¹ Nandeha niala teo Abrahama le nandeha agne amy ty tane Negeva, vaho nitoetse amy ty tane Negeva, vaho nitoetse teo agnelagnela ndre Kadesa naho Sora. Bahine nitoboke tagne Gerara re. ² Nandesine ty mikasike ahy ndre Saraha valine Abrahama tihoe: "Anabaviko re." Noho zane le nandefa reo lehilahine re Abimeleka mpanjaka ndre Gerara vaho nala iareo re Saraha. ³ Te Andragnahare niseho tamy ndre Abimeleka tamy ty nofy ty halike, vaho nitsara tamine tihoe: "Ingo, ho maty iriha ty lehilahy noho ty ampela nalanao, satria valy ndaty re." ⁴ Vaho Abimeleka tsy mboe naharinike aze le nanao tihoe re: "Tompo, ho vonoanao kea vao na ty firenena marene kea? ⁵ Tsy reke avao vao ro nisara tamiko tihoe: 'Anabaviko re? Na reke vantane kea le nitsara tamiko tihoe: 'Anadahiko re.' Nataoko tamy ty hitim-poko zane vaho tamny ty tagnako tsy manan-tsikone." ⁶ Bak'eo Andragnahare nitsara tamine tamy ty nofy tihoe: "Eka, fe haintso kea te tamy ty hitsy ty arofonao ro nagnanovanao zane, vaho fe niaro anao tsy hanao rate amiko avao kea raho. Noho zane, tsy napipoke anao hikasike aze raho. ⁷ Le noho zane, ampolio valy ty lehilahy, tse mpitoky re. Hivavake ho anao re, vaho ho velo iriha. Te laha tsy ampolinao re, le dineho te vantane ho maty vantane iriha naho ze iaby anao." ⁸ Nifoha mraindray bey Abimeleka vaho nikaike reo mpiasane iaby ho eo amine. Nitaliliene tamy iareo zane zaka iaby zane, vaho le natahotse mafe re lehilahy, ⁹ Bak'eo Abimeleka nampikaike ty ahy ndre Abrahama le nanao tamine tihoe: "Ino toy nataonao taminay?" Nanao akory ty nanaovako raty taminao, ro nandesanao haratia lehibey teo amiko naho ty fanjakako iriha? Nataonao tamiko ze tsy tokoone natao." ¹⁰ Nanao tihoe Abimeleka tamy ndre Abrahama: "Ino ro nanosike anao hanao zao zaka zao? " ¹¹ Abrahama nitsara tihoe: "Satria nandinike raho tihoe: 'Azo antoke te tsy misy tahotse ahy ty Andragnahare amy toy toera toy, vaho hamono ahike iareo noho ty amy ty valiko.' ¹² Vaho kea, anabaviko vantane re, anak'ampela ty raeko, te tsy anak'ampela ty reneko; vaho lasa valiko re. ¹³ Lafa nahaavy ahike handao ty ajomba ty babako naho nampifalofalo toera ahike Andragnahare, le nanao tihoe raho tamine: 'Tsy maintse asehoanao amiko amy ty maha-valiko anao toy fahatokia toy: agne amy ze toera iaby zay andenantika, le rehafo ty mikasike ahike tihoe: "rahalahiko re."" ¹⁴ Bak'eo nangalake aondre naho aombe, ondevo lahy naho ampela abimeleka, vaho nagnome zane ahy ndre Abrahama. Bak'eo nampoline tagne amine re Saraha, valy ndre Abrahama. ¹⁵ Nanao tihoe Abemeleka: "Ingo, eo agnoloanao ty taneko. Mitoera amy ze mete aminao." ¹⁶ Nanao tihoe re tamy ndre Saraha: "Ingo, nomeiko sekele volafoty arivo ty rahalahinao. Zane le soa ho tampemaso amy ty fandikan-dily natao anao teo amaso reo ndaty iaby zay miarake aminao, vantane nanao ty to iriha." ¹⁷ Bak'eo Abrahama nivavake tamy ty Andragnahare, vaho Andragnahare nagnafake ahy ndre Abimeleka, ty valine, vaho reo ondevo ampelane soa hazahoa iareo anake. ¹⁸ Satria Yaveh ro nahaavy ty ampela iaby tao agn'ajomba ndre Abimeleka tsy hisamake iaby, noho re Saraha, valy ndre Abrahama.