¹ Amity fara ty isam-pito tao, le manaova fagnafoagna trosa riha. ² Zay ro fomba ty fagnafaha: Ty mapin-trosa iaby ze nampindra le tokone hamoe ze nampindramene amity mpirai-belo amine; tsy hangatake zay amireo mpirai-belo amine re na ty rahalahine satria ty fagnafoagna Yaveh ty trosa le fa natalily. ³ Vahiny raike ro azonao hangatahe zay; fa na ino ino anao eo antagna ty rahalahinao le tokone hafoenao. ⁴ Ka, tsy tokone hisy ndaty mahantra eo aminao (fa Yaveh le hitahy anao agne amity tane ze ameane anao manahake ty lova ho fanagnanao), ⁵ laha ohatre ka midranjy soa ty feo Yaveh Zagnaharenao riha, ka miambe reo lily iaby ze handiliako anao zao. ⁶ Fa Yaveh Zagnaharenao hitahy anao, arake ze nampagnantegnane anao; naho hampitsepake amity firene maro riha, fa tsy hindra, handily amity firene maro riha, fa iereo kea tsy handily anao. ⁷ Laha misy lahilahy mahantra aminao eo, raike amireo rahalahinao, ze ao amity vavahadinao iaby eo amity tane ze namea Yaveh Zagnaharenao anao, ko magnamafe ty arofonao na magnily ty tagnanao amity rahalahinao mahantra; ⁸ fa sokafo soa amine ty tagnanao naho ampindramo ze paiene re. ⁹ Miambena mba tsy hana sain-draty ao am-po, manao ty hoe:" Ty tao fahafito, ty tao ty fagnafaha, le fa marine, mba tsy hatity eo amaso reo rahalahinao riha naho tsy hagnomea iereo na ino ino; naho hitaray amy Yaveh momba anao re, ka hadisoa ho anao zay. ¹⁰ Tsy maintsy homeanao re, naho tsy tokone hanegne ty arofonao laha fa magnomea aze riha, satria ty vale zay le hitahy anao amity asanao iaby vaho iaby ze atao ty tagnanao Yaveh Zagnaharenao. ¹¹ Satria ty mahantra le tsy hidrano hisy eto amity tane; laha zao ro handiliako anao vaho hirehafako hoe:' Sokafo soa amity rahalahinao ty tagnanao, ho ahy ze mipay ty fagnampeanao, naho amireo mahantranao ao amity tanenao.' ¹² Laha avily aminao vaho manompo anao zisike ty enen-tao ty rahalahinao, lahilahy Hebreo, na ampela Hebreo, le tsy maintsy hagnenga aze malalake riha amity tao fahafito. ¹³ Laha fa enganao hindeha malalake aminao eo re, le ko enga hindeha tagnam-polo. ¹⁴ Vatsio agnondry aman'ose, ty famoloa ty varenao, vaho ty fameaham-boalobonao amim-pahaia re. Arake ze le fa nitahia Yaveh Zagnaharenao anao, tsy maintsy hameanao re. ¹⁵ Tiarovo fa ndevo tagne amity tane Egypta nareo, naho io Yaveh Zagnaharenareo o ro nagnavotre anareo; laha zao mandily anareo raho amizao hanao zay. ¹⁶ Hiseho zay laha fa mirehake anareo re hoe;' Tsy hiala aminareo eo raho.' Satria re teanareo vaho ty tragnonareo, naho satria re le soa aminareo, ¹⁷ Naho alao ty haolo ka teveho amity sofine eo ambaravara, le ho mpanomponareo zisikezay re. Tsy maintsy ataonareo zay kea ty mpanompo vavenareo ¹⁸ Tsy tokone ho sarotre aminareo ty handefa aze malalake aminareo, satria le fa nagnampo anareo zisike ty enen-tao re naho nagnomea abo roe ty vili ty ndaty karamae. Yaveh Zagnaharenareo le hitahy anareo amy iaby ze ataonareo. ¹⁹ Ty lahy iaby amity voaloham-piterake ty agnombenareo vaho ty agnondry aman'ose iaby le tsy maintsy hatokanareo ho ahy Yaveh Zagnaharenareo. Tsy hanao asa miarake amity voaloham-piterake ty agnombenareo nareo, na hagnitsike ty voaloham-piterake ty agnondrinareo. ²⁰ Hano eo agnoloa Yaveh Zagnaharenareo isan-tao ty voaloham-piterake eo amity toera ze ho filie Yaveh, anareo vaho ty fokonareo. ²¹ Laha misy havoa zay__ohatre, laha mandrava ty Goa, na ino ino havoa hafa__ko atao soro ho ahy Yaveh Zagnaharenareo zay. ²² Hihina zay ao amireo vavahadinareo nareo; reo ndaty maloto vaho ty ndaty malio le tsy maintsy mihina zay, manahake ty hihinananareo gazela na diera. ²³ Fa kea tsy tokone mihina ty lio zay nareo; fa ailigno eo amity tane manahake ty rano ty lio.