¹ Vaho Josefa tsy nahafehe ty fihitseha ty arofone teo agnoloa reo mpiasa ze nitsanga teo agnilane. Nitsara mafe re tihoe: "Tsy maintse miala ahike iaby." Le tsy nisy mpiasa nitsanga teo amine lafa nampahafantatse ty vatane tamy reo rahalahine re Josefa. ² Nitagny mafe re, le heno reo Egyptiana zane, vaho heno reo tao anjomba ndre Farao. ³ Nanao tihoe Josefa amy rei rahalahine: "Raho ro Josefa. Mboe velo va ty babako?" Tsy nahavale aze reo rahalahine, satria tofotse teo agnatrehane iareo. ⁴ Bak'eo Josefa nitsara tamy reo rahalahine tihoe: "Miharineha ahike, azafade." Le namonje marine iareo. Nanao tihoe re: "Iraho ro Josefa rahalahinareo, zay navilinareo tagne Egypta. ⁵ Ko malahelo na meloke amy ty vatagnareo ty amy ty nivarotanareo ahike tatoy, satria Andragnahare ro nampandeha ahike miaolo anareo soa hiarova ty fiainareo. ⁶ Satria teto amy toy tane toy ty kere agnate zay roe tao zay, vaho mboe hisy dimy tao ze hisy na fiasa tane na famokara. ⁷ Andragnahare nagnirake ahike hiaolo anareo soa hitahiry anareo ho sisa eto an-tane vaho hitanjake anreo ho velo amy ty fagnafaha befoloay. ⁸ Vaho naho zane tsy narei ro nampandeha ahike tatoy te Andragnahare, vaho reke nanao ahike ho baba ndre Farao, tompo ty anjombane iaby, naho mpanapake ty atne iaby magnera ahy Egypta. ⁹ Malaky vaho miakara agne amy ty babako le talilio amine tihoe: 'Zao ro ambara ndre Josefa anagnao: "Nataon'Andragnahare mpanapake ahy Egypta raike iaby raho. Mizotsoa atoy amiko, le ko mangatak'andro. ¹⁰ hitoboke amy ty tane ndre Gosena iriha vaho ho eo agnilako, iriha naho reo anagnao vaho reo anagny ty anagnao, naho reo aondre amy ty ose vaho reo aombe, naho ty fanagnanao iaby. ¹¹ Hagnampe anareo raho , satria mbo haharitse dimy tao ty kere, le tsy ho avy aminareo ty hararaha, aminao, naho tokantragnonao, vaho ze agnanao iaby."' ¹² Ingo, hisa ty masonareo, naho ty maso ndre Benjamina rahalahiko, te ty vavako ro mitsara aminareo. ¹³ Ho talilinareo amy ty babako ty mikasike ty hasiko atoy Egypta naho raraha iaby hisa ty masonareo. Mandena malake nareo vaho andeso mizotso atoy ty babako." ¹⁴ Nandrakoke ty vozo ndre Benjamina rahalahine re le nitagny, vaho Benjamina nitagny teo amy ty vozone. ¹⁵ Nagnoroke ty rahalahine iaby re vaho nitagny teo amy iareo. Tafara zay le nirahake tamine reo rahalahine. ¹⁶ Vaho nitalilie tao anjomba ndre Farao ty vaovao tihoe: "Avy reo rahalahy ndre Josefa." Nahafale vatagne andre Farao naho reo mpiasane zane. ¹⁷ Nanao tihoe Farao tamy ndre Josefa tihoe: "Talilio amy reo rahalahinao tihoe: 'Amboaro zao: aondrano ty enta ho andesy eo bibinareo vaho mandena agne amy ty tane Kanana. ¹⁸ Andeso ty babanareo naho ty tokantragnonareo vaho mandena atoy amiko. Homeiko anareo ty soa eto amy ty tane ndre Egypta, vaho hitava ty vondreky ty tane nareo.' ¹⁹ Vaho omea lily nareo tihoe: 'Amboaro zao, mangala sarety amy ty tane Egypta ho ahy ty anagnareo naho ty valinareo. Andeso ty babareo le mandena atoy. ²⁰ Ka misalasala ty amy reo fanagnanareo te nareo ze soa eto amy ty tane iaby magnera andre Egypta.'" ²¹ Kea le natao reo anagn'Israely zane. Nomey ndre Josefa sarety iareo arake ty nandilia ndre Farao, vaho nagomey aiereo vatia ho andesy egne an-dala. ²² Nomeine akanjo hisoloa iaby iareo, te benjamina kea nomeine sakely volafoty telonjato naho akanjo hisoloa dimy. ²³ Zao ro nalefane ho ahy ty babane: boriky lahy folo nanday reo zaka-soa ndre Egypta; vaho boriky vavy folo nanday vare naho mofo, vaho vatia hafa ho ahy ty babane andesy egne an-dala. ²⁴ Le nampandenanenreo rahalahine le lasa iareo. Nanao tihoe reke tamy iareo: "Ko mifamale egne an-dala nareo." ²⁵ Le niakatse bak'ao Egypta iareo le avy tagne amy ty atne Kanana, ho agne amy ndre Jokoba babane. ²⁶ Nitsara tamine iareo tihoe: "Mboe velo Josefa, vaho mpanapake ty tane Egypta raike iaby reke." Nivalike ty arofone, satria tsy nino ze natalily iareo aze. ²⁷ Natilily iareo tamine ty tsara iaby nambara ndre Josefa aiereo. Lafa hisa ndre Jakoba ty sarety ze nalefa ndre Josefa soa handesa aze, le velo ndraike ty fagnahy ndre Jakoba baba iareo. ²⁸ Nanao tihoe Israely: "Ampy zay. Moboe velo Josefa anako. Handeha raho vaho hivamba aze miaolo ty havilasiko."