¹ Nagnato ahy ty ilane tamy roandria Israely reo vaho nitoboke tagnoloako eo. ² Vaho niavy amiko ty tsara Yaveh, nanao tihoe: ³ "Nareo anagnodaty, lahilahy reo le nandrambe ampiane aoly gniereo reo vaho nampipoke vato fandavoa ty helo gniereo tagnoloa ty tarehe gniereo eo. Tokone agnotanea gniereo amiko vao ze iaby zay? ⁴ Naho izay le atalilio amy gniereo zay vaho volagno amy gniereo tihoe: 'Izao ro atalily ty Tompo Yaveh: Ty ndaty iaby amity foko Israely ao ze mangalake am pone ty aoline, ndra mampipoke vato fanonta ty helone agnoloa ty tarehene eo, vaho bakeo magnato mpitoky-iraho, Yaveh, le hamale aze amity isa ty aoline. ⁵ Hanoeko zay soa hagneregnako ty foko Israely ampo gniereo ao ze nafaha lavitse tamiko eo tamity aoly gniereo.' ⁶ Naho izay atalilio amity foko Israely tihoe: 'Izao ro atalily ty Tompo Yaveh: Miheregna vaho miala amity aolinareo! Ameo lambosy ty zaka ratiraty nareo iaby. ⁷ Ho ahy ty ndaty iaby bakamity foko Israely naho ty vahiny mijano a Israely ao ze mivalike amiko, ze mandrambe an pone aoline reo ka mampipoke vato fandona ty helone agnoloa ty tarehene eo, vaho magnato mpitoky bakeo soa hila ahy-iraho, Yaveh, mihintsy ro hamale aze. ⁸ Kea hampiambe ze ndaty zay ty tareheko vaho hanao aze ho famantara naho ohatse, satria ho lanieko tsy ho amity vahoako eo re, vaho ho hainareo fa Iraho ro Yaveh. ⁹ Laha misy mpitoky voafitake vaho mivola hafatse, le iraho, Yaveh, ro hamitake ze mpitoky zay; hanondrotse ty tagnako amine raho vaho hamoteke aze amy Israely vahoako eo. ¹⁰ Hizaka ty helone avao iereo; ty helo ty mpitoky le hitovy amity helo ze magnotane aze. ¹¹ Naho izay, le tsy hisintake amity fagnoriha ahy sasy ty foko Israely na handoto ty vata gniereo amy fandikan dily iaby reo sasy. Ho vahoako iereo, vaho ho Zagnahare iereo raho-izay ro fitalilia ty Tompo Yaveh." ¹² Le avy tamiko ty tsara Yaveh, nanao tihoe: ¹³ "Nareo anagn'ondaty, laha mandiso amiko ty tane raike amity fanova ze mahadiso le hagnojonako ty tagnako amy zay eo raho vaho hanampake ty fitogno ty mofone, vaho handefa kere amy gnizay eo naho handany ty ndaty naho ty biby amy tane; ¹⁴ vaho ndra lahilahy telo retoa aza-Noa, Daniela, naho Joba-ro agnivoa itaney eo, le tsy hae ty hagnavotse afa tsy ty aine avao iereo amity fahitia gniereo-izay ro fitalilia ty Tompo Yaveh. ¹⁵ Laha mandefa bibily masiake feno itaney raho ka mandany izay soa hizare tane maike zay tsy hae itsaha ty ndaty naho biby reo, ¹⁶ le ndra amy izay ao aza lahilahy telo reo-laha mboe velo raho, hoe ty Tompo Yaveh-le tsy ho hae ty hagnavotse iereo ndra le anane lahy reo naho anak'ampelane reo aza; ty ay gniereo avao ro ho avotse, fa itaney le hizare tane maike. ¹⁷ Ndre laha minday mesobey amy gnize tane zay raho ka mivola tihoe: 'Nao mesobey, mandehana feno itaney vaho lanio hiala amy gnizay ty ndaty naho ty bibily, ¹⁸ le ndra le agnivoa itaney eo aza lahilahy telo reo-laha mboe velo raho, hoe ty Tompo Yaveh-le tsy ho afake ty hagnavotse iereo ndra le anane lahy naho anak'ampelane reo aza; ty ay gniereo avao ro ho avotse. ¹⁹ Ndra laha mandefa arete mandany amo taneo eo aza raho vaho mandrarake ty siako amy gnizay eo amity fampipoha dio, soa handania ty ndaty naho ty bibily, ²⁰ le ndra le amy ze tane zay aza ty Noa, Daniela, vaho Joba-le tsy ho hagnavotse iereo ndra le reo anake lahine naho anak'ampelane reo aza; ty ay gniereo avao ro havota naho ty fahitia gniereo. ²¹ Fa izao ro atalily ty Tompo Yaveh: mete fa hanoeko maharetse ty teo jaka amity alala ty fandefasko ty fagnafaiza efatse-kere, mesobey, bibily, vaho arete mandany-Amy Jerosalema soa handania ty ndaty naho ty bibily amine eo. ²² Kanefa, ingo! Hisy ho sisa amine ao, sisa velo reo ze hiboake miarake amy anake lahy reo naho anak'ampela reo. Ingo! Hiboake ho aminao agne iereo, vaho hahisake reo fomba naho fihetse gniereo riha ka hiono mikasike ty fagnafaiza ze fa nalefako ta Jerosalema agne, naho mikasike reo zaka hafa iaby ze nalefako tamy itaney eo. ²³ Sisa tavela velo reo le hampiono anareo lahafa hisagnareo fomba reo naho fihetse gniereo, kea le ho hainareo reo zaka iaby fa vitako tamine reo, fa tsy nanoeko zaka avao reo!reo-izay ro fitalilia gny Tompo Yaveh."