¹ Nirehake tamy ndre Mosesy re Yaveh, nanao tihoe: ² "Mirehafa amy ty fiangona ty vahoagn'Israely iaby vaho talilio aiareo tihoe: 'Masy nareo, te Iaraho Yaveh Andragnaharenareo le masy. ³ Lonike ty kiraikiraike hiasy ty renine naho ty raene, vaho amben ty Sabatako, Iraho ro Yaveh Andragnaharenareo. ⁴ Ko miodike mandeha amy ty sampinareo zaka-foa, na mamboatse andragnahare vy ho anareo. Iraho ro Yaveh Andragnaharenareo ⁵ Laha magnatitse soro ty fagnatitse filongoa amy Yaveh nareo, lonike hagnatitse zane soa ho hinae. ⁶ Lonike ho tavae amy ty andro hagnateranareo aze zane, na amy ty hamarey igne. ⁷ Laha misy zaka tsy lane zisike iavia ty andro faha telo, le lonike ho oroa zane. Maloto zane laha mboe hotavae amy ty andro fahatelo. Lonike tsy ho hinae zane, ⁸ te ty kiraikiraike ze mitava zane le handay ty helone satria fa nanalatse zay zaka-masy Yaveh re. Lonike ho afaha eo amy ty vahoagne zane ndaty zane. ⁹ Laha mamokatse ty vokatse ty tanenareo nareo, le lonike nareo tsy hamokatse iaby ty zoro ty baibonareo, na kea hamory vokatsareo iaby. ¹⁰ Lonike nareo tsy hamory ty voaloboke iaby amy ty tane-boalobokareo, na hamory ty voaloboke zay milatsake amy ty tane eo amy ty tanem-boalobokareo. Lonike haponareo irey ho ahy ty tsy mana naho ty mbahine. Iraho ro Yaveh Andragnaharenareo. ¹¹ Ko mangalatse. Ko mavande. ko mamitake. ¹² Ko mifanta vande amy ty Agnarako na mandrarate ty Tahina ty Andragnaharenareo. Iraho ro Yaveh. ¹³ Ko mampijale ty mpiray monigne aminareo na mandrava aze. Lonike tsy hijano miarake aminareo amy ty halike iaby ke zisike ty maraindray ty karama ty mpikarama. ¹⁴ Ko magnozo ty gý na mametrake saka mandavo eo agnoloa ty goa. Te kea, lonike nareo hatahotse ty Anadragnaharenanreo. Iraho ro Yaveh. ¹⁵ Ko disoe ty fitsara. Ko magnete ty vatagn'ondaty satria tsy mana re, vaho ko mivamba vatagn'ondatty ambone re. Te kea, zakao arake ty fahamarigna ty mpiray monigne aminareo. ¹⁶ Ko mirerere magnaparitake tsikotsiko eo amy ty vahoakenareo, te mpaiavo ty hiarovanareo ty fiay ty mpiray monigne aminareo. Iraho ro Yaveh. ¹⁷ Ko malay ty rahalahinareo amy ty aronareo. Lonike nareo hitsara mafe amy tsy fiantsarabelatsihy ty mpiray monigne aminareo soa tsy hifampizanareo haratia noho ty amine. ¹⁸ Ko mamale fate na mitajake rakine agn'arofo amy reo vahoagnareo, te kea tiavo ty namanareo manahake ty vatagnareo. Iraho ro Yaveh. ¹⁹ Ambeno reo liliko. Ko magnandra mampagnarake ty bibinareo amy ty karazam-biby hafa. Ko mampiharo ty karazam-boa samihafa laha mambole amy ty tanem-bole. Ko manday akanjo natao tamy ty zaka roe karaza nampiharoe. ²⁰ Na ia na ia miarake-mandre amy ty andevo ampela zay voahatake ho vale, feie tsy niviliam-pagnavota na nomea ty fahafaha, le lonike iareo hosazia. Lonike tsy ho vonoa iareo satria tsy ndaty afake re. ²¹ Lonike handay ty fagnatitse noho ty heloke ho ahy Yaveh eo amy ty fiziliha ty ajomba-lay fihaogna ty lehilahy raike-aondre lahy raike ho fagnatitse noho ty heloke. ²² Le hanao fagnavota ho aze ty mpisoro miarake amy iaze aondre lahy ho fagnatitse noho ty faharatea ze nataone. Vaho le ho voavela ty haratia vitane. ²³ Laha avy eo amy ty tane nareo vaho mambole reo karazan-ketae fihane ty voane, le lonike nareo hagnenga ty voa zay vokary iareo soa ho voarara tsy ho tavae. Lonike ho voarara ty voa ho anareo agnate ty telo tao. Lonike tsy hotavae zane. ²⁴ Te amy ty tao fahaefatse le ho masy iaby ty voa iaby, ho fagnati-piantsa ho ahy Yaveh. ²⁵ Amy ty tao fahadimy le afake hitava ty voa nareo, satria nandigny nareo soa hazao reo hetae mamokatse bey bey vantae. Iraho ro Yaveh. ²⁶ Ko mitava herna laha mboe misy lio zane. Ko magnontane ty fagnahy mikasike ty ho avy, vaho ko mip[ay ty hamehy ty hafa amy ty here mihoatse ty voandragnahare. ²⁷ Ko magnarake ty fahazara ty mpiasa sampy manahake ty fagnarata ty sisy ty agnambonareo na magnombotse sisine bak'amy ty volom-bavanareo. ²⁸ Ko mandily ty vatagnareo ho ahy ty maty na magnisy marike tombokase amy ty vatagnareo. Iraho ro Yaveh. ²⁹ Ko manalatse ty anagnareo ampela amy ty fanaova aze ho mpijangajanga te ho lavo amy ty fijangajanga ty firenena vaho ho feno faharatia ty tane. ³⁰ Lonike nareo hiamby ty Sabatako vaho hagnomey hasy ty fitoera masy ty tabernakeliko. Iraho ro Yaveh. ³¹ Ko mihodike ho agne amy reo ze mirehake amy ty mate na amy ty fagnahy. Ko mipay aiereo, te laha tsy zane handoto anareo iareo. Iraho ro Yaveh Andragnaharenareo. ³² Lonike nareo hitsanga magnoloa ty ndaty foty voo vaho hagnomey hasy ty ndaty antitse. Lonike nareo hatahotse ty Andragnaharenareo. Iraho eo Yaveh. ³³ laha misy mbihiny mitiboke ao aminareo eo amy ty tanenareo, le lonike nareo tsy hanao rate aze. ³⁴ Lonike hanahake ty zana-tane Israelita mitoboke eo aminareo reo mbahiny ze mitoboke miarake aminareo, vaho lonike ho teanareo manahake ty vatagnareo tane amy ty tane Egypta. Iraho ro Yaveh Andragnaharenareo. ³⁵ Ko mampiasa fametara diso laha mametarse halava, lanja, hamaroa. ³⁶ Lonike nareo hampiasa vato meza marene, efaha marene vaho hina marene. Iraho ro Yaveh Andragnaharenareo, zay nanday anareo niboake ty tane Egypta. ³⁷ Inao reo liliko iaby naho lalàgnako iaby vaho hataovo irey. Iraho ro Yaveh.