¹ Laha fa niavy tagne Jerosalema ty Rehoboama, le navorine ty foko Joda vaho Benjamina, lahilahy miaramila voafily 180 000, mba hialy amy Israely, mba hagnere amity lalane ty fanjaka ho ahy Rehoboama. ² Kanefa niavy tamy Semaia ty lahilahin'Agnahare ty reha Yaveh, nanao hoe: ³ "Ambarao Rehoboama anadahy Solomona, mpanjaka Joda, vaho ty Israely iaby agne Joda vaho Benjamina hoe: ⁴ 'Zao ro safa Yaveh:" Ko manafike na mamoro aly amireo rahalahinareo nareo. Ty ndaty iaby le tsy maintsy mihere agne amity tanane iaby, fa Zaho ro le fa nananga zay."'Ka le nanenke ty safa Yaveh iereo ka nihere tsy ho amity fanafiha i Jeroboama. ⁵ Nitoboke tao Jerosalema ty Rehoboama nananga tana tao Joda ho fiaro. ⁶ Nananga i Betlehema, Etama, Tekoa, ⁷ Beti-zoro, Soko, Adolama, ⁸ Gata, Maresaha, Zifa, ⁹ Adoraima, Lakisy, Azeka, ¹⁰ Zora, Aialona, naho Hebrona re. Reo ro tana manda tagne Joda vaho Benjamina. ¹¹ Nagnamafe reo manda re ka nametrake mpifehe tao amireo, niarake tamity fisi-hane, diloilo, naho divay. ¹² Nametrake apinga vaho lefo tagne amity tana iaby re ka nagnamafe reo vatane. Ka le lasane ty Joda vaho Benjamina. ¹³ Reo mpisoro vaho reo Levita ze tao amy Israely iaby le namonje aze iaby tao amireo fari-tanene. ¹⁴ Fa reo Levita niala tamireo tane fihinanam-bilo vaho ty tragno vaho tane iereo mba hindehana agne Joda vaho Jerosalema, satria le fa rinoa Jeroboama vaho reo anadahine iereo, mba tsy hahafaha iereo manao reo adidy amity maha-mpisoro ho ahy Yaveh sase. ¹⁵ Jeroboama le nanendre mpisoro ho aze ho amireo fitoboha agnabo vaho ose nahom saren-anak'ombe ze le fa namboarene. ¹⁶ Ty vahoke iaby tamireo foko Israely iaby le niavy tafara iereo, reo ze nanefe ty arofone hipay Yaveh, ty Zagnahare Israely; niavy tao Jerosalema iereo mba hanao soro ho ahy Yaveh, ty Zagnahare ty razambey iereo. ¹⁷ Ka le nihamafe iereo ty fanjaka Joda naho nagnamafe Rehoboama anadahy Solomona zisike ty telo tao, ka nindeha tamity lala Davida vaho Solomona zisike ty telo tao iereo. ¹⁸ Nangalake valy ho aze ty Rehoboama: le Mahalota, ty anakampela Jerimota, anadahy Davida, vaho Abihaila, ty anakampela Eiaba, anadahy Jese. ¹⁹ Niterake anadahy tamine re: le Jeosy, Semaria, naho Zahama. ²⁰ Tafara i Mahalota, le nangalake i Maka, anakampela Absaloma, ty Rehoboama; niterake i Abia, Atahy, Ziza, naho Selomita tamine re. ²¹ Rehoboama nitea i Maka, anakampela Absaloma, nihoatre reo valine hafa vaho reo valitsindranone iaby (nangalake valy ampela valo amby folo vaho valitsindrano enem-polo re, ka lasa rae ty anadahy valo amby roapolo vaho anakampela enem-polo). ²² Rehoboama nanendre Abia anadahy Maka ho bey, mpitarike eo amireo rahalahine; le fa nanan-kevetre ty hanao aze ho mpanjaka re. ²³ Nandily tamim-pahamarea ty Rehoboama; nizara reo anadahine iaby nagnera ty tane Joda vaho Benjamina iaby ho agne amity tana manda iaby re. Nagnomea sakafo bey ho ahy iereo avao kea re naho nipay valy maro bey ho ahy iereo.