¹ Nirehake tao agnarofone ty Davida hoe:" Ho mate ty tagna Saoly raho ndraike andro agne; tsy misy soa ho ahy laha tsy ty milay mbaeo amity tane reo Filistina; tsy hipay ahy era ty faritane ty Israely iaby sase ty Saoly; amize lala zay ro hilaisako hiala amity tagnane." ² Nitsanga ty Davida naho nindeha, re vaho reo lahilahy enen-jato ze niarake tamine, ho agne amy Akisy ana i Maoka, mpanjaka Gata. ³ Nitoboke niarake tamy Akisy tao Gata ty Davida, re vaho reo lahilahine, ty lahilahy kirai-kiraike miarake amity fokone iaby, naho Davida miarake amireo valine roe, Ahinoma Jerizelita vaho Abigaila Karmelita, valy Nabala. ⁴ Natalily tamy Saoly fa nilay agne Gata ty Davida, ka tsy nipay aze sase re. ⁵ Hoe ty Davida tamy Akisy:" Laha nahisake hatea teo amasonao raho, ao iereo hagnomea toera ao amity tana raike eo amity firene ho ahy, ka hahafahako mitoboke agne: fa nagnino ty mpanomponao ro hiarake hitoboke ao antana ty mpanjaka miarake aminao?" ⁶ Le namea Akisy aze ty andro o Ziklaga; zay ro antone nahavy i Ziklaga ho ahy ty mpanjaka i Joda nanomboke tamize andro zay vatane. ⁷ Herentao feno vaho efa-bola ro isa ty andro ze nitoboha Davida tagne amity tane reo Filistina. ⁸ Naho toera maro isan-karazane ro tinafy Davida vaho reo lahilahine, nanao fanafiha tagne Gesorita, Gizrita, naho Amalekita; satria reo firene reo le vahoake tao amity tane, laha hombaeo sora, ka zisikagne amity tane Egypta riha. Le fa nitoboke tagne iereo taloha. ⁹ Nanafike ty tane Davida naho tsy nisy nengane ho velo na lahilahy na ampela; nientene ty agnondrine, ty agnombe, ty ampondra, ty rameva, naho ty siky; naho nihere ho agne amy Akisy ndraike re. ¹⁰ Le hoe ty Akisy ty hoe:" Ia ro tinafinareo androany?" Le namale ty Davida hoe:" Ty antimo Joda," na "Ty antimo reo Jaramelita," na "Ty antimo reo Kenita." ¹¹ Tsy nisy nenga Davida ho velo mba ho ente agne Gata na lahilahy na ampela, fa hoe re ty hoe:" Mba tsy hahafaha iereo manao ty hoe:' Manao zao vaho zao ty Davida." Zay ro nataone zisike ty andro iaby nitobohane tagne amity firene reo Filistina. ¹² Nino Davida ty Akisy ka nanao ty hoe:" Le fa nataone ze halaigna ty Israely vahoakene aze vatane; laha zao le ho mpanompoko zisikezay re."