¹ Nivamba ambone jakoba vaho, ingo Esao namonje, vaho nisy lehilahy efajato niarake tamine. Nizara ndre Jakoba tamy ndre Lea, Rahely, vaho reo mpiasa ampela reo ajaja. ² Bak'eo le napone tegne aloha reo ampela mpiasa naho ty anagn'iareo, narahy ndre lea naho reo anane, vaho narahy ndRahely naho Josefa ty farane loatse. ³ Reke avao ro nadeha niaolo aiereo. Nihohoke impito teo amy ty tane re, mandra-piaviane teoagnila ty rahalahine. ⁴ Nilailay soa hanalaka aze Esao, nandrakoke aze, nitanjake ty tendane vaho nagnoroke aze. Bak'eo le nitomagny iareo. ⁵ Lafa nivamba ambone Esao, le nahisake reo ajaja amin'ampela re. Nanao tihoe re: "Ia reo ndaty miarake aminao reo?" Nanao tihoe Jakoba: "Reo ro anjaja zay nomey ty Andragnahare tamy ty fahasoava ho ahy ty mpiasanao." ⁶ Bak'eo nandeha tegne aloha iaze ampela mpiasa niarake tamy reo anane, vaho nihohoke iareo. ⁷ Bak'eo le namonje tegne aloha avao kea Lea naho reo anane vaho nihohoke. Vaho farane Josefa naho Rahely namonje tegne vaho nihohoke. ⁸ Nanao tihoe Esao: "Ino ro anto ty nandefasana rey fizarana iaby nifanala tamiko rey?" Nanao tihoe Jakoba: "Soa hahazoa sitrake eo amy ty fanjo ty tompoko." ⁹ Nanao tihoe Esao: "fa mana ty ampe raho, rahalahiko. Tano ho ahy ty vatanao zay anagnanao." ¹⁰ Nanao tihoe Jakoba: "Aha, mangatake ragnandria, laha fa nahisake fitea eo amy ty fanjonao raho, le ekeo ty fagnomeza bak'amiko, zay eo an-tagnako, eka vatane, fa nahisake ty tarehinao raho, vaho manahake ty mahisake ty tarehy ty Andragnahare zane, vaho le nirambesinao raho. ¹¹ Soa rambeso ragnandria ty fagnomeza zay nandese ho anao, satria fa nagnome fahasoava ahike Andragnahare, vaho satria fa mana ty ampe raho." Le manahake zane ro nandrisiha ndre Jakoba aze, vaho neke ndre Esao zane. ¹² Vaho nanao tihoe Esao: "Ndao tika hiala. Handeha eo aolonareo raho." ¹³ Nanao tihoe Jakoba tamine: "Ty tompoko le mahay te mboe kele reto ajaja, vaho mboe miteza ty anane reo aondre naho amobe. Laha andesy mafe na ndraik'anddro avao kea iareo, le ho maty iaby reo biby iaby. ¹⁴ Apoho ragnandria ty tompoko handeha hiaolo ty mpanompone. Handeha moramora avao raho, arake ty famindra reo biby fihare zay eo alohako, vaho arake ty lia reto ajaja, mandra-piaviako agne amy ty tompoko age Seira." ¹⁵ Nanao tihoe Esao: "Apoko hajanoko aminao ty sasane amy reo lehilahy miarake amiko." Te nanao tihoe Jakoba: "Nanao akore ro manao zane? Fa ampe ty hasoam-pagnahy ty tompko tamiko." ¹⁶ Kea le nanomboke ty liane himpoly ho agne Seira re Esao tamy io andro io. ¹⁷ nandeha tagne Sokota re Jakoba, namboatse tragno ho aze, vaho nanao fitsoloha ho ahy reo biby fiharene, Noho zane le kinaike tihoe Sokota io toera io. ¹⁸ Lafa bak'agne Padana-Arama re Jakoba, le avy soa tao amy ty tanà ndre Sekema, zay tao amy ty tane kanana. Nagnianja teo agnila ty tanà re. ¹⁹ Bak'eo re nivily ty ampahan-tane zay nagnoregnane ty laine tamy ty ana ndre Hamora, rae ndre Sekema, tamy ty volafoty malinike zato. ²⁰ Teo ro nagnoregnane alitara vaho kinaine tihoe El-Elohe Israely zane.