¹ Vaho raho, rahalahy, le tsy afake nitsara taminareo manahake ty ndaty ze ara-pagnahy, te kea manahake ty ndaty ara-nofotse, manaha ty ajajakele ao amy ndre Kristy. ² Nifahanako ronono nareo, te tsy venten-kane, satria tsy nioma tamy zay nareo; vaho na henanezao kea le mboe tsy nioma amy zay nareo. ³ Satria nareo mboe arake ty nofotse. Te na aia misy farahy naho fifamalea eo aminareo, le tsy miaigne arake ty nofotse vao nareo, vaho tsy mandeha amy ty fenitse ty ndaty? ⁴ Te lafa misy raeke mitsara tihoe: "Raho magnarake ahy ndre Paoly," vaho ty raeke mitsara tihoe: "Raho magnarake ahy ndre Apolosy," le tsy miaigne manahake ty ndaty avao vao nareo? ⁵ Ia vao Apolosy? Vao ia Paoly? Mpiasa ze tamy ty alalane ro ninoanareo, ze nome ty Tompo asa iaby. ⁶ Raho ro nambole, Apolosy ro nanondrake, te Andragnahare ro nampitombo. ⁷ Ke noho zay, na reke ze mambole na reke ze manondrake le tsy misy dikane. Te Andragnahare ro mampitombo ⁸ Vaho re ze mambole naho re ze manondrake le raeke, vaho ty kiraikiraike le sambe hahazo ty karamane iaby arake ty asane. ⁹ Te zahay le mpiara-miasa amy ty Andragnahare. Nareo le baibo ty Andragnahare, naho ajomba ty Andragnahare. ¹⁰ Arake ty fahasoava ty Andragnahare ze nomea ahike manahake ty mpamboatse tragno mahay, le nametrake ty fototse raho vaho hafa ro magnore eo ambonine. Te lonike ty lehilahy kiraikiraike hitao ty amy ty fomba hagnoregnane eo amy zay. ¹¹ Te tsy misy ndaty mametrake fototse ankoatse iaze raeke ze napetrake, zay tihoe, Jesosy kristy. ¹² Henane zao laha misy ndaty magnory eo ambone ty fototse amy ty volamena, volafote, vato lafofile, hetae, akata, na mololo, ¹³ le hamboake ty asane, te ty andro mazava ro hampiseho zay. Satria haeso amy ty afo zay. Ty afo ro hitsipa ty hasoa ty natao ty kiraikiraike. ¹⁴ Laha mitoetse ty asa iaze ndaty, le hahazo valeso reke; ¹⁵ te laha may ty asa iaze ndaty, le ho fatiantoke reke, te reke vatane le ho vonje, manahake ty nitioke tamy ty afo avao. ¹⁶ Tsy hainareo vao te nareo le tempole ty Andragnahare vaho ty Fagnahy ty Andragnahare ro mitoetse ao aminareo? ¹⁷ Laha misy ndaty manimba ty tempoly ty Andragnahare, le hanimba zay ndaty zay Andragnahare. Te masy ty tempoly ty Andragnahare, vaho manahake zay kea nareo. ¹⁸ Ko Apoke hisy ndaty hamita-bata. Laha misy ndaty eo aminareo mihevitse te hendre reke amy zao vanem-potoa zao, apoho re ho lasa "adala" amy zay soa mete ho lasa hendre reke. ¹⁹ Te ty fahendrea zao tontolo zao le fahadala eo amy ty Andragnahare. Satria voasoratse tihoe: "Nahazo ty hendre tao amy ty hafetse iareo Reke." ²⁰ Vaho kea tihoe: "Ty Tompo le mahay te ty fihevitsy ty hendre le zaka-foa." ²¹ Noho zay tsy misy fibohaboha mikasike ty ndaty sase! Te ty zaka-iaby le nareo, ²² Na Paoly, na Apolosy, na Kefasy, na zao tontolo, na fiaigna, na fahafatesa, na raraha henanezao, na raraha ho avy. ty zaka-iaby le nareo, ²³ vaho nareo le ahy ndre Kristy, vaho Kristy le ahy ty Andragnahare.