¹ Vaho niavy tamy Jona anake lahy ndr'Amitahy ty tsara Yaveh, manao tihoe: ² "Mitsangana vaho mindehana a Ninive agne, ze tana tena beveta, vaho mivolagna ty mikasike izay, satria fa niboake tagnoloako eo ty faharatia gniereo." ³ Fa nitsanga ty Jona mba hiala ty fagnatreha i Yaveh vaho nindeha tagne Tarsisy. Nizotso tagne Jopa re vaho nahisake sambo hindeha ho agne Tarsisy. Kea le naloane ty fore vaho nililtse tamy samboy ao niarake tamy iereo raho ho Tarsisy agne re, lavitse ty fagnatreha Nagnahare. ⁴ Fa nandefasa Yaveh tio-mafe tegne amity riake vaho nizare tafio-drivotse tegne amity riake zay. Tsiela tsiela teo le hisake fa ho poteke i samboy. ⁵ Vaho nizare natahotse mafe reo mpiondratsambo kea nikaike mafe ty Zagnaharene avao. Natora gniereo tan-driake agne ty enta tamy samboy ao mba hagnamaiva izay. Fa Jona kea nizotso laleke tamy samboy ao, vaho nitsilagne renoke ty roro tao. ⁶ Kea nagnato aze ty kapiteni-tsambo vaho nivola tamine tihoe: "Nanao akore riha ndra miroro? Mitsangana! Kaiho ty Zagnaharenao! Mete mba hahisake antika ty Zagnaharenao kea tsy mate tika." ⁷ Nifampiresake iereo iaby nanao tihoe: "Magnatogna, ndao tika hanao ankitsapake, mba hahafahantika mahay tihoe ia ro anto ze loza miseho amintika zao." Ka nanoe gniereo ty ankitsapake, vaho nivory amy Jona eo zay. ⁸ Le hoe iereo tamy Jona tihoe: " Mba volagno aminay rie tihoe ia ro anto gnizao loza miseho amintika zao. Ino ty asagnao, vaho bakaia riha? Ino ty firenegnao, vaho bakaia amity vahoake ia riha? ⁹ Hoe ty Jona tamy gniereo tihoe: "Hebreo raho; vaho matahotse ani Yaveh, iaze Zagnahare ty lagnitsey, ze nanao ty riake naho ty tane maike." ¹⁰ Vaho vaho maike niha-natahotse reo lahilahy ka nivola tamy Jona tihoe: "Fa ino ty nanoenao?" Fa hay gniereo lahilahy fa nilay ty fagnatreha Yaveh re, satria nivolagnene tamy iereo. ¹¹ Vaho hoe iereo tamy Jona tihoe: "Ino ty tokone ho anoenay aminao mba hampilamy ty riake ho anay?" Satria niha-nagnonja mafe le mafe ty riake. ¹² Hoe ty Jona tamy gniereo tihoe: "Rambeso raho atoraho an-driake agne. Vaho hilamy ho anareo ty riake, satria haiko fa naho iraho ty mahavy ze tafio-tioke ze hahazo aminareo." ¹³ Na le izay aza, le nialifiay mafe lahilahy reo mba hagnere iereo antamboho egne, feie tsy afake nanao izay iereo satria niha mafe ty riake nanohetse iereo. ¹⁴ Naho izay le nikaike mafe ani Yaveh iereo vaho nanao tihoe: "Mangatake aminao zahay, Yaveh, mangatake aminao zahay, ko enga ho mate naho ty ay ty lahilahy toy zahay, vaho ko melofa aminay ty fahafatezane, satria riha, Yaveh, le fa nanao arake ze to ty arofognao." ¹⁵ Kea le rinambe gniereo ty Jona vaho natora gniereo tagnate riake agne, vaho nijano tsy nisafoake i riakey. ¹⁶ Bakeo le natahotse mafe ani Yaveh lahilahy reo. Nagnomey soro ho ahy Yaveh iereo vaho nanao sareke. ¹⁷ Vaho fa nagnoma fia bevata hitele andre Jona ty Yaveh, ka nijano tagnate ty vavony i fia bevatay ao telo andro naho telohale ty Jona.