¹ Le niavy tao Noba ty Davida mba hanente i Ahimeleka mpisoro. Niavy mba hanalaka i Davida tamin-tahotre Ahimeleka naho nanao tamine ty hoe:" Nagnino riha ro arere naho tsy misy miarake aminao?" ² Hoe ty Davida tamy Ahimeleka mpisoro ty hoe:" Nandefa ahy handefe irake ty mpanjaka naho nirehake tamiko hoe:' Ko enga hisy hahay na ino ino miomba ty raraha ze hagnirahako anao, vaho ze handiliako anao.' Nanoro lala reo ajalahy ho agne amina toera raike raho. ³ Ka ino are ro antagnanao zao? Ameo mofo lime raho, na ze zaka misy ato." ⁴ Namale Davida ty mpisoro ka nanao hoe:" Tsy misy mofo tsotra antagnako eto, fa kea misy mofo masy__laha nahambe-bata tamity ampela reo ajalahy." ⁵ Davida namale ty mpisoro nanao hoe:" Nahambe-bata tamity ampela vatane zahay zisike reo telo andro lasa, manahake ty fatao isake ty mindeha raho. Le fa natoka ty fanagna reo lahilahy reo na le ho amireo irake tsotra aza. Maike aza voatoka ze hanagna iereo amizao!" ⁶ Ka le nagnomea aze ty mofo ze voatoka ty mpisoro. Fa tsy nisy mofo laha tsy ty mofo ty fiatreha avao ty tao, ze le fa nafaha teo agnoloa Yaveh, mba hametraha mofo vaovao eo amity toera zay tamity andro nagnafaha zay. ⁷ Naho ty raike tamireo mpanompo Saoly ze tagne tamize andro zay, le voata teo agnoloa Yaveh. Doega Edomita ro agnarane, bey reo mpiarake agnombe Saoly. ⁸ Le hoe Davida tamy Ahimeleka hoe:" Tsy misy lefo na meso azo ampiasae vao eo antagnanao? Fa tsy nahafinday kea raho na ty mesoko na reo zaka-fialiako tamiko atoy, satria tena meke vatane ty raraha ty mpanjaka." ⁹ Hoe ty mpisoro hoe:" Ty meso Goliata Filistina, ze vinononao tagne amity Baibo Elaha, ty nifogno lamba ao ambaliky ty efoda ro ato. Laha teanao alae zay, le alao, fa tsy misy zaka-fialia hafa ato." Hoe Davida ty hoe:" Tsy misy meso manahake ze raike zay; ameo ahy zay." ¹⁰ Le nitsanga Davida naho nilay i Saoly tamize andro zay ka nimbaeo amy Akisa, mpanjaka Gata. ¹¹ Reo mpanompo Akisa nirehake tamine hoe:" Tsy i Davida, ty mpanjaka ty tane vao toy? Tsy toy vao ty nifampiantsa iereo tamity dihy ty hoe:' Saoly namono agnarivone, naho Davida namono agnalene'?" ¹² Rinae Davida ampo ze rehake zay ka natahotre mafe Akisa, mpanjaka Gata re. ¹³ Nagnova ty fihetsene teo agnoloa iereo re ka nisare gege teo antana iereo; nanoratsoratre teo amity lelam-bavahady re naho nengane hitsororoke tamity volom-bavane ty ivene. ¹⁴ Bakeo le hoe Akisa tamireo mpanompone hoe:" Ingo, hisanareo fa lasa gege ty lahilahy. Nagnino ro nientene nareo tamiko eto re? ¹⁵ Tsy ampe ndaty gege vao raho, ro le niente nareo tamiko eto io mba hanao fihetseke hoe io agnoloako eto? Hilitre ao antragnoko vatane vao o nama ao?"