¹ Simona Petera, mpanompo vaho apositoly Jesosy Kirisity, hoahy reo ze nahazao ty finoa lafo-vily manahake ze niraesenay, finoa ao amity hamarean'Agnaharentika vaho Jesosy Kirisity Mpamonje. ² Hampitomboe anie ty hasoava vaho fiadagna naho ty fahaia an'Agnahare vaho Jesosy Tompontika ³ Reo zaka iaby mikasike ty heren'Agnahare hoahy ty fiaigna vaho teram-pagnahy le nameaantika tamity alala ty fahaia an'Agnahare, ty nikaike antika tamity alala ty hasine vaho ty hasoane arere. ⁴ Tamity alala reo, nameane rehake fikasa soa vaho bey vatane tika, mba ho lasa mpizara amity fomban'Agnahare nareo, laha miala ty halotoa ze eto antane naho reo paian-draty. ⁵ Laha zao, manova ty soa vatane mba hagnampea hasoa amity alala ty finoanareo, naho amity alala ty hasoanao, ty fahaia. ⁶ Amity alala ty fahaianareo, magnampea fagnonognam-po, naho amity alala ty fagnonognam-po nareo, magnampea fiareta, naho amity alala ty fiaretanareo, magnampea toeram-pagnahy. ⁷ Amity alala ty toeram-pagnahinareo, magnampea hatea rahalahy, naho amity alala ty hatea rahalahy, magnampea hatea. ⁸ Laha ao aminareo reo naho mitombo ao aminareo, le tsy hamoa ndra tsy hamokatre amity fahaia Jesosy Kisirity Tompontika nareo. ⁹ Fa ndra ia ia tsy ampe reo zaka reo le tsy mahita laha tsy ze marine; goa re. Nihalignone ty fagnaliova aze tamireo hadisoane taloha. ¹⁰ Laha zao, ry rahalahy, anovo iaby mba hahazoa antoke ty fikaiha vaho ty fifiliana anareo. Laha manao reo zaka reo nareo, le tsy ho voafinga. ¹¹ Amizay le malalake ho anareo ty filira ao amity fanjaka zisikagne te ahy Tompontika vaho Jesosy kirisity mpamonje. ¹² Laha zao le vogno avao raho hampahatiaro anareo reo zaka reo, ndra le hainareo aza reo, naho ndra le mafe ao amity mare aza nareo henanezao. ¹³ Zaho midineke fa rarene amiko ty mamoha anareo amity fampahatiarova reo zaka reo, laha mboe eto amity tragno toy raho. ¹⁴ Satria haiko fa tsy ho ela le hafahako ty tra-laeko, manahake ze natoro Jesosy Kirisity Tompontika ahy. ¹⁵ Naho hataoko ze farane vitako mba hahatiarovanareo zisikagne reo zaka reo laha fa lasa raho. ¹⁶ Fa zahay le tsy nagnorike talily soa asa ze finoro laha fa nirehake taminareo ty miomba ty here vaho ty nisehoa Jesosy Kirisity Tompontika. Fa kea, zahay le vavolombelo nahita ty haroandriane. ¹⁷ Fa Re le naharae laza aman-kasy bakamin'Agnahare Rae laha fa nisy feo niavy tamine eo tamity hasy bey vatane ty hoe:" Toy ro Anako malalako, te teako vatane." ¹⁸ Naharey ze feo zay tagne andagnitse zay zahay, laha fa niarake tamine tegne ambohitse masy. ¹⁹ Tika le mana ty tsara famisavisa ze le fa natao mafe ore toy. Tokone hiambe zay soa nareo. Zay le hoe ty jiro mazava ao agnate ieke mandram-pahavy ty maray vaho ty kinta ty maray miakatre ao amponareo. ²⁰ Haizo aloha zao, fa tsy misy famisavisa bakamity fagnan-karan-kevetre ty ndaty. ²¹ Fa tsy misy famisavisa bakamity sitrampo ty ndaty. Fa kea, tinary ty Fagnahy Masy ie rey mba hirehake ze nirehafen'Agnahare.