¹ Tao afara reo raraha reo e avy tamy ndre Abrama tamy ty fahisaha ty tsara Yaveh, nanao tiheo: "Ko matahotse, Abrama! Iraho ro fiaronao naho valesoa lehibey loatse ho anao ." ² Nanao tihoe Abrama tihoe: "Tompo Yaveh, ino ro homeinao ahike, satria tsy mboe managn'anake avaho raho, vaho re Eliziera bak'agne Damaskosy ro mpandova ty ajombako?" ³ Nanao tihoe Abrama: "Satria tsy nomeinao taranake raho, le ingo, ty mpitan-draraha ty ajombako ro mpandova ahike." ⁴ Bak'eo, le ingo, avy tamy ty tsara Yaveh, nanao tihoe: " Tsy ho mpandova anao zane lehilahy zane; te ze bak'amy ty nofotsinao avao kea ro ho lasa mpandova anao." ⁵ Le nanday aze niboake Re, vaho nanao tihe: "Vambao ty lagnitse, vaho isafo reo vasia, laha afaky ty hagnisaky reo iriha." Bak'eo le nitsara tamine Re tihoe: "Le hanahaky zane reo taranagnao." ⁶ Nino ahy Yaveh re, vaho nisafine ho fahamarigna ho aze zane. ⁷ Nitsara tamine Re tihoe: "Iraho ro Yaveh, zay nanday anao niboake bak'ao amy ty Ora ty Kadeanina, soa hagnome anao toy tane toy soa handova zane." ⁸ Nanao tihoe re: "Ty Tompo Yaveh, nanao akore ro hahaizako te handova zane raho?" ⁹ Bak'eo nanao tihoe Re tamine: " handesanao anak'aombe vave telo tao raho, aose vavy telotao, aondre vave telo tao, voromahilala, vaho ana-boromahilala." ¹⁰ Nandesine teo amine iaby reo iaby reo, vaho nanapake reo ho roe, le napipoke ty antsasane kiraikirake iaby nifagnatrike, te reo voro kea tsy nizarane. ¹¹ Laha vao nizotso teo ambony ty karakasy re voro ty tindroke, le niroahy ndre Abrahama iareo. ¹² Vaho lafa nitsofotsy ty masoandro, le latsake tao ampo ty tori-maso lalike re Abrama vaho, ingo, nisy ieke lalike naho nampihororo nandifotse aze. ¹³ Le nitsarane tamy ndre Abrama Yaveh tihoe: "Haintso te marine reo taranagnao le ho mbahiny amy ty tane zay tsy aiereo, vaho ho andevozy naho ampijaly agnate ty efajato tao. ¹⁴ Hitsara zane firenena zay ho tompoy iareo zane Raho, vaho lafa afake zane le hiboake miarake amy ty fanagna maro iareo. ¹⁵ Te iriha le ho agne amy ty razambeinao am-piadagna, vaho ahalevy amy ty fahantera. ¹⁶ Agne amy ty taranake faha efatse le ho avy eto ndraike iareo, te ty hilogny reo Amorita le tsy mboe nahatratse ty fetrane." ¹⁷ Lafa nitsofotse ty masondro vaho maieke, le ingo, nisy valagny niboake setrok'afo naho jiro nandalo teo agnelagnela reo singane. ¹⁸ Tamy io andro io le nanao fagneke niarake tamy ndre Abrahama Yaveh, nanao tihoe: "Homeiko ho ahy ty taranagnao etoa toy tane toy, manomboke amy ty vavarano ndre Egypta le hatragny amy vavarano lehibey, Eofrata__ ¹⁹ reo Kenita, Kenizita, Kodmonita, ²⁰ Hetita, Perizita, Refaita, ²¹ amorita, Kananita, Girgasita, vaho reo Jebosita."