¹ Reo mpisoro, ze Levitika, naho ty foko Levy iaby, le tsy hahazo anjara na lova miarake amy Israely; tsy maintsy mihina reo fagnatetre Yaveh natao tamity afo hoe ty lovane iereo. ² Tsy tokone mahazo lova eo amireo rahalahine re; Yaveh ro lova iereo, arake ty le fa nirehafene tamiereo. ³ Zao ro anjara ty mpisoro bakagne amity vahoake, vaho bakagne amireo nanao soro na reo agnombe na reo agnondry: tokone hamea iereo ho ahy ty mpisoro ty sorone, ty fifine roe, vaho reo atene. ⁴ Reo lohavoy ty varenao, ty divainao vaovao, vaho ty diloilonao, naho ty volon'agnondrinao voalohane, le tokone homeanao aze zay. ⁵ Fa Yaveh Zagnaharenareo ro nifily aze teo amity fokonareo iaby mba hitsanga vaho hanompo amity agnara Yaveh, re vaho ty anadahine zisikezay. ⁶ Laha misy Levita raike avy bakamity tana nareo niala ty Israely iaby ty nitobohane, naho magniry amity fagnahine iaby ho avy amity toera ze ho filie Yaveh, ⁷ le tsy maintsy manompo amity agnara Yaveh Zagnaharene re mitovy ty natao reo Levita iaby rahalahine, ze mitsanga ao magnoloa Yaveh. ⁸ Tokone hana ty anjara fihinana mitovy iereo, hafa ze azo amity vorotse ty lova ty foko. ⁹ Laha fa tafilitre ao amity tane ze hamea Yaveh Zagnaharenareo anareo, le ko mianatre mandineke ty zaka-raty reo firene reo. ¹⁰ Tsy tokone hahisaha ndaty mametrake ty anadahine na ty anakampelane agnate afo aminareo eo, na ia ia mpampiasa sikily, na misikily, mampiasa aoly, na manao aoly, ¹¹ mpanao vinta, mirehake amity mate, na ze mirehake amireo fagnahy. ¹² Fa na ia ia manao reo zaka reo le zaka-raty amy Yaveh zay; satria noho reo zaka-raty reo ro handroaha Yaveh Zagnaharenareo iereo tsy ho eo agnoloanareo. ¹³ Ao tsy hanan-tsiny eo agnoloa Yaveh Zagnaharenareo nareo. ¹⁴ Fa reo firene ze halaenareo reo le midranjy reo mpanao aoly vaho sikily; fa nareo kea, Yaveh Zagnaharenareo le tsy nagnenga anareo nanao zay. ¹⁵ Hanangana mpaminany bakamireo ho anareo Yaveh Zagnaharenareo, raike amireo rahalahinareo, manahake ahy. Tokona dranjigne nareo re. ¹⁶ Zay ro nangatahinareo tamy Yaveh Zagnaharenareo tagne Horeba tamity andro ty fiangona, manao hoe:' Hindeha tika tsy haharey ty feo Yaveh Zagnaharentika sase, na hahisake ty afo bey toy sase, tsy ne ho mate tika.' ¹⁷ Naho hoe Yaveh tamiko ty hoe:' Soa reo ze nirehafe iereo. ¹⁸ Hanangana mpaminane raike ho ahy iereo Raho ho eo amireo rahalahy iereo, ze manahake anareo. Hataoko ao ambavane reo rehake, naho ho hataliline iereo ze nandiliako aze iaby. ¹⁹ Hiseho zay laha misy ndaty tsy midranjy reo rehako ze rehafene amity agnarako, ho takeko amine zay. ²⁰ Fa ty mpaminane ze mirehake rehake am-pirehareha amity agnarako, ty rehake ze tsy nandiliako aze ho rehafene, na ze mirehake amity agnara reo zagnahare hafa, le tsy maintsy ho mate ze mpaminane zay. ²¹ Zao ro tokone ho rehafenareo ao amponareo:" Nagnino ro hagnenkeanay talily ze tsy nirehafe Yaveh?' ²² Hagnenke ty talily ze nirehafe Yaveh nareo laha fa mirehake amity agnara Yaveh ty mpaminane. Laha tsy miseho na tsy lefe ze zaka zay, laha zao le zaka tsy nirehafe Yaveh zay naho nirehake zay tamim-pirehareha ty mpaminane.