¹ Reo anadahy Robena ty lahy voalohane Israely__naho Robena ro lahy voalohane Israely, kanefa namea reo anadahy Josefa anadahy Israely ty hazokeane satria nandoto ty fandrean-draene ty Robena. Ka le tsy voasoratre ho anadahy zokene vatane re. ² Joda ro nimafe vatane tamireo rahalahine, naho bakamine ro niavia ty mpitarike. Kanefa ty hazokeane le ahy Josefa__ ³ reo anadahy Robena, ty lahy voalohane Israely le i Hanoka, Palo, Hezrona, naho Karmy. ⁴ Toa iaby ty foko Joela: ty anadahy Joela le i Semaia. ⁵ Ty anadahy Semaia le i Goga. Ty anadahy Goga le i Simei. Ty anadahy Simei le i Mika. Ty anadahy Mika le i Reaia. Ty anadahy Reaia le i Bala. ⁶ Ty anadahy Bala le i Bera, ty nalae Tiglato-pilesera mpanjaka i Asyria ho babo. Bera le mpitarike tao amity foko i Robena. ⁷ Toa magnarake toa ty longo i Bera bakamireo fokone, ze voaisake ao amity tahiry ty tetiara iereo: Jeiela ro zokene vatane, Zakaria, vaho ⁸ Bela anadahy Azaza anadahy i Sema anadahy Joela. Nitoboke tagne Aroera, zisikagne Nebo naho Balameona, ⁹ naho mianignana manomboke eo amity efetre ze mihabey zisikagne amity rano i Efrata iereo. Zay le satria nana biby hare maro teo amity tane Gileada iereo. ¹⁰ Tamity andro Saoly, le nanafike reo Hagrita ty foko i Robena naho naharese iereo. Nitoboke tao amity tragno reo Hagrita nagnera ty tane iaby tagne antignana Gileada iereo. ¹¹ Nitoboke teo agnila iereo ty mpikamba tao amity foko i Gada, teo amity tane Basana zisikagne Saleka. ¹² Ty mpitarike iereo le i Joela, ty bey ty foko, naho Safama ro bey ty foko hafa, naho Janay vaho Safata tagne Basana. ¹³ Reo longo iereo, bakamireo longon-draene, le i Mikaela, Mesolama, Seba, Joray, Jakana, Zia, naho Ebera__fito ty fiharoane. ¹⁴ Reo ndaty voatalily agnara ambane eo reo ro foko i Abihaila, naho Ahihaila le anadahy Hory. Hory le anadahy Jaroa. Jaroa le anadahy i Gileada, Gileada le anadahy Mikaela. Mikaela le anadahy Jesisay. Jesisay le anadahy Jado. Jado le anadahy Boza. ¹⁵ Ahia anadahy Abdiela anadahy Gony, ro loham-pokon-drae iereo. ¹⁶ Nitoboke tao Gileada, tagne Basana, tao amity rovane iereo, naho tao amity tane fihinanam-bilo Sarona iaby zisikagne amity sisin-tane. ¹⁷ Reo iaby reo le voaisake arake ty tahiry tetiara tamity andro i Jotama mpanjaka Joda vaho tamy Jeroboama mpanjaka Israely. ¹⁸ Reo Robenita, reo Gadita, naho ty vaky ty foko i Manase le nana miaramila efatrarivo vaho efatrale voanatre ho amin'aly, te nita ampinga vaho meso, naho naninto ty folese. ¹⁹ Nanafike reo Agarita, Jetora, Nafisy, naho Nodaba iereo. ²⁰ Nandrae fagnampea bakamin'Agnahare iereo mba hagnisia iereo. Tamize fomba zay, ro naharese reo Agarita vaho iaby ze niarake tamiereo. Zay le satria nangatake tamin'Agnahare tagne agnaly ty Israelita, naho namale iereo Re, satria nanao ty fatokiane tamine iereo. ²¹ Tsinepa iereo ty biby hare, agnate zay ty rameva dime ale, agnondry aman'ose 250.000, borike roa arivo, naho lahilahy 100.000. ²² Satria Zagnahare nialy ho ahy iereo, le vinono iereo ty hamaroa reo fahavalo. Nitoboke tao amity tanene iereo mandram-pahavy ty fangala. ²³ Nitoboke teo amity tane Basana zisikagne Bala Hermona vaho Senira (Vohitse Hermona zay) ty vaky ty foko Manase. Toa iaby ty mpitarike ty foko iereo: Efera, Jisy, Eliala, Azriela, Jeremia, Hodavia, naho Jadiela. Iereo le lahilahy mahere vaho bey risim-po, lahilahy malaza, mpitarike ty foko iereo. ²⁵ Kanefa tsy natoky ty Zagnahare reo razambeine iereo. Fa kea, nanompo ty zagnahare reo vahoake ty tane, ze le fa rinavan'Agnahare teo agnoloa iereo. ²⁶ Ty Zagnahare Israely nandrisike i Pola mpanjaka i Asyria (atao ty hoe kea Tiglato-pilesera, mpanjaka i Asyria). Nalefane sese-tane reo Robenita, Gadita, naho ty vaky ty foko Manase. Nientene tagne Hala, Habora, Hara, naho tagne amity rano Gozana iereo, ty hitoboha iereo zisikandroany.