ Vere ty ndaty iaby, le nafagnontane iareo tihoe: "Ino toy? Fampianara vaovao misy fahefa? Baikoine na le reo fagnahy maloto vaho magnina Aze iareo!" ²⁸ Ty vaovao mikasike Aze le niparitake tegne iaby tegny tao amy faritse ndre Galilia iaby. ²⁹ Lafa baka niboake ty synagoga, le avy tao an-tragno ndre Simona naho Andrea iareo, niarake tamy ndre Jakoba naho Jaona. ³⁰ Vaho ty rafozam-bavy ndre Simona nandre narary ty tazo, le nitalily iareo ahy ndre Jesosy ty mikasike aze. ³¹ Le namonje Re, le nandrambe aze tamy ty tagnane, vaho nandrene aze; le afake ty tazone, vaho nanomboke nanompo aiereo re. ³² Tamy io hariva io, tafara ty fitsofara ty masoandro, le nandesy iareo teo amine ze narare iaby na misy demone. ³³ Tafavore niarake teo am-baravara ty tao an-tanà iaby. ³⁴ Nagnafake ndaty maro ze narere ty arete samihafa Re vaho nandroake demone maro, te tsy nampone hitsara reo demone satria nahay Aze iareo. ³⁵ Nifoha maraindray bey Reke, laha mboe maike ty nadro; niala teo Re le nandeha tagne amy ty toera mitoka vaho teo reke ro nivavake. ³⁶ Nipay Aze Simona naho reo niarake tamine. ³⁷ Nahisake Aze iareo vaho nitalily tamine tihoe: "MIpay Anao ty ndaty iaby." ³⁸ Nanao tihoe Reke: "Ndao tika ho agne amy ty toeran-kafa, agne ambalike ao amy reo tanà magodidy, soa hazahoako mitory tegne agne kea. Te zay ro antone niboahako tatoy." ³⁹ Le nandesy ahy ndre Galilia iaby Reke, nitory tsara tao amy ty Synagoga iareo sade nandroake demone maro. ⁴⁰ Nisy ndaty voa ty angama raeke avy teo Amine vaho nitalily tamine tihoe: "Laha teanao le afake madio ahike Iriha." ⁴¹ Nahafirignay aze, le namelatse ty tagnane Jesosy vaho nikasike aze, nanao tamine tihoe: "Teako Miliova iriha." ⁴² Niala tamine eo noho eo ty angamay, vaho nalio re. ⁴³ Nametse mafe aze Jesosy vaho nandefa aze. ⁴⁴ Nanao tihoe Reke tamine: "Tandremo tsy hitalily na ino na ino ami ia na amy ia riha, te mandena, asehoy amy ty mpisoro ty vatanao, vaho manaova fagnatitse noho ty fagnadiova anao arake ty nandilia ndre Mosesy, soa ho fitsangana vavolombelo ho aiereo." ⁴⁵ Te niboake re vaho nanomboke nitilily tamy ty ndaty iaby naho nampiele loatse ty tsara le tsy afake nizilike an-kalalaha tagne amy ty tanà iaby sase Jesosy. Le nitoetse tagne ambalike tagne amy try toera mitoka Reke vaho namonje Aze ty ndaty bak'amy ty toera iaby.