¹ Hoe Yaveh tamiko tamize andro zay hoe:' Magnamboara vato pisake roe manahake ty tamboalohane, le miakara amiko atoy atoy ambohitse, naho manaova tomabile vita amity hetae. ² Hosoratako ao agnate reo vato pisake reo rehake ze tao agnate reo vato pisake tamboalohane ty pinotenao, ka hatobonao ao agnate ty tomabile reo.' ³ Ka nagnamboatre tomabile tamity hetae akasia raho, naho nagnamboatre vato pisake roe manahake ty tamboalohane raho, le niakatre tegne ambohitse raho, niakatre tamireo vato pisake roe tegne antagnako. ⁴ Sinorane tamireo vato pisake, manahake ty asa soratre tamboalohane, ty lily folo ze nirehafe Yaveh taminareo tagne ambohitse teo agnivo ty afo tamity andro ty havoria; le namea Yaveh ahy reo. ⁵ Le nihodike raho naho nizotro ty vohitse, ka nanao reo vato pisake tao agnate ty tomabile ze namboareko; le tao iereo, arake ty nandilia Yaveh ahy." ⁶ (Nindeha niala tao Berota Bene-Jakana hoagne Mosera ty vahoake Israely. Tao ro nimate Arona, naho tao re ro naleve; Eleazara, anadahine, ro lasa mpisoro nisolo ty toerane. ⁷ Nimbaeo Godgoda iereo laha fa niala tao, naho bakao Godgoda nimbaeo Jotdata, tane raike bey rano. ⁸ Tamize andro zay Yaveh nifily ty foko Levy mba hinday ty tomabile ty fagnenkea Yaveh, hitsanga eo agnoloa Yaveh mba hanompo Aze, vaho hitso-drano ty ndaty amity agnarane, manahake ty amizao. ⁹ Laha zao ro tsy hanagna Levy anjara na lova amity tane miarake amireo rahalahine; fa Yaveh ro lovane, arake ze nirehafe Yaveh Zagnaharenao tamine.) ¹⁰ Nitoboke tao ambohitse manahake ty tamity voalohane raho, efapolo andro vaho efapolo hale. Nidranjy ahy avao kea Yaveh tamize andro zay; tsy nagniry ty handrava anao Yaveh. ¹¹ Hoe Yaveh tamiko hoe:' Miaregna, mindehana eo aloha ty vahoake hitarike iereo amity liane. Le hilitse iereo naho hangalake ty tane ze le fa nifantako tamireo razambeine fa hamea iereo.' ¹² Ka amizao, ry Israely, ino vao ro angatahe Yaveh Zagnaharenao aminao, laha-tsy ty tahotse Yaveh Zagnaharenao, ty hindehana amity lalane iaby, ty hiteava aze, naho ty hanompoa Yaveh Zagnaharenao amity arofonao iaby vaho amity fagnahinao iaby, ¹³ ty fiambena reo lily Yaveh, vaho reo lalane, ze handiliako anao androany mba ho soa ho anao arere? ¹⁴ Ingo, Yaveh Zagnaharenao ro tompo ty lagnitse vaho ty lagnitse ty lagnitse, ty tane, vaho iaby ze amireo ao. ¹⁵ Yaveh arere avao ro nitea reo razanao noho ty hateane iereo, naho nifily anareo Re, riha fokone, tafara iereo, mihoatre noho reo ndaty hafa, manahake ty ataone zisikandroany. ¹⁶ Ka savaro ty arofonareo, naho mimetea tsy ho mafe hatoke sase. ¹⁷ Fa Yaveh Zagnaharenao, ro Zagnahare reo zagnahare naho Tompo reo tompo, ty Zagnahare bey, ty mahere vaho mampitahotre, ty iaze tsy magnente tarehegn'ondaty naho tsy mandrambe vandevande. ¹⁸ Magnomea rarene ty bode vaho ty mananin-tegna Re, naho manoro hatea ty vahiny amity alala ty fagnomea sakafo vaho akanjo ho aze Re. ¹⁹ Teavo ty vahiny noho zay; satria nareo le fa vahiny tagne amity tane Egypta. ²⁰ Yaveh Zagnaharenao ro hatahoranao; Re ro ho tompoenao. Amine riha ro tsy maintsy hipiteke; naho amity agnarane ro hifantanao. ²¹ Re ro fiantsanao, naho Re ro Zagnaharenao, ze le fa nanao reo zaka-bey vaho reo zaka mampitahotre ho anao, ze le fa hisa ty masonao. ²² Fitompolo ndaty reo razanao ro nizotro tagne Egypta; fa amizao le fa natao Yaveh Zagnaharenao ho maro isake manahake ty kinta egne amity lagnitse riha.