¹ Reo vahoake Jerosalema le nanao Ahazia, faralahy Jehorama, ho mpanjaka hisolo aze, fa ty tary reo lahilahy ze niarake tamireo Arabo nilitre tao amity tobe le namono reo anadahine iaby. Ka le Ahazia anadahy Jehorama, mpanjaka Jod, ro lasa mpanjaka. ² Roe amby efapolo tao Ahazia laha nanomboke nanjaka; nanjaka herentao tao Jerosalema re. Atalia ro agnaran-drenene; anakampela Omry re. ³ Nindeha tamity lala ty foko Ahaba avao kea re satria ty renene ro mpagnomea hevetre aze tamity fanovan-draty. ⁴ Nanao ze raty teo amaso Yaveh Ahazia, manahake ze natao ty foko Ahaba, satria iereo ro mpagnomea hevetre tafara ty nahafate andraene, ho amity haravane. ⁵ Nagnorike ty toro-heve reo avao kea re; nindeha niarake tamy Jorama anadahy Ahaba, mpanjaka Israely re, mba hialy amy Hazaela, mpanjaka Syria, tagne Ramota-gileada. Nahafere i Jorama reo Syriana. ⁶ Nihere tagne Jezirela ty Jorama mba hagnafaha ty fere ze natao iereo tamine tagne Rama, tamie nialy tamy Hazaela, mpanjaka Syria. Ka le nizotro tagne Jezirela ty Ahazia anadahy Jehorama, mpanjaka Joda, mba hanente Jorama anadahy Ahaba, satria nafere ty Jorama. ⁷ Naho ty harava Ahazia le nienten'Agnahare tamity famangia Ahazia i Jorama. Laha fa niavy re, le niarake tamy Jehorama mba hanafike i Jeho anadahy Nimsy, ze le fa finily Yaveh handrava ty foko Ahaba. ⁸ Naho laha fa nandefe ty fitsaran'Agnahare teo amity foko Ahaba ty Jeho, le nahisake reo mpitarike Joda vaho reo anadahy ty rahalahy Ahazia nanompo Ahazia re. Vinono Jeho iereo. ⁹ Nipay Ahazia ty Jeho; tsinepa iereo tao amity Samaria re, niente tagne amy Jeho, ka vinono re. Bakeo naleve iereo re, fa hoe iereo ty hoe:" Re le anadahy Josafata, ze nipay Yaveh tamity arofone iaby." Naho le tsy nana fahefa handily ty fanjaka sase ty foko Ahazia. ¹⁰ Naho laha fa hisa Atalia, rene i Ahazia fa mate ty anadahine, le nitsanga ze naho namono reo ana-droandria iaby tao amity foko Joda. ¹¹ Kanefa Joseba, anakampela ty mpanjaka, nangalake Joasy, anadahy Ahazia, naho nagnafake aze teo amireo anadahy ty mpanjaka ze vinono. Natobone tao amity efetragno firoroa re vaho ty mpiteza aze. Naho Joseba, anakampela Jehorama Mpanjaka, valy Jehoiada mpisoro (fa anabave Ahazia re), nagnaja aze tamy Atalia, mba tsy hamonoa Atalia aze. ¹² Niarake tamiereo tao antragnon'Agnahare zisike ty enen-tao re, laha mboe i Atalia ro nanjaka teo amity tane.