¹ Naho tafara zay le nivogno kalese vaho soavale ho aze ty Absaloma, niarake tamity lahilahy dimampolo mba hoalohane. ² Nifoha maray Absaloma naho nitsanga teo amity lala mbaeo amity vavahady ty tana. Laha fa nisy ndaty nana aly ho ente eo amity fitsara ty mpanjaka, le nikaike aze ty Absaloma naho nanao ty hoe:" Bakaia ty tana niboahanao?" Le namale ty lahilahy hoe:" Bakamireo raike amity foko Israely ty mpanomponao." ³ Le nirehake tamine Absaloma hoe:" Ingo, soa vaho mare ty miomba anao, feie tsy misy ndaty namea ty mpanjaka fahefa hidranjy ty rarahanao." ⁴ Le nampea Absaloma hoe:" Teako laha mba natao ho mpitsara teto amity tane raho, mba hoavy eo amiko ty ndaty iaby ze mana aly na raraha, naho hagnomea rarene ho aze raho!" ⁵ Naho laha fa nisy ndaty niavy teo amy Absaloma mba hagnomea haja aze, le nagnakatre ty tagnane re naho nandrae aze ka nagnoroke aze. ⁶ Nanao hoe zay tamireo Israely iaby ze nimbaeo amity fitsara ty mpanjaka ty Absaloma. Ka le nangalake ty arofo ty ndaty Israely ty Absaloma. ⁷ Naho tamity fiafara ty tao efatre le hoe Absaloma tamity mpanjaka hoe:" Engao rie raho mba hindeha naho hagnefa ty vava nataoko tamy Yaveh tagne Hebrona. ⁸ Fa nanao vava ty mpanomponao tamy zaho nitoboke tagne Gesora tagne Syria, nanao ty hoe:' Laha ho ente Yaveh mihere agne Jerosalema vatane raho, le hanompo Yaveh."' ⁹ Ka hoe ty mpanjaka tamine hoe:" Mindehana ampilamina." Ka nindeha ty Absaloma ka nimbaeo Hebrona. ¹⁰ Feie bakeo le nagnirake mpijilo erake ty foko Israely iaby ty Absaloma, nanao ty hoe:" Vatane vaho maharey ty feon-trompetra nareo, le ao hirehake hoe:' Absaloma ro mpanjaka agne Hebrona."' ¹¹ Nisy lahilahy roanjato bakagne Jerosalema nindeha niarake tamy Absaloma, ze hinafatre. Nindeha tamity tsy fanagnan-tsiny iereo, naho tsy nahay na ino ino tamize kinasa Absaloma. ¹² Laha fa nanolotre soro ty Absaloma, le nampangalake i Ahitofela bakagne amity tana niboahane agne Gilo re. Mpagnomea hevetre Davida re. Nahere satria tsy nijano-nitombo ty ndaty nagnorike aze. ¹³ Nisy irake nimbaeo amy Davida nanao hoe:" Magnorike Absaloma ty arofo reo ndaty Israely." ¹⁴ Ka hoe Davida tamireo mpanompone iaby ze niarake tamine tao Jerosalema hoe:" Mitsangana naho andao hilay, laha tsy zay le tsy hisy ho afake milay i Absaloma tika. Mivognona hiala amizao, laha tsy zay hahatratre antika malaky re, naho hinday loza eto amintika re ka hanafike ty tana amity lela-meso." ¹⁵ Le hoe reo mpanompo ty mpanjaka tamity mpanjaka hoe:"Ingo, vogno ty hanao iaby ze tampake ty mpanjaka tomponay ty mpanompone." ¹⁶ Le niala ty mpanjaka naho norihe ty fokone iaby, fa nagnenga ampela folo, ze valintsidrano, mba hiambe ty lampa ty mpanjaka. ¹⁷ Laha fa baka niakatre ty mpanjaka vaho reo ndaty iaby tao afarane, le nijano teo amity tragno farane iereo. ¹⁸ Nindeha niarake tamine ty tefine iaby, naho nindeha teo alohane reo Keretita, vaho reo Peletita naho reo Getita iaby__lahilahy enenjato ro nagnorike aze bagnake Gata. ¹⁹ Le hoe ty mpanjaka tamy Itahy Gatita hoe:" Nagnino riha ro hindeha hiarake aminay? Miheregna naho mijanogna miarake amity mpanjaka, fa vahiny vaho antane lavitre riha. Miheregna agne amity fitobohanao avao. ²⁰ Satria vaho niala