¹ Laha misy fifamalea eo amireo lahilahy ka mbaeo amity fitsara iereo, naho tsarae reo mpitsara iereo, le hafaha iereo maliolio ty mare naho ho heloha ty raty fagnahy. ² Laha mete ty ho fofohe ty meloke, le hampandre ty mpitsara iereo ho fofohe eo agnoloane miarake amity isa ty fofoke voamare, arake ty helone. ³ Mete hagnomea fofoke efapolo aze ty mpitsara, feie tsy afake mihoatre io isa ao re; satria laha magnomea mihoatre io isake eo re ka mamofoke aze maro kea, le ho afa-baraka eo amaso reo Israelita namanareo. ⁴ Ko magnily ty vava ty agnombe laha fa mihinam-bare re. ⁵ Laha misy mpirahalahy miarake mitoboke naho mate ty raike amiereo, ka tsy nanagnanake lahy, le tsy mahazo manambaly ndaty amaly ty foko ty valy iaze lahilahy nimate ey. Fa kea, tsy maintsy miarake miroro amine ty lahine raike ka mangala-baly aze, naho manao ty adidy amity maha-zay aze. ⁶ Zay le mba hisoava ty terake voalohane ze nientene tan-trone amity agnara ty rahalahy io lahilahy io iaze nimate, mba tsy ho velo ao Israely ty agnarane. ⁷ Fa laha tsy manam-pagniria ty hangalake ty valy ty rahalahine ho aze ty lahilahy, le tsy maintsy mbaeo amity vavahady agne amireo olobey ty valy ty rahalahine naho manao ty hoe:' Ty zaiko lahy le milietse ty hagnomea agnara ho ahy ty rahalahine teo Israely; tsy hanao ty adidy ty zay lahy amikore.' ⁸ Bakeo reo olobey eo antanane tsy maintsy mikaike aze naho hirehake amine. Fa laha atao hoe mizizo re naho mirehake ty hoe:'Tsy manam-pagniria hangalake aze raho.' ⁹ Bakeo ty zay lahine tsy maintsy mamonje aze eo agnoloa reo olobey, magnafake ty kapa egne antombone, naho mandora egne amity tarehene. Tsy maintsy mamaly aze re naho manao ty hoe:' Hoe zay ro atao amity lahilahy ze tsy magnore ty tragno ty rahalahine.' ¹⁰ Ty agnarane le ho kaihe ao Israely hoe:' Ty tragno ty nafaha ty kapane.' ¹¹ Laha mialy reo lahilahy, naho avy ty valy ty raike mba hagnavotre ty valine egne antagna ze namofoke aze, naho laha mamototre ty tagnane ka mandrae aze agne amity filahiane re, ¹² le tsy maintsy tampahenao ty tagnane; tsy tokone hana fandefera ty masonao. ¹³ Tsy tokone hana vato fandan-ja sambe hafa riha ao agnte kitaponao, ty kele vaho bey. ¹⁴ Tsy tokone hana faharesea sambe hafa riha ao antragnonao, ty kele vaho bey. ¹⁵ Vato fandan-ja soa vaho mare ro tokone hanagnanao; faharesea soa vaho mare ro tokone hanagnanao, mab ho lava ty andronao ao amity tane ze namea Yaveh Zagnaharenao anao. ¹⁶ Fa reo iaby ze manao zaka hoe zay, ty iaby ze manao fihetreke tsy ampimaregna, le zaka-raty eo agnoloa Yaveh Zagnaharenao. ¹⁷ Tiarovo ze natao Amalekita anao tegne andala laha niakatre Egypta nareo, ¹⁸ ty fomba hifanojeane taminao tegne andala vaho ty nanafihane ty ilane taminao bakao afara, reo iaby ze osa tafaranao, laha fa rerake vaho sasatre riha; tsy nagnomea hasy an'Agnahare re. ¹⁹ Laha zao, laha fa namea Yaveh Zagnaharenao fitofa tamireo fahavalo nagnodidy anao riha, tao amity tane ze namea Yaveh Zagnaharenao anao mba ho lova, le tsy tokone halignoenao fa tsy maintsy mamono ty fahatiarova reo Amelekita eo ambane lagnitse riha.