¹ Le niakatre bakagne amity tane lema i Moaba nimbaeo amity vohitse Nebo, nimbaeo antampo i Pisga, ty tandrife Jeriko ty Mosesy. Tagne Yaveh ro nampiseho tamine ty tane i Gileada iaby ka ziskagne Dana, ² vaho Naftaly iaby, vaho ty tane Joda iaby, mbaeo amity riake ahandrefa, ³ vaho agne Negeva, naho ty tane lemake ty baibo Jeriko, ty tana i Rofia, ka zisikagne Zoara. ⁴ Hoe ty Yaveh tamine hoe:" Toy ty tane ze nifantako tamy Abrahama, Isaka, vaho Jakoba, nanao ty hoe:' Homeiko ty fokonao toy.' Nengako hanente zay tamity masonareo nareo, nefa tsy hindeha agne." ⁵ Naho le mate tao amity tane i Moaba ty Mosesy, arake ty rehake nampagnategna Yaveh. ⁶ Nenga Yaveh tao amity baibo ao amity tane i Moaba manandrife i Beti-peora re, fa tsy nisy nahay ze misy ty kiborine zisike androany. ⁷ Roapolo amby zato tao ty Mosesy tamie mate; tsy poake ty masone, na nihe ty vatane voajagnahare. ⁸ Nandala i Mosesy tagne amity tane lemak'i Moaba zisike ty telopolo andro ty vahoake Israely, bakeo tampetre reo andro fandala i Mosesy. ⁹ Feno fagnahy ty fahendrea Josoa anadahign'i Nona, satria nametra-tagna tamine Mosesy. Nidranjy aze ty vahoake Israely naho nano ze nandilia Yaveh i Mosesy. ¹⁰ Tsy nisy mpaminane manahake i Mosesy vatane tao Israely, ze hay Yaveh nifagnatreke tamine. ¹¹ Tsy mboe nisy mpaminane manahake aze tamireo famantara vaho fahagaga iaby ze nagniraha Yaveh aze mba hatao agne amity tane Egypta, agne amy Farao, vaho reo mpanompone iaby, naho agne amity tanene iaby. ¹² Tsy mboe nisy mpaminane manahake aze amity asa bey iaby vaho mampatahotre ze nataogn'i Mosesy teo amaso Israely iaby.