¹ Nitsara tamy ndre Mosesy Yaveh, nanao tihoe: ² "Mirehake amy ndre Arona naho reo anandahine, naho amy ty vahoagn'Israely iaby. Tsarao aiereo zay nandilia Yaveh: ³ 'Ty lehilahy ao Israely zay mamono aombe, anank'aondre, naho ose eo amy ty kianja na mamono zane ambalike ty kianja, soa hanao soro zane__ ⁴ le laha tsy manday zane eo amy ty fiziliha amy ty anjomaba lay Fihaogna soa hagnatitse zane ho soro ho ahy Yaveh eo agnoloa ty tabernakeline re, le ho meloke amy ty fandatsaha-dio zane lehilahy zane. ⁵ Ty anto zane lily zane le ty soa handesane ty vahoagn'Israely ty soro iareo amy Yaveh eo amy ty fiziliha ao amy ty anjomba fihaogna, soa homey ty mpisoro ho fagnati-pilongoa amy Yaveh, te tsy hagnatitse soro ao amy ty baibo malalake. ⁶ Hamendrake ty lio eo amy ty alitara Yaveh eo amy ty fiziliha ao amy ty ajomba-lay fihaogna ty mpisoro; hagnoro ty loko ho ahy zane re soa hagnome hagnitse magnitse ho ahy Yaveh. ⁷ Lonike hagnatitse ty soro iareo amy ty sampe ose sase ty vahoake, te tamy zane ro nagnanova iareo fijangajanga. Ho lalàgna maharitse eo amy iareo hatramy ty taranake farane handimbe zane.' ⁸ Lonike iriha hitalily amy iareo tihoe: 'Na ia na ia lehilahy eo amy ty Israely, na mbahiny zay mitoboke eo amy iareo, magnatitse fagnatitse oroa na soro ⁹ le tsy maintse zane eo amy ty fiziliha ao amy ty ajomba fihaogna soa hanao soro zane ho ahy Yaveh, le lonike ho afaha eo amy ty vahoagne zane lehilahy zane. ¹⁰ Laha misy ndaty amy ty asaveregna ty Israely, na misy mbahine zay mitoboke eo amy iareo mitava lio, le handrava ty vatako hanohitse zane ndaty zane Raho vaho handany zane ndaty zane eo amy ty vahoagne Raho. ¹¹ Te ao amy ty lione ty fiay ty biby. Nomeiko anao ty lio zane soa hampisy fagnavota eo amy ty alitara ho ahy ty fiainareo, satria ty lio ro mampisy fagnavota, te ty lio ro magnonitse ty fiay. ¹² Noho zane le nitsara tamy ty vahoagn'Israely Raho soa tsy hisy hitava lio eo aminareo, na misy hitava lio zay mbahiny mitoboke eo aaminareo. ¹³ Na ia na ia amy ty vahoagn'Israely, na zay mbahiny mitoboke amy iareo, ze mihaza naho mamono biby na voro zay azo tavae, le handrarake ty lio zane vaho handebeke tane iaze lio. ¹⁴ Te ao amy ty lione ty fiay ty zaka-boare iaby. Zane ro nitaliliako tamy ty vahoagn'Israely tihoe: "Lonike nareo Tsy hitava ty lio ty zaka-boaare, satria ao amy ty lione ty fiay ty zaka-manam-piay iaby. Na ia na ia mitava zane le lonike ho roasine." ¹⁵ Ty ndaty kiraikiraike ze mitava biby fa maty na voaveravera ty bibi-ly, na zana-tane na mbahine iaze ndaty mitoboke eo aminareo, le lonike re hanasa ty akanjone vaho hampiandro ty vatane amy ty rano, vaho haloto re zisike hahariva ty andro. Le halio re bak'eo. ¹⁶ Te laha tsy manasa ty akanjone na mampiandro ty vatane re, le lonike re hizaka ty helone.'"