¹ Vaho tamy ty tao faharaikambin'ny folo,tamity vola fahatelo, tamity andro voaloha ty vola, le niavy tamiko ty safa Yaveh, nanao tihoe: ² "Ty ana gnondaty, volano amy Farao, vaho amity vahoakene iaby magnodidy aze tihoe: 'Ao amity fahabeazanao, manahake ania riha? ³ Ingo! Asyria le sedera nisy jeba soa tarehe tao Libanona, nagnomey alokalo ho ahy ty ala, vaho ty jebane nagnanike ty raho. ⁴ Rano maro ro nahalava izay; ty rano laleke ro nahabevata izay. Nikoriake nagnodidy ty faretse iaby nisy aze ty renerano, satria ty lakan-dranone le nivelatse tamity hetae iaby tan-baibo ao. ⁵ Ty hahabone le nihoatse naho ty hetae hafa iaby tan-baibo agne, vaho ty jebane le ninjare maro vatane; niha-lava ty jebane naho reo rano maro laha nagniry igne iareo. ⁶ Nanao ty akane tamity jebane ty voro ty lagnitse iaby, laha niterake ty anane tam-bane ty ravene ty zaka managnay iaby tam-baibo ao. Nitoboke tambane ty alo ty firene maro iaby. ⁷ Fa soa tarehe zay tao amity fahabeizane naho ty halava ty jebane, satria tao amity rano maro ty vahane. ⁸ Tsy afa nitaha tamy zay reo sedera tamity baibo Nagnahare ao. Tsy nisy tamy reo kypreso ro mitovy tamity sampane, vaho ty hetae platana tsy nitaha tamity ravene.Tsy nisy hetae hafa tamity baibo Nagnahare ao ze nitovy tamy zay tamity hasoane. ⁹ Nanoeko soa tarehe tamity sampane maro zay vaho ty hetae i Edena iaby ze tao amity baibo Nagnahare le nialo izay. ¹⁰ Naho izay le izao ro safa i Tompo Yaveh: Satria lava tamity haabone re, vaho tagnelagnela ty sampane ro natobone ty tendrone, nanondrotse ty arofone zay noho ty haabone. ¹¹ Nameako tatagna iaze raike mahere gniareo firene re, mba hifampiraharaha amy zay arake ze sahaza ty haratiane. Fa nariako tagne ambalike zay. ¹² Iareo vahiny ze horohoro ty firene iaby ro nanampake aze ka nagnega aze ho mate. Nitonta tam-bohitse eo naho reo loha-baibo iaby ty sampane, vaho reo ravene le lasa potepoteke ao amity riake ty tane iaby. Le niboake bakao ambane ty alone ty firene iaby tan-tane eto vaho niala lavitre zay. ¹³ Ty voro ty lagnitre iaby le nijano teo amity vata iaze hetae nitonta, vaho ty biby iaby tan-babo ao le nimbeo amity sanpane. ¹⁴ Niseho zay mba tsy hisy hetae hafa hitiry ty agnila ty rano ka hananga ty ravene zisikegne amity haabo ty hetae abo vatane, vaho mba tsy hisy hetae hafa hitiry ty agnila ty rano ka hahatratre ze haabo zay. Fa voafily ho amity havilasy iaby iereo iaby, ho agne ambane tane, eo amy reo ana gnondaty, miarake amy reo ze mizotso an-davake agne. ¹⁵ Ezao ro safagne i Tompo yaveh: tamity andro ze nizotsoa iaze sederay tagne amity fiaigna tsy hisake le ninday fandala tan-tane eto raho.Natakoko tambone izay eo ty rano laleke, vaho nahemoko ty rano ty riake bey. Nisakaneko ty rano bey, vaho ninday fandala tamity Libanona eo ho aze raho. Ka le nandala ty hetae ty baibo iaby naho izay. ¹⁶ Ninday tahotse tamy reo firene tamity feo ty fitontane raho, lahafa natorako tagne amity fiagna tsy hisake niarake tamy reo ze nizotso tan-davake agne reke. Kale nampahere ty hetae i Edena iaby tagne amity fagnambanea ty tane raho. Irey ro hetae voafily naho soa vatane andre Libanona; le reo hetae ze nino ty rano. ¹⁷ Fa nizotso tagne amity fiaigna tsy hisake niarake tamy zay avai kea reo, ho agne amy reo ze mate ty meso, Irey ty vata ty mahery, reo firene ze nitoboke tamity alokalone, ¹⁸ Ia tamy reo hetae ta Edenao ro mitovy aminao amity hasy naho habevata? Fa hazera miarake amy reo hetae i Edena ho agne amity fagnambanea ty tane eo amy reo tsy vita tampake riha; hiay manahake reo ze mate ty meso riha.' Farao naho ty vahoakene iaby zay-izay ro fitalilia ty Tompo Yaveh.''