¹ Naho laha fa hindeha hagnakatre Elia tamity tafio-tioke ho agne andagnitse ty Yaveh, le niala tao Gilgala niarake tamy Elisa ty Elia. ² Hoe ty Elia tamy Elisa:" Mba mijanogna rie eto, satria le fa nagnirake ahy ho agne Betela ty Yaveh." Namle Elisa ty hoe:" Laha mboe valo kea ty Yaveh, naho laha mboe valo kea riha, le tsy hiala anao raho." Le nizotro tange Betela iereo. ³ Nimbaeo amy Elisa reo ana ty mpaminane ze tagne Betela nirehake tamine hoe:" Hainao vao fa hangalake ty tomponao aminao ty Yaveh androany?" Namale Elisa ty hoe:" Eka, haiko zay, fa ko mirehake momba zay." ⁴ Hoe ty Elia tamine:" Elisa, mba mandignesa eto rie, satria le fa nagnirake ahy ho agne Jeriko ty Yaveh." Le namale Elisa ty hoe:" Laha mboe velo kea ty Yaveh, naho laha mboe valo kea riha, le tsy hiala anao raho." Le nindeha tagne Jeriko iereo. ⁵ Le nimbaeo amy Elisa reo ana ty mpaminane ze tagne Jeriko naho nanao tamine ty hoe:" Hainao vao fa hangalake ty tomponao aminao ty Yaveh androany?" Le namale Elisa ty hoe:" Eka, haiko zay, fa ko mirehake momba zay." ⁶ Le hoe ty Elia tamine:" Mba mijanogna rie, fa Yaveh le fa nagnirake ahy ho agne Jordana." Namale Elisa hoe:" Laha mboe velo kea Yaveh, naho laha mboe velo kea riha, le tsy hiala anao raho." Le nindeha iereo roe. ⁷ Tafara kele atoy, nisy dimampolo tamireo ana ty mpaminane nitsanga niafagnatreke tamiereo tegne lavitre laha nitsanga teo amoro Jordana iereo roe. ⁸ Nalae Elia ty lambane, nahorongorone, naho finofone tamizay ty rano. Nizara tamity lefine roe ty renerano ka nindeha tamity tane maike iereo roe. ⁹ Naho laha fa niavy nitsake iereo, le hoe Elia tamy Elisa:" Angataho amiko ze tokone hataoko ho anao aloha ty hangala ahy aminao." Namale Elisa ty hoe:" Ao rie mba ho avy amiko ty abo roe hene ty anjara fagnahinao." ¹⁰ Namale Elia hoe:" Le fa nangatake zaka sarotre riha. Na zay aza, laha hisanao raho laha fa alae aminao, le hiseho aminao zay, fa laha tsy zay, le tsy hiseho zay." ¹¹ Laha mboe nindeha vaho nirehake iereo, ingo, nisy kalese afo vaho soavale afo niseho, ze nanarake aze roe lahy, naho niakatre tamity tafio- tioke tagne andagnitse ty Elia. ¹² Nahisake zay ty Elisa ka nikorake mafe ty hoe:" Raeko o, raeko o, reo kalese Israely vaho reo mpitikitse aze!:" Tsy hisane sase Elia, ka nitanane reo akanjone naho nitriatene roe reo. ¹³ Nalaene ty lamba Elia ze latsake bakegne amine, naho nihere mba hijoro teo amoro Jordana re. ¹⁴ Finofone tamity lamba Elia ze tavela ty rano naho hoe re:" Aia ty Yaveh, Zagnahare Elia?" Laha fa namofoke ty rano re, le nizara teo amity lafine roe reo ka nitsake ty Elisa. ¹⁵ Laha fa hisa reo ana ty mpaminane ze bakagne Jeriko teo agnila iereo re, le hoe iereo:" Mitoboke ao amy Elisa ty fagnahy Elia!" Le avy mba hanalaka aze iereo, naho nihohoke tamity tane teo agnoloane. ¹⁶ Hoe iereo tamine:" Ingo amizao, misy lahilahy mahere dimampolo eo amireo mpanomponao. Engao iereo hindeha, mangatake zahay, mba hipay ty tomponao, tsy ne nakare vaho natorane ty fagnahy Yaveh agne amity vohitse na agne amity baibo re." Namale Elisa ty hoe:" Aha, ko magnirake iereo." ¹⁷ Nefa laha fa nandrisike Elisa zisike hahamegnatre aze iereo, le hoe re:" Iraho iereo." Le nagnirake lahilahy dimampolo iereo, naho nipay zisike ty telo andro iereo, kanefa tsy nahisake aze. ¹⁸ Nihere tagne amy Elisa iereo, laha nitoboke tao Jeriko re, le hoe re tamiereo:" Tsy nirehake taminareo vao raho ty hoe:' Ko mindeha'?" ¹⁹ Reo ndaty ty tana nirehake tamy Elisa hoe:" Ingo, miangavy anao zahay, ty zaka-misy eto amity tana toy le mahafale, arake ze hisa ty tompoko zao, nefa raty ty rano naho tsy mamokatre ty tane." ²⁰ Namle Elisa ty hoe:" Andeso finga vaovao raho ke asio sira ao agnatene," le ninday zay teo amine iereo. ²¹ Niakatre mbaeo amity loharano Elisa naho nanorake sira tao agnate zay; le hoe re ty hoe:" Ezao ro safa Yaveh:' Le fa nagnafake reo rano reo raho. Manomboke amizao nadro zao, le tsy hisy fate na tane tsy hamokatre sase."' ²² Ka le sintra reo rano zisikezao, tamity alala ty rehake ze natao i Elisa. ²³ Le niakatre bakao ho agne Betela Elisa. Laha fa niakatre ty lalane re, le nisy ajalahy niakatre ty tana naho nagnamaiva aze; hoe iereo tamine:" Miakara, riha ry solaloha! Miakara, riha ry solaloha!" ²⁴ Nanente tagne afarane Elisa naho nahisake iereo; nikaike i Yaveh re mba hagnozo iereo. Le nisy beravave roe amby efepolo tamireo ajalahy. ²⁵ Le niala teo ho agne ambohitse Karmela ty Elisa, naho bakeo ro niheregnane ho agne Samaria.