¹ Niaigne fito amby roapolo ambe zato tao re Saraha. Zane ty tao niaigna ndre Saraha. ² Saraha le maty tao Kiriata Arba, zane hoe, Hebrona, tao amy ty tane Kanàna. Nisao naho nitomagny ahy ndre Saraha re Abrahama. ³ Bak'eo le nitsanga le niala bak'eo amy ty havilasy ty valine, vaho nirehake tamy reo anandahy ndre Heta, nanao tihoe: ⁴ "Bahiny raho eto aminareo. Omeo toera fandevegna eto aminareo ragnandria raho, soa hazahoako mandevy ty havilasy zay ahike." ⁵ Namale ahy ndre Abrahama reo anandahy ndre Heta, nanao tihoe: ⁶ "Mitsanogna anay, tompoko. Andragnahare-bey ahy ty Andragnahare eto aminay iriha. Alevegno amy reo valavatonay zay safilinao loatse ty faty ty valinao misy na ia na ia aminay handà zane valavato zane ho anao, soa hazahoanao mandevy ty faty ty valinao." ⁷ Nitsanga Abrahama le nandohalike tamy reo ndaty teo an-toera, tamy reo anandahy ndre Heta. ⁸ Nitsara tamy iareo re, nanao tihoe: "Laha manaike nareo te tokone handevy ty faty ty valiko raho, le heno raho vaho hangataho re Efrona anandahy ndre Zohara, ho ahike. ⁹ Angataho re soa hivarotse amiko iaze lava-bato ndre Makpela, zay aze, agne amy ty fara ty sahane. Amy ty viline feno le lonike re hamarotse zane amiko ampahibemaso hanahake ty fanagna ho toera fandevegna." ¹⁰ Vaho Efrona nitoboke teo amy reo anandahyndre Heta, vaho Efrona iaze Hetita namale ahy ndre Abrahama soa ho heno reo anandahy ndre Heta, naho reo iaby zay avy teo amy ty vavahady ty tanàne, nanao tihoe: ¹¹ "Aha, tompoko, tsanogno raho. Nagnome baibo anao raho, naho ty lava-bato zay ao amy zane. Nomeiko ho anao teo agnatreha reo anandahy ty ndatiko zane. Omeiko anao zane soa handevagnanao ty havilasy zay anao." ¹² bak'eo Abrahama nampihohoke ty vatane nagnoloa ty ndaty teo an-toera. ¹³ Nitsara tamy ty Efrona re soa ho heno ty ndaty teo amy iaze tanà, nanao tihoe: "Feie laha teanao, tsanogno ragnandria raho. Ho viloko ty baibo. Rambeso ty ndrala bak'amiko, vaho handevy ty havilasy ty valiko egne raho." ¹⁴ Efrona namale ahy ndre Abrahama, nanao tihoe: ¹⁵ "Lonike ragnandria, tompoko, minjanjigna ahike ragnandria. Sekely volafoty efajato ro tendreke ty ampahan-tane raike, ho ino amintika naho iriha zane? Alevegno ty havilasy ty valinao." ¹⁶ Ninjanjigny ndre Abrahama re efrona le nilanjaene ho ahy ndre Efrona ty volafoty ze nirehafine soa ho heno reo anandahy ndre Heta, sekely volafoty efajato, arake ty fandanja mahazatse ty mpivarotse. ¹⁷ Noho zane ty tane ndre Efrona, zay tao Makpela, teo agnila ndre Mamre, zane hoe, iaze baibo, iaze lava-bato ze ao amy zane, naho reo hetae iaby zay eo amy ty tane naho magnodidy ty sisine, le lasa ndre ¹⁸ Abrahama tamy ty fivilia zane teo agnatreha reo anandahy ndre Heta, teo agnatreha reo iaby ze avy reo amy iaze vavahady ty tanàne. ¹⁹ Tao afara zane, le nandevy ahy ndre Saraha valine tao amy iaze lava-bato iaze baibo ndre Makpela re Abrahama, ze teo agnila ndre Mamre, zane hoe, Hebrona, tao amy ty tane kanana. ²⁰ Noho zane ty baibo naho ty lava-bato ao zay le lasa fanagna ndre Abrahama ho toeram-pandevegna, zane le bak'amy reo anandahy ndre Heta.