male riha, le nagnino raho ro tokone hamototre anao hirererere hiarake aminay? Tsy haiko kea ze ombako. Ka miheregna naho ento mihere reo raike firene namanao. Hiarake aminao anie ty fahitia vaho ty fatokia." ²¹ Fa Itahy namale ty mpanjaka naho nirehake hoe:" Laha mboe velo kea Yaveh, naho laha mboe velo kea ty mpanjaka tompoko, agne amity toera iaby indehana ty mpanjaka vatane, le agne kea ro homba ty mpanomponao, na midika havelo zay na fate." ²² Ka hoe Davida tamy Itahy hoe:" Mindeha naho manohia miarake aminay." Ka le nindeha niarake tamity mpanjaka Itahy Gatita amireo lahilahy iaby vaho reo fokone iaby ze niarake tamine. ²³ Nitagny tamity feo mafe ty tana iaby laha nandrio ty Baibo Kidrona reo vahoake, naho laha nitsake avao kea ty mpanjaka. Nindeha tegne andala nimbaeo ho agne antane efetre ty ndaty iaby. ²⁴ Na Zadoka niarake tamireo Levita iaby, ze ninday ty tomabile fagnenkean'Agnahare aza le teo. Nahiliereo ty tomabilen'Agnahare, le nahazo iereo Abiatara. Nnandy zisike nandohalefa ty vahoake bakao antana iereo. ²⁵ Hoe ty mpanjaka tamy Zadoka hoe:" Ento mihere agne antana ty tomabilen'Agnahare. Laha mahisake fitea eo amaso Yaveh raho, le hinday ahy hihere re naho hanoro ty tomabile vaho ty toera hitobohane ndraike. ²⁶ Fa laha mirehake re ty hoe:' Tsy tea anao raho,' ingo, toy raho, ao hataone amiko iaby ze hisane fa mete amine." ²⁷ Hoe avao kea ty mpanjaka tamy Zadoka mpisoro hoe:" Tsy mpahisake vao riha? Miheregna agne antana ampiadagna, amireo ananao roe lahy miarake aminao, le Ahimaza ananao, vaho Jonatana ana i Abiatara. ²⁸ Ingo, hiambe eo amity fitana amity efetre Araba raho zisike hiavia ty rehake bakaminao hampahay ahy." ²⁹ Ka le ninday ty tomabilen'Agnahare nihere tagne Jerosalema ty Zadoka vaho Abiatara, naho nitoboke tagne iereo. ³⁰ Fa niakatre tsy nikiraro vaho nitagny nimbae amity Vohitse Oliva ty Davia, naho nanaro ty lohana. Ty ndaty iaby teo amity vahoake niarake tamine le nanaro ty lohane, naho nindeha niakatre ampitagnia tegne ampidehana iereo. ³¹ Nisy ndaty nirehake tamy Davida nanao hoe:" Agnate reo mpiraike miarake amy Absaloma ty Ahitofela." Ka nivavake ty Davida hoe:" Yaveh o, avaliho ho hagegea rie ty toroheve i Ahitofela." ³² Naho Davida laha fa niavy teo ambone ty lala, ze le fa fanompoa an'Agnahare, le niavy hifanoje tamine ty Hosay Arkita niarake tamity akanjone tsiatre vaho debon-tane teo amity ongone. ³³ Hoe ty Davida tamine hoe:" Laha mindeha miarake amiko riha, le hamesatre ahike. ³⁴ Fa laha mihere agne antana riha ka mirehake amy Absaloma hoe:' Ho mpanomponao raho, ry mpanjaka, manahake ty naha-panompo ty raenao ahy tamity andro taloha, le ho mpanomponao avao kea raho amizao,' le hagnoronta ty toroheve Ahitofela ho ahy riha. ³⁵ Tsy mana i Zadoka vaho Abiatara mpisoro hiarake aminao vao riha? Ka na ino ino reinao ao amity lampa ty mpanjaka, le ao ho rehafenao amy Zadoka vaho Abiatara mpisoro zay. ³⁶ Anovo soa mba hiarake amiereo agne ty anane roe lahy, le Ahimaza, ana i Zadoka, vaho Jonatana, ana i Abiatara. Ao halefanao amiko atoy amity tana iereo ty zaka iaby ze reinao." ³⁷ Ka le nimbaeo antana ty Hosay, nama Davida, laha vaho niavy vaho nilitse i Jerosalema ty Absaloma.