¹ Niavy tamy Azaria anadahy Odeda ty fagnahin'Agnahare. ² Niakatre hanalaka i Asa re naho nanao tamine hoe:" Dranjigno raho, ry Asa, vaho Joda naho ty Benjamina iaby: momba anareo Yaveh, laha miarake amine nareo. Laha mipay Aze nareo, le ho hisanareo Re; fa laha mahafoe Aze nareo, le hafoene. ³ Naho zisike ty andro naharetre, le tsy nana ty Zagnahare mare ty Israely, tsy nana mpisoro nagnanatre, naho tsy nana ty liline. ⁴ Fa laha fa nitolike tamy Yaveh, ty Zagnahare Israely iereo tamity androm-pijalea iereo, naho nipay Aze, le hisa iereo re. ⁵ Tamize andro zay le tsy nisy fiadagna ho ahy ze nindeha lavitre; fa kea, koronta bey ro tamireo vahoake ty tane iaby. ⁶ Potepoteke iereo, firene nandietre firene, naho tana nandietre tana, satria nampijalen'Agnahare tamireo karaza fijalea iaby iereo. ⁷ Fa mahereza, naho ko enga haleme ty tagnanareo, fa ho valea soa ty asanareo." ⁸ Laha fa rey Asa reo rehake, ty dine Odeda mpaminane, le nana herem-po re naho nagnafake reo zaka raty hiala tamity tane Joda vaho Benjamina iaby, naho tamireo tana ze azone bakamity tane tazoa Efraima, naho nagnere nagnamboatre ty alitara Yaveh re, ze teo agnoloa ty lavaranga ty tragno Yaveh. ⁹ Navory Joda vaho Benjamina iaby, vaho reo ze nijano niarake tamiereo__ndaty bakamity Efraima vaho Manase, naho bakamity Simeona. Fa maro isake iereo ro namonje aze iaby tagne Israely, laha fa hisa iereo fa niaro aze ty Yaveh Zagnaharene. ¹⁰ Laha zao le niarake-nivory tao Jerosalema iereo tamity fahatelo ty vola, tamity faha-lime amby folo tao nanjaka Asa. ¹¹ Nanao soro ho ahy Yaveh tamity ilane tamireo azo ze niente iereo tamize andro zay iereo:Agnombe fiton-jato vaho agnondry aman'ose fito arivo. ¹² Nanao fifagnekea mba hipay Yaveh, ty Zagnahare ty razambeine iereo, tamity arofo iereo iaby vaho tamity fagnahy iereo iaby. ¹³ Nagnenke iereo fa na ia ia nilietse ty hipay Yaveh, ty Zagnahare Israely, le tokone vonoe ho mate, na kele na bey ty ndaty, na lahy na vave. ¹⁴ Nifanta tamy Yaveh tamity feo agnabo, tamity korake, vaho tamity trompetra naho anjomara iereo. ¹⁵ Nifalefale tamity fifanta tamity arofone iaby iereo, naho nipay mafe an'Agnahare, ka hisa iereo Re. Namea Yaveh fialia ty magnodidy aze iaby reo. ¹⁶ Nafahane tsy ho mpanjaka vave avao kea Imaka, zazane, satria nanao saren-jaka raty tamity baon'Aseraha re. Tinampa Asa ty saren-jaka raty, niliane ho deboke naho noroane teo amity baibon-driake kidrona zay. ¹⁷ Kanefa reo fiteora agnabo tsy nafaha tao Israely. Na zay aza, feno fanolora-bata vatane ty arofo Asa tamity agnondry iaby. ¹⁸ Nientene tao antragno Yaveh reo rarahan-draene vaho reo rarahane arere ze ahy Yaveh: volafoty vaho reo zaka volamena. ¹⁹ Tsy nisy aly sase hatramity fahalime amby telo-polo tao nanjaka Asa.