¹ Endrey gny hasoany gny tomboko ami-gny kapanao ao, ry gnanak'ampelan'andriandahy! Manahaky gny ravaky gn'amboam-penao, asa tagnany gny mpanao asa-tagna mahay. ² Gny kobonao la manahaky gny tamaboha baribary; tsy hijaly divay zay. Gny sarotronao la manahaky gny vary tritiky voatoby voahodidy lilia. ³ Gny nononao roa la manahaky gnanaky serfa roa, gazela hamba. ⁴ Gny vozonao la manahaky gny tilikambo ivory; gny masonao la manahaky gny kamory a Hesbona am-bavahadin'i Bata Rabima agny. Gny oronao la manahaky gny tilikambo a Libanona agny mitoliky magna Damaskosy agny. ⁵ Gny lohanao la manahaky gnan'i karmela; gny volon-dohanao la volomparasy matroky.Babony gny randrany zay gny mpanjaka. ⁶ Endrey soa tarehy sady maha te ho tea iha, ry malala, mahafinaritsy iha! ⁷ gny tsangananao la manahaky gnany palma, voho gny nononao la manahaky gny tahom-boakazo. ⁸ nametsivetsy iaho hoe:"Te hagnaniky gnany zay palma zay iaho; hitanjaky mare gny reo tahony." Ao gny reo nononao hanahaky gnani-reo tahom-boaloboky, voho ao gny fameroverony gny oronao hanahaky gny paiso. ⁹ Ao gny vavanao hanahaky gny divay soa mare, mitsororoky moramora ami-gny malalako, misosa ami-gny sogny ndraiky gny hin-tsika. Somonjara misafa ami-gn'olo teany io ¹⁰ Gnany malalako iaho, voho magniry gn'ahy ie. ¹¹ Avia, ry malalako, andeha tsika hiaraky ho ambanivohitsy agny; andeha tsika hatory ami-gny tana reo agny. ¹² Andeha tsika hifoha maray ho an-tanim-boaloboky agny; andeha hentean-tsika laha mitsimoky voloboky agny reo; laha mivoha gny vognony, voho laha mamogny gny reo ampongabendagnitsy. Agny ro hagnomezako gnanao gny hateako. ¹³ mamerovero ao ho izay gny mandravasarotsy; am-baravara hipetrahan-tsika gny kila voankazo voafantina iaby, gny vao ndraiky gny fa ela, fa najariko ho gnanao, ry malalako.