¹ Vaho tamity tao fahene naho ty vola fahene, tamity andro fahadime ty vola, laha nitoboke an-tragnoko ao raho vaho roandria Joda reo nitoboke tagnoloako eo, le nipoke amiko eo ndraike ty tagna ty Tompo Yaveh. ² Ka nagnete raho, vaho Ingo, nisy pozy ndahilahy. Nisy afo nanomboke tamity agnilane mizotso. Vaho nanomboke tamity ilane miakatse le nanahake zaka mamiratse, manahake ty vy mamiratse. ³ Vaho nanonjotse manahake ty tagna re ke nandrambe ahy tamity volon dohako; nanondrotse ahy tagnivoa ty tane eo naho ty lagnitse eo ifagnahy, vaho tamy fahisaha reo bakamy Nagnahare, ro nindaisane ahy ta Jerosalema agne, tamity filira agnate ty vavahady avatatse bevata. ⁴ Vaho Ingo, ty hasy iaze Zagnaharey Israely le tao, amity fahisaha ze hisako tamity tane maleme eo. ⁵ Vaho hoe re tamiko tihoe: "Nareo anagn'ondaty, asondroto miagnavaratse ty masonao."Ka le nasondroko miagnavaratse ty masoko, vaho tavaratse eo ty vavahady mbamity alitara mbeo, tamity filira, iaze aoly ty hasaroteney. ⁶ Ka hoe re tamiko tihoe: "Nareo anagn'ondaty, mahisake ze anoe gniereo vao riha? Reo le vetaveta bevata ze anoe ty longo Israely eto hampiala lavitse ahy amity fitobohako masy eo. Fa hitolike riha vaho hahisake vetaveta bevata kea aza." ⁷ Bakeo le nindesene tandala ty tane malalakeo raho, vaho nagnete, le nisy lavake raike tamity rindry. ⁸ Hoe re tamiko tihoe : "Nareo anagn'ondaty, lavao rindry io." Kea nandavake irindry raho, le nisy lala. ⁹ Vaho hoe re tamiko tihoe: "Mandehana vaho henteo ty zaka ratiraty mampangory anoe gniereo." ¹⁰ Ka nilitse raho vaho nagnete, vaho Ingo! Nisy karazan jaka milaly naho biby raty! Ty aoly ty foko Israely iaby le sinokitse tamity rindry feno ty tane iaby. ¹¹ Nisy roandria ndahy gn'Israely fitompolo tao, vaho Jazania anake lahy Safana le nintsanga tagnivoa gniereo eo. Nitsanga tagnoloa saren jaka sokire reo eo iereo, vaho ty lahilahy kiraidraike le sambe ninday ty findaisa afone tatagnane egne avy hagnakatse ty fofon tsetsoke ty linten ketae. ¹² Hoe re tamiko: "Nareo anagn'ondaty, hisanao vao ty anoe roandria ty longo Israely amity ieke ao? Ty kiraidraike le sambe manao izay amity efetse miviny ao ty aoline, fa hoe iereo tihoe: 'Tsy mahisake antika Yaveh! Fa nafoe gn'Yaveh ty tane."" ¹³ Vaho hoe re tamiko: "Mitoliha ndraike vaho henteo zaka raty bevata hafa anoe gniereo reo."" ¹⁴ Bakeo nindesene nimbamity vavahady filira an tragno gn'Yaveh ao ze tamity ilane avaratse raho, vaho Ingo! Nitoboke nandala ani Tamoza tao ampela reo. ¹⁵ Ka hoe reke tamiko: "Hisanao vao zao, nareo anagn'ondaty? Mitoliha ndraike vaho henteo zisikamy vetaveta bevata reo naho reo aza. ¹⁶ Nindesene tamity tane malalake agnatene tan-tragno Yaveh ao raho, vaho Ingo! tamity filira tamity tempoly Yaveh tagnivoa ty lavaranga eo naho ty alitara, le nisy lahilahy tamity dime amby ropolo teo ho eo nagnomey lambosy ty tempoly Yaveh vaho niantignana ty tarehe gniereo, vaho nanompo ty masoandro iereo. ¹⁷ Hoe re tamiko tihoe: "Hisagnao vao zao, nareo anagn'ondaty? Feie vao zaka kele ho ahy ty longo Joda ty fanova zaka ratiraty ze anoe gniereo eto reo? Fa fa fineno gniereo hereloha ty tane vaho mboe nivio soa hila ahy amity siako ndraike iereo, tamity fampipoha raven ketae amity oro gniereo eo. ¹⁸ Kea hiasa amy gniereo eo avao kea raho; tsy hana feregnay ty masoko, vaho tsy hitsetse iereo raho. Ndra le mitagny amity feo mafe antsofiko eo aza iereo, le tsy hinjajy iereo raho."