¹ Avy tamiko ty tsara Yaveh,nanao tihoe: ² "Nareo anagnodaty, manova fampagnonogna vaho mivolagna fagnohara amity foko Israely. ³ Volagno tihoe: 'Ia ro tsarae ty Tompo Yaveh: Nisy voromahere bevata ze mana elatse bevata naho volo gnelatse lava, feno volom boro, vaho maro loko nimba Libanona mbeo vaho nintajake ty tandingolingo ty hetae sedera eo. ⁴ Nanampake ty lengo ty ravene amy sampane reo eo zay vaho ninday tane reo amity tane kanana; nambole izay tamity tana gnireo mpivarotse re. ⁵ Nangalake voa ty tane maromaro kea re vaho nambole izay tamity tane mamole. Natobone tatsinsy ty vatan drano bevata manahake ty hetae malahelo zay. ⁶ Le nitimoke vaho mizare fieleza ty voaloboke ambane amity tane zay. Ravene reo le niody tamine eo, vaho fakane reo nitombo tambane gnizay eo. Le nizare voaloboke naho namokatse ravene zay vaho nagnakatse sampane. ⁷ Fa nisy voromahere bevata hafa kea ze mana elatse bevata naho volom boro maro. Ingo! Ty voaloboke toy le nampiody ty fakane tamity voromahere, vaho mamelatse tserane reo tamy ivoromahery bakamity pilasy ze fa nambole zay soa ho voantondrake zay. ⁸ Vita vole tamity tane soa atsinsy ty vatan drano bevata zay ka afake mamokatse tserane naho mampitimoke vokatse, soa hizare voaloboke soa.' ⁹ Volagno amity vahoake tihoe: 'Izao ro tsarae ty Tompo Yaveh: Ho ambine vao zay? Tsy hombota amity fakane naho endahe amity voane soa haleme vao zay, vaho soa haleme ty solofone iaby? Tsy hisy vata mafe na vahoake maro ila soa hagnombotse izay amy fakane reo. ¹⁰ Kea ingo! Ndra le vita vole aza zay, le hitimoke vao? Tsy haleme vao zay lahafa mahazo tioke baka antignana agne? Haleme vatane amity fika dratine zay." ¹¹ Le avy tamiko ty tsara Yaveh, manao tihoe: ¹² "Volagno amity foko mpivory tihoe: 'Haignareo vao ty dika gnireo zaka reo? Ingo! Avy ta Jerosalema ao ty mpajaka Babylona vaho nangalake ty mpanjakane naho roandrian dahy reo vaho ninday iereo tamity tane Babylona agne. ¹³ Le Ninday foko ndroandria re, nanao fagnekea tamine, vaho ninday aze tamity fifanta. Nagnakatse vahoake mafe reo tamity tane eo re, ¹⁴ soa hietre ty fanjaka fa tsy hiare. Amity fiambena ty fagnekea ro hahavelo ty tane. ¹⁵ Fa ty mpanjaka Jerosalema le nivory nanditse aze tamity fandefasa reo roandria ho a Egypta agne soa hahazo sovaly naho miaramila. Ho vagno vao re? Hilay vao ze manao reo zaka reo? Laha mivalike ty fagnekea re, le hilay vao? ¹⁶ Laha velo kea raho!-izay ro fitalilia ty Tompo Yaveh-le ho mate amity tane ty mpajaka ze nanao aze ho mpajaka vatane eo re, iaze mpajaka tsy nasiane dikane ty fifantaney, vaho ze nivalike ty fagnekeane. Ho mate agnivoa Babylona eo re. ¹⁷ Farao naho ty sikine mahere vaho reo fivoria tyndaty maro ho amity aly le tsy hiaro aze agnaly agne, lahafa magnore feherano dongon tane naho feherano rindry handrobaha ndaty maro ty miaramila Babylona. ¹⁸ Fa fa tsy nasiane dikane ty fifantane tamity fivaliha mpagnekea ty mpanjaka. Ingo, fa nanondrotse ty tagnane hanao fagnatena re vaho fa nanao reo zaka iaby reo. Tsy hilay re. ¹⁹ Kea Izao ro tsarae ty Tompo Yaveh: Laha velo kea raho, tsy ty fiagnako vao ro tsy nasiane dikane vaho ty fagnekeako ro nivalihane? Kea hinday ty fagnafaiza ho amity lohane eo raho! ²⁰ Hagnele ty fandriko amine eo raho, vaho ho tsa ty fandrike fiambenako re. Le ninday aze a Babylona agne naho hanao fitsara amine agne raho ho ahy ty fivaliha ze nanoene laha nivalike amiko re! ²¹ Ty fialofane iaby amity miaramila ao le ho tonta ty mesobey, vaho reo ze mitoboke le haparitake amity lala iaby agne. Le ho hainareo fa Iraho ro Yaveh; Iraho ro nitalily fa hiseho zay." ²² Izao ro tsarae ty Tompo Yaveh: 'Kea ty vatako mihintsy ro hangalake ty ravene abo amity hetae sedera, vaho hambole izay amy ravene maleme reo. Hanampake izay raho, vaho ty vatako ro hambole izay amity vohitse abo agne. ²³ Hambole izay amity vohitse Israely raho kea nandatsake naho hamokatse voa zay, le hizare sedera maleme zay hitoboha ty voro mana gnelatse iaby zay. Hitoboke amity aloke eo aoline reo. ²⁴ Le ho hae ty hetae iaby anbaibo agne fa iraho ro Yaveh. Mampiemotse ty hetae abo vaho manondrotse hetae ambane reo raho. Mampaleme ty hetae tinondrake raho vaho mampitiry ty hetae maike. Iraho ro Yaveh, fa natakliliko fa hiseho zay; vaho fa nanao izay raho.""