¹ Tamity tao voalohane nanjaka Kyrosy, mpanjaka Persia, le namita ty tsara ze naboa ty vava ndre Jeremia, vaho nivola ty fagnahy Kyrosy ty Yaveh. Niboake nifeno ty fanajakane iaby ty feo Kyrosy. Ezao ro voasoratse naho vitatsara: ² "Kyrosy, mpanjaka Persia,le mivola tihoe: Yaveh, Zagnahare ty lagnitse, ro magnomey ahy ty fanjaka iaby amity tane, vaho ntingy ahy hagnore tragno a Jerosalema agne a Joda agne ho aze. ³ Ndre ia ndre ia bakamity vahoane( lonike hiarake aze ty Zagnaharane) le afake miboake a Jerosalema agne vaho hagnore tragno ho ahy Yaveh, Zagnahare Israely, iaze Zagnahare ze ahy Jerosalemay. ⁴ Ty ndaty ze agnate ty fanjaka ze nitoboha sisa velo reo amignize tane zay ao le tokone hagnomey iereo volafoty naho volamena, hanagna naho biby, vaho raketse sitrampo ho ahy ty tragno Nagnahare a Jerosalema agne." ⁵ Bakeo nitsanga loha razagna longo dre Joda naho Benjamina reo, mpisoro naho Levita reo, vaho ty iaby ze nindese Nagnahare ty fagnahine mba handeha naho hagnore ty tragnone. ⁶ Nagnody aze reo le nanoha ty sata gniereo tamity zaka volafoty naho volamena, hanagna, biby, zaka soa, vaho raketse. ⁷ Naboa gny Kyrosy mpanjaka avao kea zaka tan-tragno gn'Yaveh ao ze nindese Nebokadnezara baka Jerosalema agne reo vaho napone tamity tragno Zagnaharene avao reo. ⁸ Napo gny Kyrosy tan-tagna Mitredata ao mpagnajary vola reo, ze nagnisake reo ho ahy Sesbazara, miparitake ahy Joda zay. ⁹ Intoa ty isa gnireo: kovete volamena telopolo, koveta volafotsy arivo, koveta sive amby ropolo hafa, ¹⁰ finga jobo volamena telopolo, finga jobo volafoty 410, vaho zaka hafa arivo fagnampene. ¹¹ Nisy enta atragno 5400volamena naho volafoty laha aharo. Nindese Sesbazara iaby rei lahafa niala baka a Babylona agne nimba Jerosalema mbeo sesentane reo.