¹ Tamity ty tao fahafolo,tamity vola fahafolo tamity fotoa faharoe ambiny folo ty vola, le niavy tamiko ty safa Yaveh, nanao tihoe: ² "Ty ana gnondaty, ampifagnatreho amy ndre Farao, iaze mpanjaka i Egyptay ty tarehenao; mitokia mandietse aze naho mandiera ani Egypta iaby. ³ Talilio vaho volagno tihoe: 'Ezao ro safa ty Tompo Yaveh: Ingo! Mandietse anao raho, Farao, mpamjaka i Egypta. Iriha, iaze biby masiake bevatay ze mivony agnivoa ty renerano eo, ze manao tihoe: "Ahy ty reneranoko. Nanoeko ho ahy ty vatako zay." ⁴ Haisako vaitse ty valagnoranao, vaho ty fia ty Neily le handiteke amity kiranao; hampiboaheko bakeo agnivoa ty reneranonao miarake amity fia ty reneranonao ze manditeke amity kiranao riha. ⁵ Hatorako agnefetre agne riha, iriha naho ty fia iaby bakao amity renerano. Hotonta amity baibo ao riha; tsy ho avory riha na hampiakare. Hameako ho hane ho ahy reo zaka managnay ty tane naho ho ahy reo voro ty lagnitre riha. ⁶ Bakeo amity ndaty i Egypta iaby hahay fa iraho ro Yaveh, satria tefa taho-bolotara ho ahy ty foko Israely iareo. ⁷ Lahafa nandrambe anao tantagnane egne iareo, le tapake riha vaho nisokafenao ty soro gniareo; vaho lahafa nifikitse taminao iareo, le tapake riha, vaho nampihozongozo ty tombo gniareo riha. ⁸ Naho izay le zao ro talilie ty Tompo Yaveh: Ingo! Hinday meso hamangoa anao raho. Hanampake ty ndaty naho ty bibily aminao eo raho. ⁹ Kale ho lao naho rava ty tane Egypta. Bakeo le ho hay iareo fa iraho ro Yaveh, tefa iaze dragona bevatay nisafa tihoe: "Ahy ty renerano, tefa iraho ro nanao izay.'' ¹⁰ Lehe izay, Ingo! Mandietse anao raho naho ty renerano raho, ka ho ravaeko naho tsisy ty tane Egypta, vaho ho tane tsisy bakagne Migdola ka hatragne Syera vaho zisikamy ty sisi ty Kosy riha. ¹¹ Tsy hisy tombo gnondaty hindeha amy zay, vaho tsy hisy tombo na bibily handeha amy zay. Tsy hisy ndaty zisike ty efa-polo tao zay. ¹² Fa hanoeko rava agnivoa reo tane tsy misy ndaty eo ty tane Egypta, vaho reo tanene agnivoa reo tana avao le ho faharava zisike ty efa-polo tao; bakao Egypte haparitako eo amy reo firene, vaho haeleko Feno tane reo iereo. ¹³ Fa izao ro fitalilia Tompo Yaveh: Lahafa fa afake efa- polo tao le havoriko iaby amy reo vahoake eo amy reo ze niparitaha iareo ty Egyptiana. ¹⁴ Hahereko reo hanagna iEgypta vaho hahereko agne amity misy Patrosa, iaze tane niaviane reo. Bakeo le ho fanjaka ambane iareo agne ¹⁵ Ho ambane vatane amy reo fanjaka izay, vaho tsy ho asondrotro eo amy reo firene sasy. Ho hakelezeko iareo ka tsy hanampake amy reo firene eo sasy. ¹⁶ Tsy ho anto ty toky reo foko Israely sasy reo Egyptiana. Fa kea, ho fampahatiahiva ty hadisoa ze nanoe Israely lahafa nitolike tamy Egypta mba hila fagnampea iareo. Bakeo le ho hay iareo fa iraho ro Tompo Yaveh." ¹⁷ Tamity ty tao fahafito amby ropolo tamity andro voaloha t volagne voalohane, le niavy tamiko ty safa Yaveh, nanao tihoe: ¹⁸ "Ty ana nondaty, Nebokadnezera iaze mpanjaka ty Babylonay le nagnakatse ty miaramialane mba mba hanao asa mafe mandietse andre Tyro. Sola iaby ty loha iaby, vaho niendake ty soroke iaby. Nefa reke naho ty miaramilane le tsy nandrambe karama bakamy Tyro tamity asa mafe ze nanoena nagnisiane izay. ¹⁹ Naho izay le izao ro talilie ty Tompo Yaveh: 'Ingo! Hameako andre Nebokadnezara mpanjaka i Babylona iaze taney, vaho halaine ty hanagna izay, ho ndevozene ty fanagnane, vaho halaine ze iaby hisane ao; izay ro ho karama reo miaramilana. ²⁰ Fa nomeko azy ho karama tamity asa ze nanoe iareo ho ahy ty tane Egypte-izay ro fitalilia ty Tompo Yaveh. ²¹ Amy ze andro zay le hampitimoke tandroke ho ahy ty foko Isrely raho, kea ho hay iareo fa iraho ro Yaveh."