¹ Vaho nitagny tantsofiko eo tamity feo mafe re, nanao tihoe: "Ao hiboake antana ao mpiambe reo, miarake amity fiasa mpialia fandrobaha antagnane egne iaby." ² Vaho ingo! Nisy lahilahy ene niavy bakamity lala ty vavahady ambone agne mitolike miagnavaratse, sambe niarake tamity fiasam pialia famonoa tan tagnane egne iaby. Nisy lahilahy raike nisiky lombone foty niarake tamina fiasa ty mpanora dily tagnilane eo tagnivoa gniereo eo. Kale nilitse iereo vaho nintsanga tagnila ty alitara varahy eo. ³ Vaho ty hasy Nagnahare Israely niboake bakao amity kerobima ze tan davan tragno ty tragno eo. Nikaike ilahilahy nisiky sarondoha foty ze nana ty fiasa ty mpanora dily tagnilane tegne re. ⁴ Hoe Yaveh tamine tihoe: "Mandehana agnivoa ty tana eo-agnivoa Jerosalema-vaho asio hahaia aze ty amity handry gnireo ze mitoreo naho misefosefo ty amy vetaveta iaby reo nanoe tagnivoa ty tana eo." ⁵ Vaho nivola tamy hafa reo tantsofiko eo re tihoe: "Mandehana magnorike aze antana ao vaho vono. Ao tsy hana feregnay ty masonao, vaho ko miferegnay ⁶ ndra ndaty antetse, tanora, mboe tsy mahavany lahy, kolo madineke na ampela. Vono iaby iereo! Atombo amity fitobohako masy ao!" Kale nanomboke tamy roandria reo ze tagnoloa ty tragno iereo eo. ⁷ Hoe re tamy gniereo tihoe: "Loto tragno, vaho feno fate ty antane malala gnizay. Miboaha!"Ka niboake iereo vaho nanafike ty tana. ⁸ Laha mboe nanafike izay iereo, le hisako fa raike avao raho vaho nagnohoke ty tareheko raho vaho nitoreo nanao tihoe: "Henhe, gea Tompo Yaveh, handrava sisa tavela Israely iaby reo amity fandraraha ty siakenao amy Jerosalema vao riha?" Hoe re tamiko tihoe: "Tafahoatse vatane ty hadisoa ty foko Israely naho Joda. Feno lio ty tane vaho feno zaka ratiraty ty tana, satria hoe iereo tihoe: 'Fa nagnaligno ty tane ty Yaveh, vaho tsy mahisake ty Yaveh!' ¹⁰ Kea naho izay, tsy hagnete aman peregnay ty masoko, vaho tsy hitsitsy iereo raho. Fa hinday ze iaby zay ho an Doha gniereo kea raho." ¹¹ Ingo! Nihere ilahilahy nilomboke foty nana ty fiasa ty mpanora dily tagnilane egne. Ninday izay vaho nivola tihoe: "Fa nanoeko ze iaby nandilianao ahy."