¹ Laha fa naharey ty laza Solomona ty mpanjaka vave Sheba, le nimbaeo Jerosalema re mba hitsapa aze amity ontane sarotre,. Nindeha niarake tamity mpanao rodobey lava, vaho rameva nampindese zaka-magnitre, volamena lako, naho vatosoa lafovily lako re. Laha fa niavy tagne amy Solomona re, le nambarane tamine iaby ze tao ampone. ² Vinale Solomona iaby reo ontanene iaby; tsy le nisy sarotre loatre tamy Solomona; tsy nisy ontane ze tsy vinalene. ³ Laha fa hisa ty mpanjaka vave Sheba ty hamarea Solomona vaho ty lampa ze le fa naorene, ⁴ ty sakafo teo ambone latabane, ty tobo reo mpanompone, ty asa reo mpanompone naho ty siky iereo, reo mpinday kapoakene vaho sikine avao kea, naho ty fomba ze nanolorane ty fagnatetre oroa tao antragno Yaveh, le tsy nisy fagnahy sase tao amine. ⁵ Le hoe re tamity mpanjaka hoe:" Mare vatane, ty talily ze reiko tagne amity taneko momba reo rehanao vaho ty hamareanao. ⁶ Tsy nino ze reiko raho zisike ty niaviako eto, naho amizao le hisa ty masoko zay. Tsy antsane kea ro nirehafe tamiko momba ty hamareanao vaho ty hareanao! Nihoaranao ty laza ze reiko. ⁷ Hehe sambatre ty vahoakenao, naho sambatre reo mpanomponao ze le fa teo agnoloanao avao, satria maharey ty hamareanao iereo. ⁸ Isaora anie Yaveh Zagnaharenao, ze fale nandrae anao, ze nanao anao teo amity sezan-droandriane, mba ho mpanjaka ho ahy Yaveh Zagnaharenao. Satria ty Zagnaharenao le fa nitea Israely, mba hametraha iereo zisikezay, le nataone ho mpanjaka teo amiereo riha, mba hanova ty rarene vaho fahitia!" ⁹ Nameane talenta volamena 120 ty mpanjaka naho zaka-magnitre vaho vato lafovily lako. Tsy nisy fatran-jaka magnitre lako noho reo ze namea ty mpanjaka vave Sheba hoahy Solomona Mpanjaka mboe namea ho aze ndraike. ¹⁰ Reo mpanompo Hirama vaho reo mpanompo Solomona, ze ninday volamena bakagne Ofira, le ninday hetae almoga vaho vato lafovily avao kea. ¹¹ Tamity hetae almoga, le nanao ho ahy ty tragnon'Agnahare vaho ty tragnone ty mpanjaka, naho kea harpa vaho lokanga ho ahy reo mpitendre. Tsy mboe nisy hetae hoe zay ka hisake tagne amity tane Joda tagne aloha. ¹² Le namea Solomona Mpanjaka reo zaka ze niriene ty mpanjaka vave Sheba, na ino ino nangatahene, ho fagnampe zay le fa nientene tamity mpanjaka. Ka le lasa re naho nihere tagne amity tanene, re vaho reo mpanompone. ¹³ NAho ty lanjam-bolamena niavy tagne amy Solomona tao agnate ty herentao le talenta volamena 666, ¹⁴ hafa ty volamena ze niente reo mpindehandeha vaho reo mpandranto. Reo mpanjaka Arabia iaby vaho reo governora tao amity firene avao kea le ninday volamena vaho volafoty ho ahy Solomona. ¹⁵ Nagnamboatre apinga volamena voamare bey roanjato ty Solomona Mpanjaka. Sekele volamena enenjato namea hoahy ty kirai-kiraike. ¹⁶ Nagnamboatre apinga volamena voamare telonjato avao kea re. Mina volamena telo ro nanarogna ty apinga kirai-kiraike; natobo ty mpanjaka tao amity lampa ty Ala Libanona reo. ¹⁷ Bakeo ty mpanjaka nagnamboatre sezan-droandria ivo bey naho pinetane takelam-bolamena vatane manify vatane zay. ¹⁸ Zaka ene ro nimbaeo amity sezan-droandria, naho boribory ty tao afara ty ambone ty sezan-droandria. Nisy fitana teo amity andanene ty fitoboha kirai-kiraike, naho nisy liona roe nitsanga teo amireo andanene fisy tagna. ¹⁹ Liona roe amby folo ro nitsanga teo amireo dinga, raike isake ty andenene isake ty dinga ene. Tsy mboe nisy sezan-droandria hoe ty tane amity fanjaka hafa. ²⁰ Volamena iaby reo kapoake finoma Solomona Mpanjaka, naho ty kapoake finoma iaby tao amity tragno ty Ala Libanona le volamena tsy miharo iaby. Tsy nisy volafoty satria tsy nihevere ho lafovily ty volafoty tamity andro Solomona. ²¹ Ty mpanjaka le nana sambo mpindeha andriake, niarake tamireo sambo Hirama. Indraike isan-telo-tao ro nindaisa ty sambo volamena, volafoty, naho ivoara, amity rajako vaho gidro. ²² Laha zao le nihoatre reo mpanjaka iaby era zao tontolo zao tamity harea vaho hamarea ty Solomona Mpanjaka. ²³ Zao tontolo zao le nipay ty fiatreha Solomona mba haharey ty hamareane, ze le fa nataon'Agnahare tao am-pone. ²⁴ Reo ze nitilike le ninday raketre, fanake volafoty vaho volamena, siky, fiaro, naho zaka-magnitre, naho soavale vaho ampondra, isan-tao. ²⁵ Nana fihinanam-bilo efatre arivo ho ahy reo soavale vaho reo kalese ty Solomona, naho mpitiki-tsoavale roe-arivo vaho ray ale, ze natobene tao amity tana ty kalese vaho niarake tamine tagne Jerosalema. ²⁶ Nanampake teo amireo mpanjaka iaby zisikagne amity rano Eofrata ka zisikagne amity tane ty Filistina re, naho zisikagne amity sisin-tane Egypta. ²⁷ Nana volafoty tagne Jerosalema ty mpanjaka, maro noho reo vatosoa tagne amity tane. Nagnamboatre hetae sedera maro noho reo hetae amontana aviavy ze tao amity tane gebo re. ²⁸ Ninday soavale ho ahy Solomona bakagne Egypta vaho bakagne amity tane iaby iereo. ²⁹ Ty amireo raraha hafa mikasike Solomona, voalohane sady farane, tsy le fa voasoratre tao amity tantara Natana mpaminane, tao amity faminania Ahija Silonita, vaho tao amity fahitan'Ido mpahisake mikasike i Jeroboama anadahy Nebata vao zay? ³⁰ Nanjaka teo amy Israely iaby zisike ty efapolo tao ty Solomona. ³¹ Nimate niarake tamireo razambeine re naho ty vahoake nandeve aze tagne amity tana Davida raene. Rehoboama, anadahine, ro lasa mpanjaka nisolo ty toerane.