¹ Vaho Yaveh nitalily tsmy ndre Noa tihoe: "Miziliha ao amy iaze sambo-fiara iriha naho asaveragnanoa, satria iriha ro ndaty hisako te to eo agnatrehako amy toy taranake toy. ² Ty amy ty biby malio iaby le handesanao fito lahy naho fito zavy. Vaho ty amy reo biby tsy malio, le managala roe isane iaby, lahy naho vave. ³ Ty amy reo voro ty habakabake avao kea, le mangala fito lahy naho fito vavy , ho fiarova ty taranane etoy ambony ty tane. ⁴ Afara ty fito andro le handefa ora mafy agnate ty efapolo andro naho efapolo halike Raho. Haravako iaby reo zaka-mana-piay nihariko tetoy ambony ty tane." ⁵ Le natao ndre Noa zay iaby nandilia Yaveh aze. ⁶ Eninjato tao re Noa tamy ty fotoa niavia ty safo-drano tetoy an-tane. ⁷ Noa reo anandahine, ty valine, vaho reo vinantone ampela le niarake-nizilike tao ampo sambo-fiara noho ty rano ty safo-drano. ⁸ Reo biby malio naho reo biby maloto, reo voro, vaho reo zaka milaly amy tane, ⁹ le avy kiroekiroe, lahy naho vave, nandeha eo amy ndre Noa vaho nizilike tao amy sambo-fiara, arake ty fa nandilia ty Andragnahare ahy ndre Noa. ¹⁰ Vaho fito andro tatoy afara, le nanomboke niavy ty ora le naepoky ty rano ty tane. ¹¹ Tamy ty faha enenjato tao niaigna ndre Noa, vola faharoe, nadro faha folo fito amby ty vola, tamy io andro io avao, le niboake reo loharano lalike iaby amby ty ty tane, vaho nisokatse reo varavarakele ty lagnitse. ¹² nanomboke niavy agnate ty efapolo andro naho efapolo halike ty ora tetoy ambony ty tane. ¹³ Tamy io andro io avao re Noa naho reo anandahine, Sema, Hama, naho Jafeta, vaho ty valy ndre Noa, naho reo vinanto ampelane telo niarake amy iareo, le nizilike tao ampo iaze sambo-fiara. ¹⁴ Vaho iareo nizilike niarake tamy reo bibi-ly iaby sambe amy ty karazane iaby, naho ty biby fihare sambe arake ty karazane iaby, naho ty zaka mikisake amy tane sambe arake ty karazane iaby, vaho ty karazam-boro iaby sambe arake ty kazarane iaby, naho reo zaka-mana-piay managn'elatse kiraikiraike arake ty karazane iaby. ¹⁵ Avy kiroekiroe teo amy ndre Noa reo biby iaby manam-pofogn'ay saky ty karazane iaby vaho nizilike tao amy iaze sambo-fiara. ¹⁶ Reo biby zay nizilike tao le lahy naho ty vave saky ty karazane iaby; nizilike tao iareo arake zay nandilia ty Andragnahare aze. Bak'eo Yaveh nagnily ty varavara lafa tafilitse iareo. ¹⁷ bak'eo le avy tetoy an-tane agnate ty efapolo andro ty safo-drano, vaho nitombo ty rano le nandeha iaze sambo-fiara naho nanmpiakatse zane ho eo ambone ty tane. ¹⁸ Feno rano iaby ty tane, le nihafo tegne amobne rano iaze sambo-fiara. ¹⁹ Nisondrotse bey teo amy ty tane ty rano le feno iaby reo vohitse ambo iaby ambane ty lagnitse. ²⁰ Nihoatse dimy amby folo kilometatse tamy ty ambony ty vohitse ty rano. ²¹ Maty iaby reo zaka-mana-piay iaby zay nirererere tetoy ambone tane: reo voro, reo biby fihare, reo bibily, naho reo zaka-mana-piaya maro zay niay tetoy an-tane, vaho ty ondaty iaby. ²² Reo zaka-mana-piay iaby niaigne teto ambone ty tane, zay miay ty fofom-piay amy ty vava orone, le maty. ²³ Noho zane le rava iaby reo zaka-mana-piay iaby tetoy ambone tane, hatramy ty ondaty le hatramy ty biby fihare, naho reo biby mikisake, vaho ty voro ty habakabake, ravatetoy ambone tane iareo iaby. Noa naho reo zay niarake tamine tao agnate iaze sambo-fiara ro sisa tavela. ²⁴ TYsy nihena tambone ty tane agnate ty dimampolo amby zato andro iaze rano.