² Zay le Yaveh Zagnaharenao ze manolotre iereo ho anao laha fa maharese iereo riha, naho tsy maintsy mamoteke vatane iereo riha. Tsy hanao fifagnenkea amiereo riha, naho tsy hanoro fandefera amiereo. ³ Na kea hikarakara fanambalia amiereo riha. Tsy hagnomea ty anakampelanao ho ahy ty anaiereo lahy riha, naho tsy hangalake ty anakampela iereo ho ahy ty anadahinao riha. ⁴ Satria iereo le hamio lala ty ananao ty amity fagnoriha ahy, mba hahafaha iereo manompo zagnahare hafa. Laha zao le hirehetre aminareo ty helo Yaveh, naho handrava anareo malaky re. ⁵ Zao ro tokone hifagnarahanao amiereo: hamoteke ty alitara iereo nareo, hamoteke ty tsangam-bato iereo nareo, hanampake ty baon'Aseraha iereo,naho hagnoro reo sampe voasoky iereo. ⁶ Satria riha le firene ze voatoka ho ahy Yaveh Zagnaharenao. Le nifily anao mba ho vahoakene, mihoatre noho reo vahoake hafa iaby era zao tontolo zao Re. ⁷ Tsy nametrake ty fiteane teo aminareo na nifily anareo noho ty hamaroa isanareo noho ty vahoake hafa Yaveh__satria nareo ro tsiampe vatane tamireo vahoake iaby__ ⁸ fa satria tea anareo, naho nagniry ty hita ty fifanta ze nampagnategnane tamireo razanareo Re. Zay ro nahavy Yaveh ninday anareo niakatre tamity tana mahere naho nagnafake anareo tao amity tragno fagnandevoa, teo antagna Farao, mpanjaka Egypta. ⁹ Laha zao le haizo fa Yaveh Zagnaharenao__Re ro Zagnahare, ty Zagnahare matoky, ze mita reo fagnenkea vaho fatokia ho ahy ty foko agnarivone miarake amireo ze tea aze vaho miambe reo liline, ¹⁰ fa sazio egne amity tarehene reo ze malay aze, mba hanimba iereo; tsy handefetre amireo ze malay Aze re; hamale aze eo agnoloane re. ¹¹ Laha zao riha le hiambe reo baiko, reo lalana, naho reo lily ze nililieko hataonao androany, ka hanao reo riha. ¹² Laha midranjy reo lily riha, naho miambe vaho manao zaay, le hiambe ty fagnenkea vaho ty fatokia ze nampagnategnane tamity razanao Yaveh Zagnaharenao. ¹³ Hitea anareo Re, hitahy anareo, naho hampitombo isake anareo; hitahy ty voka ty vatanareo vaho ty vokatre ty tanenareo, ty varenareo, ty divay vaovaonareo, vaho ty menanareo, ty fitombo reo biby harenareo vaho reo anak'agnondry aman'osenareo, ao amity tane ze nampagnantegnane tamireo razanareo fa homeane anareo. ¹⁴ Ho voatahy kea noho reo ndaty hafa iaby riha; tsy hisy lahilahy tsihiterake na ampela tsihiterake eo aminareo na eo amity biby harenareo. ¹⁵ Hangnafake ty arete iaby aminao Yaveh; tsy hataone mahazo anao reo areten-draty Egypta hainao, fa hataone amireo iaby ze malay anao zay. ¹⁶ Handrava ty vondro ty ndaty iaby ze hagnomea Yaveh Zagnaharenao faharesea anao riha, naho tsy hiferenay iereo ty masonao. Tsy hanompo ty zagnahare iereo riha, satria ho fandrike hoanao zay. ¹⁷ Laha mirehake ao amponao riha hoe:" Maro agnisa noho zaho reo firene reo; nagnino ro handreseako reo?"__ ¹⁸ ko matahotre iereo; hahatiaro ze natao Yaveh Zagnaharenao tamy Farao vaho Egypta iaby riha; ¹⁹ reo fijalea bey ze hisa ty masonao, reo famantara, reo fahagaga, ty tagna mahere, vaho sandry mitsotre ze nindaisa Yaveh anao niakatre. Yaveh Zagnaharenao le hanao hoe zay kea amireo vahoake iaby ze hatahoranao. ²⁰ Fagnampe zay, Yaveh Zagnaharenao le handefa ty fanenetre eo amiereo, mandra-pirava reo sisa tavela vaho ze magnaja ty vatane aminao amity fagnatrehanao. ²¹ Tsy hatahotre iereo riha, satria Yaveh Zagnaharenao le aminao eo, Zagnahare bey vaho hatahora. ²² Yaveh Zagnaharenao le handroake tsikelekele reo firene agnoloanao eo. Tsy haharese aze iaby ndraike miarake riha, fa asa ne hihamaro reo bibin'ala hihodidy anao. ²³ Fa Yavhe Zagnaharenao le hagnomea faharesea hoanao amiereo laha fa hialy amiereo riha; hampikoronta iereo Re zisike ty hirava iereo. ²⁴ Hataone eo ambane fahefanao reo mpanjaka iereo, ka haharava ty agnara iereo amity ambane lagnitse riha. Tsy hisy afake hitsanga magnoloa anao, zisike ty handravanao iereo. ²⁵ Hagnoro reo sare soky reo zagnahare iereo nareo__ko magniry ty volafoty na ty volamena ze manaro iereo ka mangala zay ho ahy ty vatanareo, satria laha manao zay nareo, le ho voafandry zay__satria fagnaratia Yaveh Zagnaharenareo zay. ²⁶ Tsy hinday faharatia ao antragnonao riha ka hanomboke hanompo zay. Halay zay vatane riha, satria le fa voatoka ho ahy ty harava zay.