¹ Tamity tao fahavalo nanjaka Jeroboama Mpanjaka, le nanomboke nanjaka teo amy Joda Abia. ² Nandily zisike ty telo tao tagne Jerosalema re; Maka ro agnaran-drenene, ty anakampela Oriela bakagne Gibea. Nisy aly teo amy Abia vaho Jeroboama. ³ Abia nindeha nialy niarake tamity tafike mafe raike, le miaramila mahere fo, lahilahy voafily 400 000. Naho Jeroboama nandahatre lahilahy voafily, mafe, miaramila mahere fo 800 000 hialy handietre aze. ⁴ Nistanga teo ambohitse Zamaraima, ze tao amity tane tazoa Efraima ty Abia, naho nanao ty hoe:" Dranjigno raho, ry Jeroboama vaho ry Israely iaby! ⁵ Tsy hainareo vao fa Yaveh, ty Zagnahare Israely, ro nagnomea Davida ty fandilia teo amy Israely zisikezay, le ho azo vaho reo anadahine tamity fagnenkea arake ty lalane? ⁶ Nefa Jeroboama anadahy Nebata, ty mpanompo Solomona anadahy Davida, le le fa nitsanga naho navande nandietre ty tompone. ⁷ Reo lahilahy tsy soa, reo nama raty entam-bata, ro nikamba tamine. Niavy handietre i Rehoboama anadahy Solomona iereo, tamy mboe kele vaho tsy nana fahaia naho tsy nahavita nandietre iereo ty Rehoboama. ⁸ Amizao nareo mirehake fa mahalietre ty fitondra mahere Yaveh eo antagna reo foko Davida. Tafike bey nareo, naho miarake aminareo reo anak'agnombe volamena ze natao Jeroboama ho zagnahare ho anareo. ⁹ Tsy le fa nandroake reo mpisoro Yaveh, le reo foko Arona, vaho reo Levita vao nareo? Tsy le fa nanao mpisoro ho ahy ty vatanareo tamity fomba reo vahoake ty tane hafa vao nareo? Na ia ia avy magnamasim-bata miarake amity anak'agnombe vaho agnondrilahy fito le ho lasa mpisoro reo ze tsy zagnahare anie re. ¹⁰ Fa laha ty aminay, Yaveh ro Zagnaharenay, naho tsy mboe nahafoe aze zahay. Mana mpisoro zahay, foko Arona, mpanompo Yaveh, vaho reo Levita, ze amity asa iereo. ¹¹ Isa-maray vaho isan-kariva le magnoro fagnatetre oroa vaho liten-ketae magnitse ho ahy Yaveh iereo. Mandamy ty mofo ty fiatreha eo amity latabatre malio avao kea iereo; mikarakara ty fisy jiro volamena amity jirone avao kea iereo mba harehetre isan-kariva. Miambe reo lily Yaveh, Zagnaharenay zahay, nefa nareo nahafoe Aze. ¹² Ingo, Zagnahare le miarake aminay eo agnoloanay, naho reo mpisorone le eto miarake amity trompetra mba hampagnenoe fanaira ho anareo. Ry vahoake Israely, ko mialy amy Yaveh, ty Zagnahare ty razambeinareo, fa tsy hosoa nareo." ¹³ Kanefa Jeroboama nagnoma fofoke tampoke tafara iereo; teo agnoloa Joda ty tafine, naho tafara iereo ty otreke. ¹⁴ Laha fa nitolike ty Joda, le ingo, sady teo agnoloa iereo ro tao afarane ty aly. Nitaray tamy Yaveh iereo, naho nitioke ty trompetra reo mpisoro. ¹⁵ Le nitifitre reo lahilahy Joda; laha igne nifitre igne iereo, le namofoke Jeroboama vaho ty Israely iaby teo agnoloa Abia vaho Joda ty Zagnahare. ¹⁶ Nilay teo agnoloa Joda ty vahoake Israely, naho natolon'Agnahare teo antagna Joda iereo. ¹⁷ Vinono Abia vaho ty tafine tamity famonoam-bey iereo, ka lahilahy voafily 500 000 tamy Israely ro lavo ka mate. ¹⁸ Tamize fomba zay, ro naharesea ty vahoake Israely tamize andro zay; naharese ty vahoake Joda satria nianky tamy Yaveh, ty Zagnahare reo razambeine iereo. ¹⁹ Hinia Abia ty Jeroboama; nalaene tamine reo tana: le Betela niarake tamireo ana-bohine, naho Efrona niarake tamireo ana-bohine. ²⁰ Tsy nihamafe sase ty Jeroboama zisike ty andro Abia; namofoke aze Yaveh, ka mate re. ²¹ Fa Abia kea nihamafe; nangalake valy efatre ambifolo re naho niterake roe amby roapolo lahy vaho ene amby folo vave. ²² Ty sisa reo asa bey vita Abia, ty entam-batane vaho reo rehane le voasoratre ao amity sora i Ido mpaminane.